کوئٹہ شہر بلوچستان ءِ بنجاہی شہر اِنت پمشکا درائیں مہلوک ءِ چم ہمیشی ءَ سک اِنت چیزے پہ کارو روزگار ہمے شہر کیت ءُُ چیزے پہ وانگ ءُُ زانگ ءَ ، چیزے وتی علاج ءَ کیت ءُُ چیزے پہ سئیل ءُُ سواد۔ اے شہر ءَ بلوچستان ءِ درائیں مزن مزنیں دفتر اوں است انت پمشکا ہرحساب ءَ مہلوک ءِ وابستگیں گوں اے شہر ءَ انت ،بلئے شہر ءِ ہما کہ مئیر اِنت یاکہ شہر کارمستر انت آئی ءَ وتی ذمہ واری پیلو نہ کتگ اَنت ۔
آئی ءَ نہ ایوک ءَ شہر ءِ زیبائی ءِ نیمگ ءَ دلگوش داتگ بلکیں آئی ءَ اے اوں نزانتگ کہ شہر ءِ مردمانی چے حاجت ءُُ چے ضرورت اَنت۔ انوں سرجمیں کوئٹہ ءَ پہ مردمانی سئیل ءُُ سواد ءُُ بیگاہانی دیوان ءَ یک جوانیں پارکے ءَ بل یک انچائیں پارکے اوں نیست اِنت ۔ زہگانی لیب ءُُ گوازی ءَ پہ پٹ ءُُ میدان نیست انت ۔ پہ مردمانی گشادی ءَ پٹ پاتھ نیست اَنت ۔
اے ڈولیں شہر ءَ کہ اے بنکی چیز کہ نیست اَنت داں پہ وانوکاں لائیبریری ءُُ اسٹوڈنٹ ہاسٹل چون بیت ۔ بلوچستان ءِ دور ءُُ دریں دمگاں چہ مردم وانگ ءِ حاترا ءَ کوئٹہ ءَ کاینت ءُُ پریشاں نندگی ہچ وڑیں جاہ نیست انت اے حکومت ءُُ شہر ءِ مئیر ءِ ذمہ واری اِنت کہ آ اسٹوڈنٹ ہاسٹل جوڑ بہ کن اَنت ۔ چہ دور ءُُ دراں اتکگیں مردم در بہ در اں ءُ انچیں جاگہاں کرایہ دینت ءُُ ننداں کہ آہود ءَ ایشانی پگر وانگ ءَ چہ گیش ہمے کمراہ ءِ کرایہ ، گیس ، آپ ، بجلی ءِ بلاں گوں بندوک اِنت ۔ہاسٹلاں چوکہ اے سہولت پیسر است بنت پمشکا آوانی پگر ایوک ءَ گوں وانگ بیت ۔
بے شک حکومت لس ہاسٹلانی حاترا کرایہ ایر بہ کنت بلئے جوڑ بہ کنت ۔پرچکہ دور ءُُ دراں اتکگیں بچک بلکیں یکے دومی ءَ تہہ ءُُ توکی ءَ جا ہ کن اَنت بلئے زالبول ءُُ جنین آدماں پہ اے یک بلائیں جنجالے اگاں آ پہ وت ءَ جوانیں جاہ یے کرایہ کن اَنت داں ہما پراپرٹی والا یاکہ کمرا ہ ءِ مالک دپ ءِ پُراہ آواناں زر گپت ۔ اے جیڑگ ءَ ابید پہ وانگ ءَ اے نودربراناں جوانیں لائیبریری یے نیست انت۔
کہ آودا نشت ءُُ وانت بہ کن اَنت ۔ سرجمیں کوئٹہ ءَ ایوک ءَ سے ءُُ چار لس لائیبریری است انت کہ آودا زہگانی وانگ ءِ تُن پروشگ بیت بلئے ہمے لائیبریانی نودربرانی کچ ءُُ کیاس ہزارانی حساب ءَ انت ۔ انوں جناح لائیبریری یے وَ جوڑ انت بلئے ایشی ءِ را کچ سک باز اِنت ءُُ مردمانی بازی ءَ وانگ اوں جوان بوہگ ءَ نہ انت بلئے اے مردم مجبور اَنت کہ دگہ لائیبریری یے نیست انت ۔
حکومت ءَ را بلوچستان ءِ دیمروئی ءِ مزن مزنیں کارانی ایوک ءَ گپ جنی ءَ ابید کار کارے وَ نیست انت ۔اصل کار ہمیش اَنت کہ حکومت ایشانی نیمگ ءَ ہچ دلگوش دئیگ نہ اِنت ۔ کوئٹہ ءَ اول وَ ہور نہ بیت اگاں بیت داں آپ ہشکی ءِ نظام انچو حراب انت کہ درائیں راہ لچ ءُُ مین بیت ۔راہ ءَ کس گوست نہ انت ۔ گاڑی ءُُ سائیکل ءَ بل پیادگیں مردم اوں راہاں شت نہ کنت ۔
اے حکومت ءِ ذمہ واری اِنت کہ اے بابت ءَ گامگیج بروزیت ءُُ لس مہلوک ءَ پہ اگاں دگہ ارش ءُُ کرشے ایر کت نہ کنت داں اے دوئیں کاراں پہ نودربراں وَ کت کنت آئی ءِ دست ءَ بنت ۔ دائم ءَ روڑانی پروشگ ءُُ وتی راہانی پراہائی ءَ چہ جوان اِنت کہ یک ءُُ دو مزنیں لائیبریری پہ مردمانی وانگ ءَ جوڑ بہ کنت ، سےءُُ چار بچکی ، یک ءُُ دومی جنکی ہاسٹل جوڑ بہ کنت دانکہ مردمے آرامی ءَ بئیت ءُُ وتی وانگ ءِ روچاں جوانی ءَ آسر کت بہ کنت یاکہ پہ چکاسے ءِ تیاری ءَ جوانی ءَ کت بہ کنت ۔ بلئے حکومت ءَ را اے بابت ءَ ہچ سمائی نیست اِنت بائد اے کار حکومت ءِ مزن کاراں شمار بہ بیت ءُُ ہرچند کہ زوت بوت کنت حکومت اے کاراں بہ کنت ۔