ابیتکیں بیگاہے اَت، من ءُُ منی سنگتے باتیلءِ بُنءَ کوہنیں قبرانی شکانی سرا نامے درگیجگءَ اتیں۔سنگت اسپیتیں شکانی سرا نام شوہاز کنان اَتءُُ منا لہتیں پُل دستءَ ات………… من لوٹ اتگ اَت کہ ہما قبرءِ کُنٹگانی سرا لہتیں پُل شانک بدیاں ءُُ پدا گسءَ واتر بہ باں کہ ھمے دمانءَ پرشتگیں مانشانی تہا مردمے سنگاں لگت کنانءُُ پیداگ اَت…………. نزیکءَ رسگءَ گوں دیست آئیءَ سگریٹے روک کتگ اَت۔
مئے نزیکءَ گوزان ءَ کمے دور ڈُرتگیں قبرےءِ سروناں نشتءُُ سگریٹ کشگءَ لگ اِت………. من جیڑات ملنگے بیت…….. اے ھم بوت کنت گنوکے ……….. پدا سما کت بگندئے وتی نزیکیں مردمےءِ قبرءِ سرا پُل ریچگءَ اتکگ بلئے آئیءَ پُل وَ گون نیست اَت…..!!
پدا ھمائیں من غین نون گلءَ پجا کاراں……….. آ ھمک مراگشءِ براہ اَت،اسٹیجءَ وھدے غین نون گل درا بوت تہ کوکار مچ ات اَنت…. ترنم،ترنم،ترنم۔پدا گڑا دیوان آئیءَ گو ن وت کتگ اَت۔من ھمے کہ آئیءَ را مشاعرہانی سرا گوں ترنمءَ شعر وانگءَ دلگوش کت تہ غین نون گل نہ چار ات، بلکیں آئیءِ شہدیں آوازءُُ پریں بچکندانی تہا گیمرتگیں دنیا ہے سما کُت…….. آ شعر گشان اَت،دردانی ردیں کشکے رندان اَت…… بے وتیں دردانی کسہاں الہان کنان اَت۔
شُگریں اللہءِ تنگ دست نیاں
ارس بنت شامءُُ گم سبارگ بیت
تیابءِ لمبءَ کسانکیں چاہی ہوٹلءَ بچارتیں ،آ ھمودا سگریٹ کشگءَ اَت…….. گزروانءِ تنکیں دمکانی تہا چم شانک داتین آں ،آ روگءَ اَت…….. شاہی بازارءِ پرشتگیں کریمکءِ ہوٹلءَ بہ دیستیں تہ آ ھمودا اَت۔ اسلءَ گُل زندگیں مردمے اَت۔ہرکسی دلانی تہا جاہے کتگ اَت۔ سہبی چم پچ بوت اَت داں موبائلءَ سنگتےءِ کلوہ اتکگ اَت کہ غین نون گل اچ ما گسر کپتگ۔منا دمانءَ عطاءِ اے شعر یات اتک،
گواڑگے بوتیں بستوں تئی شارءِ دامنءَ
زند ھما بدواہ اِنت کہ ہچ یار نہ بیت
اسلءَ غین نون گل مُرت نہ کنت۔ آ دلانی تہا زندگیں ترنمےءِ نام اِنت…..گُل دلءِ تارانی چڑکہاں گوں ودی بوتگیں توارےءِ نام انت۔ مردم مرت کنت بلئے توار نہ مریت،ساز نہ مریت ءُُ ازمکار مُرت نہ کنت۔ مروشی پدا باتیلءِ کوہءَ کوہنگیں قبرستان اِنت ءُُ منا پُلے دستءَ انتءُُ اوشتاتگاں۔ دورءَ چے غین نون گل سگریٹ کشان اِنت ،شعر گشان اِنت ءُُ پیداگ اِنت۔
مست ،وارث ،لطیف ،بُلھے شاہ
مئے ہوں ہر سال پُرس دارگ بیت