اے ماہ ءِ بندا تءَ اتکگیں ہور ءُُ ہرّگاں کیچ ءِ مہلوک ءَ مزنیں تاوانے داتگ ات بلئے لہتیں روچ بیت کیچ جہگیرانی نیمگ ءَ اے جار جنگ بوتگ کہ آ چہ مہلوک ءَ بے ترانگ ءُُ بے حال نہ اَنت۔

مکران ءَ 12 سال ءَ قحط ءُُ ڈکال ءَ پد یک جوانیں ہور ءُُ بارانے اتک کہ آئی ءَ مکران ءِ سوتکگیں ڈن ءُُ پٹ ، ڈگار ءُُ بست ،بل ءُُ کمبیل آپدار کت انت۔ بلئے ابرمی ہچ شے بنی آدم ءِ دست رس ءَ نہ انت پمشکہ دورسریں کوران آپ کت ءُُ بازیں بازار ءُُ بندے بُرت۔ نوکیں زمانگ ءَ استان ءُُ ریاست ماتے ءِ بدل انت کہ آہانی کار وتی زہگ ( جاہ منندانی ) پہازگ ءُُ سنبالگ انت بلئے بدبحتی ءَ مکران ءَ استان ءُُ ریاست ءِ جہگیراں ایوک ءَ ووٹ ءِ وہد ءَ بزگیں مہلوک گیر کیت۔

نہ اشاں ڈکال ءُُ قحط ءِ زمانگ ءَ مہلوک ءِ گورسی کرتگ ءُُ ننکہ انوں ہار ءُُ ہیئروپانی وہد ءَ دومی بدبحتی ایش انت کہ بلوچ ہار آماچ بہ بنت ، زمین چنڈ ءُُ ڈکال آماچیں مردم ، آہانی پہ زور رسانک در ءَ دور دارگ بیت۔ ایوک ءَ اے حاتر ءَ کہ دنیا ءَ گشگ بوت بہ کنت کہ بلوچ وشحال ءُُ بے جیڑہ انت اگاں اے گپ استان ءِ نیمگ ءَ سیاسی پشدر ءَ چارگ بہ بیت گڑا دردے پہ دو بلئے چاگردی جیڑہاں اے وڑیں لیکہ ءِ دارگ ایوک ءَ بلوچ ءَ بزگ کنگ ءَ ابید دگہ ہچ نہ انت ۔

پرچکہ ہمے وڑیں ویل وہدے ملک ءِ ایندگہ دمگاں کاینت گڈا حکومت ءِ کارندہ دمان ءَ جاڑ کگ بنت بلئے وہدے بلوچ میتگ ءُُ ہلکاں کاینت گڑا کسی گوش ءَ مورے نہ وارت ۔ گوستگین 12سال ءِ ڈکال ءَ بلوچستان ءَ مزنیں کشارے ، درچکے ءُُ دلوتے بیران بوتگ ءُُ بازیں گل ءُُ مردمانی نیمگ ءَ اے حال ہم شنگ کنگ بوتگ ات کہ بلوچستان ءَ ’ ’ آفت زدہ‘‘ کرار دئیگ بہ بیت بلئے اے جیڑہ ءِ سرا کس ءَ بلوچستان ءِ جہگیری نہ کت ءُُ ابرمی رنگ ءُُ بلوچستان ءِ ڈکال پرشت ۔

ڈکال ءِ پروشگ وتی جاگہ بلئے انوگیں ہار ءُُ ہیروپاں کیچ ،تمپ،دشت،ہیرونک،ہوشاب ،میری ، ناصر آباد ءُُ ایندگہ بازیں دمگاں بدی بیرانی بوتگ ۔ حالانی رد ءَ اے دمگانی مردماں چہ سرکار ءِ نیمگ ءَ بازیں مدد ءُُ کمکے رستگ بلئے اے درائیں حال ءُُ گپ ردانت۔ حکومت ءِ نیمگ نہ اے مرتگیں مردمانی کمک ءُُ مدد کنگ بوتگ ءُُ ننکہ ٹپی ئیں مردمانی ۔ دومی دست ءَ سدانی حساب ءَ مردمانی لوگ ءُُ جاگہ ءُُ دلوت ءُُ کشار ہار ءَ برتگ انت ءُُ بازیں دمگاں مہلوک بے سر ءُُ سامانی ڈن ءُُ پٹانی سرا کپتگ انت ۔

اے بزگ ءُُ بے کسیں مہلوک ءِ حال ناں حکومت ءَ گپتگ ءُُ ننکہ راج دوست ءُُ چاگردی کارکنوکاں ۔ البت حکومت بہ بیت یا چاگردی کارکنوک یا چاگردی رسانک در ءَ گشادیں نبشتہ کار انگت 8 مار ءِ درچ ءَ گیشتر جنین آدمانی حقانی بڑ ءَ کپتگ انت کہ مردین پرچہ آہاں گشان سرادئینت ہمے نبشتہ کار اے وہد ءَ ہم بے حال انت کہ انوگیں ہار ءُُ ہیروپاں بلوچستان ءِ بازیں دمگاں زالبول ءُُ جنین آدم بے سروسامانی ، بے سپاہی ، بے مال ءُُ وردنی در پہ در کپتگ انت۔

بلئے اشانی واستہ کس ءَ دو دانک نبشتہ نہ کتگ ۔لہتیں روچ پیسر کیچ ءِ جہگیرظہور بلیدی ءُُ اکبر آسکانی ہمے جاہ جتگ کہ آحساب ءُُ کتاب ءَ انت کہ ہار آماچیں مہلوک ءِ مدد ءُُ کمک کنگ بہ بیت بلئے ترس ہمیش انت کہ ایشانی حال ہم چو میرانی ڈیم زدگیں مردمانی مہ بیت کہ مرایت میشاں ۔۔۔۔