پیش ءِ بلوچاں گشتگ کہ’’ گپ ءَ حق ءِ بہ کن ءُُ لٹ ءَ پہ برات ءَ بوار‘‘،اے ملک ءَ وَ راستیں حبر مستریں گناہ اِنت ءُُ راستی ءِ پدرائیءَ کس نہ منّ ایت۔انچیں زلمے گوں کسان سالیں زہگاں بوہگ ءَ اِنت۔یک وَ بلوچستان ءَ پہ بلوچ زہگاں یک کتابے پہ درد واری ءَ نیست اِنت۔دومی ہما کتاب کہ برے انجیوز ءُُ برے سرکار ءِ نیمون ءَ کہ چھاپ بنت اول وَ ایشانی مواد زہگانی پیم ءَ نہ اَنت ءُُ اگاں جہدے بہ بیت کہ زہگانی پگر ءُُ زانت۔
ءِ حساب ءَ بہ بیت داں آوانی وانینوک پدا انچیں مردم اَنت کہ آ وت بلوچی ءَ سرپد نہ اَنت ءُُ بلوچی نزان اَنت ۔ انچوکہ اے دگہ زبانانی ہیل بری ءَ زبانزانت کار بندگ بنت ۔بائد اِنت کہ حکومت ہم بلوچی زبان ءِ وانینگ ءَ ہما مردم کہ بلوچی ءَ سرپد اَنت یاکہ ماسٹر ءُُ ایم فل اِش کرتگ اَنت آواناں زبانزانت ءِ حساب ءَ اسکولاں روان دئیگ ءُُ زہگانی وانینگ ءِ کار دئیگ بیت ۔
کالج ءُُ یونیورسٹیاں وَ ہما مردم اَنت کہ بلوچی ءَ سرپد اَنت ءُُ آواناں وتی ڈگری گون انت بلئے اسکولاں چون کنئے کہ یک استادے اردو،انگریزی،ریاضی ،معاشرتی علوم ،اسلامیات،سائنس ءُُ نوں بلوچی ءَ ہم وانینگ ءِ ذمہ واری ہمائی کوپگان اِنت آ بیچارگ چے چے وانینت کنت ۔ یک استادے کہ ستر زانوگر بہ بیت آ اے درائیں مزن مزنیں سبجکٹاں زانتکار بوت نہ کنت ۔
اگاں بوت نہ کنت گڑاں آ زہگاں چے ءُُ چتور وانینت ۔من ءَ یات اِنت مئے دور ءَ مئے اسکول ءِ استاداں زہگاناں مرگ ءُُ شیر گپتگ ءُُ آواناں پاس کرتگ ۔ وتی نالائقی ءُُ نازانتی ءِ چیر دئیگ ءَ نازاکیں زہگاناں کشتگ پہ لٹ جنگ ءُُ وڑ وڑیں سزا دئیگ ءَ کہ زہگے ہچبر آئی گپاں مہ کن مہ کنت ۔ اے پیمیں چاگردے ءَ چتور زانتکار ءُُ شیواریں زہگے ردوم زرت کنت ۔
نوں بلوچی زبان ءَ را اسکولاں رواج وَ داتگ ،چہ سرکارءِ نیمگ ءَ داں چار تبک ءَ بلوچی چھاپ کنگ ءُُ اسکولاں روان ہم دئیگ بوتگ بلئے نہ استاد بلوچی زان اَنت ءُُ نیکہ آئی ءِ طالب ءُُ نودربر ۔ حرام بات ہمے نالائقیں سرکار ءَ را کہ اگاں آ نوکیں بلوچی ءِ زانتکاریں استاد نہ دارایت آ ہمے استیں استاداں وَ ٹریننگے بہ دنت دانکہ وت چہ بلوچی ءَ سرپد بہ بیت۔بلئے سرکار ءَ را گوں اے چیزاں کار نیست اِنت چارتبک ءِ زہگے کہ اولی ءُُ دومی تبکی چیزاں ہم نزانت گڑاں دیمترا چون بیت ۔پمشکا پیشی سراں گشتگ کہ بلوچی ءَ بلوچے بزانت ۔
اے ملک ءَ سرکاری زبان اردو اِنت بلئے درائیں جاگہاں انگریزی کنگ ءُُ انگریزی ءَ را ارزشت ءُُ عزت دئیگ بیت کس اے اردو ءَ جست ہم نہ کنت گڑاں آملک ءِ قومی ءُُ علاقہی زباناں چون ارزشت دنت ۔اسکولانی نیمگ ءَ سرکا ر ءِ نادلگوشی ءِ سبب ءَ یک سرجمیں پدریچے برباد بوہگ ءَ اِنت ۔ بلوچ زہگے وہدے انٹر کنت نون زانت کہ دنیا ءَ چے بوہگ ءَ اِنت۔سائنسی وانگ آئی ءَ را چہ اولی تبک ءَ گون اِنت۔
بلئے آ کالج ءَ کیت انت نوں زانت کہ بائیو ءِ توسیپ اِنت ،کمسٹری ءَ چے وانگ بیت ءُُ فزکس کجام چیز ءِ نام اِنت۔اے پیم ءَ یک زہگے نقل کنت ءُُ پاس وَ بیت بلئے آئی آکیبت تہار اِنت ۔ چیزے زرداریں بلوچ اَنت کہ وتی زہگاں ڈنی ملکاں یاکہ ہمے ملک ءِ شرتریں کنڈے ءَ شرتریں اسکول ءُُ کالجاں روان دئینت دانکہ آوانی زہگ ءِ باندات رژنہ بہ بیت بلئے ہما کہ غریب اَنت آچے بہ کن اَنت ۔
اے بابت ءَ بائد اِنت سرکار ءَ دیری گامگیج بہ زرتیں بلئے حیف چہ کوریں سراں کہ رہشون اَنت ۔یکے وَ بائد اِنت کہ بلوچی ءِ سبجکٹ ءَ ایوک ءَ ہما مردم بہ وانینیت کہ ماسٹر آف بلوچی اِنت ۔ دومی ہمے کتاب کہ پہ بلوچی ءَ جوڑ کنگ بوتگ اَنت ایشانی ہم دوارچاری بہ بیت ءُُ درائیں سبجیکٹ دانکہ پرائمری ءَ ہند ی ءُُ علاقہی زباناں بہ بنت چد ءُُ پد درائیں کتاب انگریزی ءَ بہ بیت۔
اردو ءَ را یک زبانے ءِ حساب ءَ وانینگ بہ بیت ءُُ آئی ءِ نبشتہ کار ہم وانینگ بہ بیت بلئے زبان علاقہی بہ بیت۔دانکہ بلوچ زہگانی ہم باندات رژنہ بہ بیت ۔