دین ءُُ مذہب ءِ کار مردمانی مادنیں راہ ءِ شون دئیگ ءُُ مردماناں نیکیں پنت کنگ اِنت ۔بلئے چندے ناشریں مردماں نیکراہ ءُُ مذہب ءَ را سک بدنام کتگ ۔مرچی اگاں مردمے وتی نام ءَ مسلمان بہ کنت داں درقومی مردمے چرے گپ ءَ ترس ءُُ بیم ءِ تہا کیت کہ باریں چونیں مردمے بہ بیت ۔

اے ترس ءُُ بیم کیا دری مردمانی دل ءَ رودینتگ ؟ ہمے مدامی جنگ ءُُ پسات ،ہمے مدامی نیکراہءِ نام ءَ جنگ ءُُ شدتاں اے ترس ءُُ بیم ودی کتگ ۔ ہمے جنگ ءُُ پسات ءِ یک دردناکیں وئیلے نیوز لینڈ وڑیں پُرایمنیں ملکے ءَ بوتگ ۔

وہدے ہما ملک ءِ جاہ منندیں مسلمانی وتی نماز ءُُ عبادت ءَ مسیت ءَ شُتگ اَنت بلئے ایشانی وہم ءُُ گمان ءَ نہ بوتگ کہ مرچی آوانی گڈی روچ اوں بوت کنت ۔نیوزلینڈ ءِ ’’النور ‘‘نامیں مسیتے ءَ یک صلہ بندیں مردمے ءَ تیر گواری کتگ ۔

چرے تیر گواری ءَ 50 مردم بیران ءُُ 48 مردم ٹپی بوتگ ءُُ چرے مردماں باز انگت ءَ مرگ ءُُ زند ءِ نیام ءَ اَنت ۔اے وئیل جاہ ءَ بنگلہ دیس ءِ کرکٹ ٹیم ہم ساڑی بوتگ ۔ بلئے آ چہ وئیل جاہ ءَ کمے گستہ بوتگ اَنت پمشکہ چہ تیرگواری ءَ رک اِتگ اَنت ۔ بنگلہ دیس ءِ ٹیم نیوز لینڈ ءَ پہ گوازی ءَ اتکگ اَت بلئے اے وئیل ءِ بوہگ ءَ پد ایشاں وتی گوازی موکل کتگ ءُُ روچ دیم ءَ برتگ ۔ سرجمیں دنیا ءَ اے وئیل ءِ ایر جنی کنگ بوہگ ءَ اِنت ۔

اے وئیل ءِ نہ ایوک ءَ مسلم کمیونیٹی ایر جنی ءَ کنگ ءَ اِنت بلکیں اے دگہ درائیں نن مسلم ہم زارشانی کنگ اَنت۔وئیل پد نیوز لینڈ ءِ سرکار ءَ سے ناشناسیں مردم دستگیر کتگ کہ ایشانی سرا وئیل ءَ ہواری ءِ گمان بوتگ ءُُ ایشاں چہ جست ءُُ پُرس برجاہ اِنت ۔اے رنگیں وئیلاں چہ جاور گیشتر حراب تر بنت ءُُ جنگ ءُُ پساتی جاورے بندات بوت کنت ۔ باندہ دگہ یکے چرچے ءِ یاکہ مندرے ءِ سرا ارش کنت اے رنگ ءَ نیکراہی یک بہہ ہلاس نہ بوکیں جنگے بنا بیت ۔

بائد اِنت اے وئیل ءَ چہ پد درائیں نیکراہانی پیشوا ءُُ مستر وتی وتی ہند ءُُ جاہاں ایمنی ءِ جار بہ جن اَنت ۔ وتی مہلوک ءَ را جنگ ءُُ پساتی ءِ درس دئیگ ءِ جاہ ءَ مہر ءُُ دوستی ءِ ،صبر ءُُ اوپار ءِ گشگ بہ بیت ءُُ اے وئیل ءِ ایرجنی ءِ گشگ بہ بیت۔اگاں ناں اے وئیل چد ءُُ گیشتر بوہگ ءِ گمان انت ۔ دنیا ءِ دپتر گواہ اِنت کہ میان استمانی جنگ انگت دارگ بوت کن اَنت بلئے مذہبی جنگ ءِ گر ءُُ دار سک گران اِنت۔

اے انچیں جنگے کہ آسری نزانت ۔ہما کہ نیکراہ ءُُ مذہبانی اصل درس اِنت بزاں مہر ءُُ دوستی ،یکے دومی ءِ مدد ءُُ تاوان،یکے دومی ءَ گوں کمک کنگ ،اے درائیں چیز بے حال کنگ ءُُ جنگ ءُُ شدتی رنگے اگاں اے نیکراہی بیاریت داں ایشی ءِ آس داں قیامت ہمے پیم روک بیت ۔اے وئیل ایوک ءَ یک دین ءُُ مذہبے ءِ مردمانی نہ اِنت بلکیں سرجمیں بنی آدمءِ بیرانی اِنت۔

ہما مردماں کہ اے وئیل ءُُ ارش کتگ ،آئیءَ زانتگ کہ اے وہد ءَ مردم گوں حدا ءَ دیم پہ دیم اَنت ،بے حال چہ دنیا ئی ءَ کہ ملکموت ءَ لانک بستگ ءُُ پیداک اِنت ۔ بلئے جنوک ءَ ہم اے نہ چار اتگ کہ اے جاہ ءَ مردین ،جین ، کسان سال ، ورنا، پیرمرد آئی ءَ تیرانی آس گواری کتگ ءُُ ہرکس کہ ہمے سہر سریں تیرانی دیمءَ اتکگ بیران بوتگ ۔

نیوزلینڈ ءِ جاہ منندیں مسلم ءُُ نن مسلم مردماں چہ حکومت ءَ لوٹ کتگ کہ ناشرکار زوتاں زوت دستگیر کنگ ءُُ سزا دئیگ بہ بیت دانکہ بیرانی بوتگیں مردمانی کہولانی دل چہ وئیل ءَ اگاں تاہیر نہ بنت سارت تر بلکیں بہ بیت ۔