وینزویلا ساؤتھ امریکہ ءِ یک کسانیں ملکے کہ ایشی ءِ آبادی کساس 32ملین ءَ گیش انت۔ اے ملک چوناہا تیل ءُُ آئل ءِ ردا دہمی (۱۰) مستریں ملک انت بلے اے وہد ءَ انچیں خانہ جنگی یے بندات انت ۔

کہ مہلوک شد لاپی ، گژنگی ءُُ بدیں سیاسی جاورانی آماچ انت۔لہتیں روچ ساری ملک ءِ اپوزیشن لیڈرگائیڈو ءَ وتارا صدر نامینتگ ات بلے اِشکنگ ءَ اے مرد ءَ را چہ ملک ءَ در کنگ بوتگ ءُُ پانزدہ سال ءِ پابندی جنگ بوتگ۔ اے وہداں ملک سیاسی بدیں چست ایرانی آماچ انت۔ میان استمانی ادارہ بزاں اقوام متحدہ ءِ سالینہ ’ ہیومن ڈوپلمنٹ انڈکس ‘(HDI) ءِ ردا 186ملکانی رم ءَ وینزویلا ءِ ہفتاد ءُُ ہشتمی (78) نمبر انت۔

دگہ ملکے نائیجیریا انت کہ اے وہدا دنیا ءِ دوازدہمی مستریں ملک انت کہ تیل پیداک کنت ءُُ دگہ ملکاں بہا کنت۔ بلے ایچ ڈی آئی ءِ رم ءَ اے ملک ءِ نمبر 157انت۔ اے ملک ہم غریبی ءُُ بے روزگاری ءِ زَد ءَ گور جتگ ۔

ایشاں بل افریقہ ءَ یک ملکے است انت کہ انگولا ءِ گشنت، اے ملک تیل ءِ علاوہ چہ نگرہیں تلاہ ءُُ سُہر (Diamond) ءَ مالا مال انت بلے گریبی ءُُ بزگی ءِ حال ایش انت کہ HDIءِ رم ءَ 149نمبرءَ انت (پاکستان ءِ نمبر 150انت)۔ حالانکہ انگولا تیل پیدا کنوکیں ملکانی رم ءَ چاردہمی مستریں ملک انت۔گوستگیں روچاں مئے ملک ءِ سر وزیر عمران خان ءَ قوم ءَ را گشت کہ کراچی ءِ کش ءُُ کراں مزنیں تیل ءُُ گیس یے درآہگ ءَ انت۔

آئی ءَ اے ہم گشت کہ مارا نوں وام ءُُ شام کنگ ءِ حاجت نہ بیت ءُُ مہلوک ءِ آسراتی ءِ وسیلہ ہمے تیل ءُُ گیس انت۔ اے درگت ءَ سوشل میڈیا ءَ بازیں عکس ءُُ ویڈیو ہم شنگ بوہگ ءَ انت کہ چوں پاکستان ءِ مہلوک سیر ءُُ آباد بوہگ ءَ انت۔ ہمنچو سیر ءُُ آسودگ کہ عرب ہم پریشان انت۔بلے بیا کہ حقیقت ایش انت کہ ہمے پاکستان ءَ یک بہرے است انت کہ اُودا گوستگیں شست سال انت گیس درآہگ ءَ انت۔ آ دمگ ءِ نام انت ڈیرہ بگٹی کہ بلوچستان ءِ یک ڈسٹرکٹ یے۔

ادے گیس سرجمیں ملک ءَ رسیتگ ءُُ چریشی ءَ نف گرگ بوہگ ءَ انت بلے بلوچستان ءِ مردماں وَ بلّ ڈیرہ بگٹی ءِ مہلوک انگت ءَ گریبی ئے آماچ انت۔ اے بلوچستان ءَ دگہ یک جاہے است انت کہ سیندک گشگ بیت ، سیندک چاغی ءِ دمگ ءَ انت، اداچین ءِ واجہ کار سُہر ، کاپر ءُُ ایندگہ تلاہ درکنگ ءُُ برگ ءَ انت بلے چریشی ءَ بلوچستان ءِ مہلوک زبہر انت۔ ہمے حال ریکوڈک ءِ گنت بلے چاغی ءِ مہلوک انگت ءَ چہ آسراتی ءُُ ازگاری ءَ زبہر انت۔

نوں اگاں کراچی ءِ کش ءُُ کرّاں یا پسنی گوادر ءَ تیل در کئیت شرّ،سہر ءُُ تلاہ بیت شرّ، ایش پہ پاکستان ءُُ بلوچستان ءِ مہلوک ءَ بے فائدگ انت اگاں چریشاں ادے مہلوک ءِ گژن ، غریبی ءُُ بزگی ہلاس مہ بیت۔ یک مشہوریں کتابے ءَ (Why nations fail) ءَ نبشتہ انت کہ یک راج ءُُ قومے ءِ وشحالی یا زوالی ءِ دارومدار آئی ءِ ادارہ آنی بدولت انت۔ اے ادارہ چاگردی انصاف، راجی گہبودی ءُُ وسائلانی لس مہلوک ءِ سرا حرچ کنگ ءِ ذمہ وار انت تاں دومی نیمگ ءَ چہ غریبیں مردماں ظلم ءُُ زوراکی، کرپشن ءُُ بے روزگاری ءِ ہلاسی ءَ محکمیں دیوال جوڑ بنت۔

اے کارانی کنگ ءِ سوب مندی ءَ راج ءُُ مہلوک آسودگ بنت ءُُ آہانی زند ءَ آسراتی رسیت۔ بلے اگاں اے ادارہ وتی کارانی ءُُ ذمہ واریانی پیلو کنگ ءَ ناکام بہ بنت گڈا اے سائل ءُُ وسائل یا زرّ ءُُ مال یا تیل ءُُ گیس ءِ گیشی ہچ کار ءَ نئیت ءُُ اشانی فائدگ کسّی بہر ءَ نہ کپنت۔