حدائی داتگیں داداں چہ یکے بنی آدم ءِ زند ءُُ زمان اِنت پمشکا ایشیءِ ہرحساب ءَ رکینگ الم اِنت ۔انوں لہتیں روچ بیت کہ کیچءِ بازیں دمگاں ڈینگی ءِ نادراہی کپتگ ۔ءُُ ایشی ءِ سوب ءَ انوں داں سے سد ءُُ پنجا مردم متاثر بوتگ ءُُ چار مردم بیران بوتگ ۔
اے نادرائی ءِ بنزہ چنائی ءَ وشیں آپ اِنت ءُُ کیچ وڑیں گرمیں ہندے ءَ اے مکسک بہہ زندگ بوت نہ کنت بلئے ہمے زوتاں ہور ءُُ بارانی موسماں وہدے سرجمیں مکران ءِ شیپ ءُُ کور ءُُ کنڈ ءُُ بیٹاں آپ کہ جل اِتا ءُُ گہرم جوڑ کتگ ۔چمے آپانی سبب ءَ اے مکسک ءَ ردوم زرتگ ءُُ کیچ ءِ دمگاں سرریچ روان اِنت۔اگاں ہمے زوتاں اے نادراہی ءُُ ا ے ڈینگی ءِ مکسک ءِ گر ودار کنگ مہ بیت داں اے تعداد چد ءُُ گیش شت کنت۔
پمشکا حکومتی مردمانی بائد اِنت کہ اے نادراہی ءِ گرءُُ دار ءَ ہرچند کہ بوت کنت۔ایکشن بزوریت ۔اے انچیں زوت رسیں نادراہی یے کہ دمان دمان ءَ سرجمیں ہند ءُُ دمگاں سر بوت کنت ۔ پمشکا گیش ءَ گیش ایشی ءَ را رکینگ ءِ وڑ ءُُ پیم لس مہلوک ءِ دیم ءَ آرگ بہ بنت دانکہ مردمانی زند رکینگ بہ بیت۔اول ہما کہ وش آپانی جاگہاں آوانی گر ءُُ دار بہ بیت ءُُ ہچ آپ ءَ را پہ پچی ءَ مئیل بہ بیت ۔
درائیں جاگہاں اے نادراہی ءِ رکینگ ءِ اسپرے کنگ بہ بیت ۔ میڈیکل ٹیم اڈ دئیگ بہ بیت ۔پرچکہ کیچ ءَ ابید ہم اے دگہ دمگاں کہ شہری آسرتی نیست اِنت آہود اے ٹیم بروت ءُُ اُد ءِ مردماں چہ اے نادراہی ءِ بابت ءَ سرپد بہ بیت ءُُ دارو ءُُ درمان دئیگ بہ بیت ۔ میڈیاءَ را بائد اِنت کہ درائیں روچ ءَ سیاسی دروگانی تبلغ ءِ جاہ ءَ انچیں جاہ سلامتی ءِ بابت ءَ مردمانی سوج ءُُ سر کنگ بہ بیت ۔ نادراہی ءِ دارگ ءُُ آرگ ہردو حداءِ دست اَنت بلئے پیشی مردماں گشتگ کہ حفاظت ءَ وتی جند ءِ پہریز سد در گہتر ءُُ شرتر اِنت ۔پمشکا اے نادراہی ءَ چہ رکینگ ءِ ہرحساب ءَ کہ بوت کنت ۔
اگاں سرکارءُُ حکومتاے بابت ءَ گامگیج مہ زورایت داں نادراہی ءُُ بیرانی ءَ گیشی اتک کنت ۔ چوکہ مکران ءُُ حاص کیچ یک گرمیں ہندے ءُُ اے ساہ دار گرمیں ہنداں زندگ بوت نہ کنت بلئے ایشیءِ اے ہندءُُ دمگاں زندگ بوہگ ءَ چہ بازیں جستے پشت کپیت کہ بوت کنت اے ساہ ءَ پہ زندگی ءَ گوں اے موسم ءُُ ماحول ءَ سان زرتگ ءُُ زندگ بوت کنت ۔
پمشکا ہما گپ شوہازگ بہ بیت کہ کجام سبب اِنت کہ اے ساہدار ءَ وتی زندمانی ءِ اے وڑ ءُُ پیم ءَ را بدل کرتگ ءُُ گرمیں ہنداں ہم بنی آدم ءِ زند ءَ تاوان دات کنت ۔ چوکہ ایشی ءِ بندات کیچ ءَ بوتگ ءُُ اگاں اے مرچی ءَ چہ گر ءُُ دار کنگ مہ بیت داں زوتاں مکران ءِ درائیں دمگاں سر بوت کنت۔پمشکاحکومت بائد اِنت اے چیز ءَ انچائی ءَ مہ زورایت ءُُ ایشی ءِ بابت ءَ زوتاں چہ زوت گامگیجاں دیم ءَ بیار ایت ۔
اگاں حکومت اے بزگیں قوم ءَ را دگہ چیزے اگاں دات نہ کنت داں ہمے استیں زندءَ وَ اے بزگیں راج ءَ چہ پچ مہ گپت ۔ دل ءَ پہ واجہ ءَ بدی مان نیست اِنت بلئے واجہ میرو مہ بیت ءُُ ایمن مہ نندیت ،پرچکہ اے انچیں نادراہی یے کہ ہرجاہ کپتگ آہود ءَ بیرانی الم ءَ بوتگ۔ پمشکا اے نادراہی ءِ مہلہی ءَ گرو دار کنگ بہ بیت چو مہ بیت کہ مرچی باندہ ءِ پداں یک بلائیں تاوانے سرا کنگ بہ بیت ءُُ رندءِ اپسوز ءَ را سیت ءُُ نپے گون نیست اِنت ۔درائیں دمگے مردمانی واہش اِنت حکومت زوت گامگیج بہ زوریت دانکہ ہچ وڑا مہلوک ءَ را تاوان رست مہ کنت۔