نوں ما کائیں بلوچی ءِ نیمگ ءَ!گڈاں ما چاریں کہ بلوچی زبان ءِ دیمروئی ءِ نیمگ ءَ باز کم دلگوش کنگ بوتگ۔زبان ءِ ھاتر ءَ زیاتیں کار چہ مہلوک ءِ ذاتی جہد اں بوتگ انت(منی گپ ءِ مول مراد ہچبر اے نہ انت کہ ادارگانی کرد ہچ نہ بوتگ)۔
مہلوک ءَ جہد کتگ ءُُ کار دیم ءَ برتگ۔ زبان ءِ دیمروئی ءِ ھاترءَ سید ہاشمی ءِ بلاھیں جہد ے کہ آئی ءَ (سید گنج)لبزبلد جوڑ کتگ راست نبیسگ دیم ءَ آورتگ کہ چہ ایشی ءَ زبان ءِ کار آسان تر بوتگ بلئے حکومت ءَ ہچ گامگیجے نہ زرتگ۔ ما گندیں کہ چہ سید ءِ کار ءَ مکران ءِ دمگ زیات اثر مندانت۔ بلے جھالاوان، رخشان، سراوان، کوہِ سلیمان او ایندگہ دمگاں کارمرز نہ بیت۔ یا اودءِ مردم سیدءِ کارءِ بابت ءَ اینکس سرپد نہ اَنت۔ ایشی سبب یا گالوارءِ جیڑہ بوت کنت یا بوت کنت کہ اودءِ مردم آں سید ءِ کارءِ بابت ءَ سرپد نہ اَنت۔
پدا ما گندیں کہ بازیں چیز تنے وہدی رواج نہ گپتگ انت ءُُ بلوچی زبان ءِ جیڑہ ہما جاہ ءَ اوشتوک اَنت۔ زبان ءِ دیم روی ءِ ھاترءَ تنے وہدی چشیں گامگیجے چست کنگ نہ بوتگ کہ زبان دیم ءَ شت بہ کنت۔ ما گندیں کہ”ف“،”پ“ ءِ تنے وہدی جنگ ھلاس نہ بوتگ۔ چیزے نبشتہ کنت”فقیر“ ءُُ چیزے ”پکیر“۔۔ انچوش ”قصہ“ءُُ ”کسہ“۔۔ بازیں جاہ ءَ ”ح“ ءُُ”خ“ءِ جیڑہ ھلاس نہ انت۔ پدا ما گندیں ہر جاہ ءَ ہمے لفظ دگہ دگہ وڑ رواج گپتگ انت۔ مارا ھیال کئیت کہ آیا مئے کرءَ زبان زانت نیست یا کہ آ اے جیڑھاں جیڑہ سرپد نہ بنت۔
سائنس ءُُ ٹیکنالوجی ءِ دوراِنت۔ دنیا ءِ تہا نوک نوکیں چیز دیم ءَ آہگ انت۔ زبان مارکیٹ ءِ زبان جوڑ بوہگ ءَ انت۔ زبان ءَ را مارکیٹ زبان جوڑ کنگ ءِ ھاترءَ لینگویج کلاسز جوڑ کنگ بوہگ ءَ انت۔ بلکیں مرچاں ہر چیز آن لائن انت۔ ما گندیں کہ مہلوک وتی چیزاں آن لائن بہا کنت۔ آن لائن مارکیٹنگ ءِ زبان پاکستان ءِ توک ءَ اردو ءَ انت۔ بلئے بلوچی زبان ءَ را مارکیٹ ویلیو دئیگ ءِ ھاترءَ تنے وہدی ہمے کسانیں جیڑہ ھلاس کنگ نہ بوتگ انت کہ زبان ردوم بزوریت ءُُ مارکیٹ ءِ زبان جوڑ بہ بیت۔
یوٹیوب ءَ کار آسان کتگ کہ تو وتی زبان ءَ دیم ءَ برت کنئے۔ اگاں ما بچاریں کہ انگریزی ءِ یک لبز ے نبشتہ بکن ءُُ سرچ بہ کنئے تو چارئے کہ ہزارانی حساب ءَ لنک مئے دیم ءَ کئیت۔ پرچا کہ یکے آہاناں وتی زبان دیم ءَ برگی انت دومی آ وتی زبان ءَ چہ کاروبار ہم کنگءَ انت کہ یوٹیوب آہاں کلک ءِ سر ءَ مُزدنت۔ یکے آہانی زبان دیم ءَ روگ انت ءُُ دومی آچہ زبان ءَ مُز گرگءَ انت۔ یکیں تیرءَ چہ دو شکار کنگ انت۔
ءُُ تا وھد ے کہ تو پہ زبان ءِ دیمروئی ءَ شریں گامگیجے چست مکن ئے ءُُ سرپد مہ بئے کہ دنیا زبان ءِ ھاترءَ کجام گامگیجاں چست کنگ انت ءُُ ٹیکنالوجی ءَ کارمرز کنگ انت؟تنا وہدے تو زبان ءَ دیم ءَ برت نہ کنئے ءُُ نا زبان ءَ تو مارکیٹ ءِ زبان جوڑ کت کنئے ءُُ نہ مردم زبان ءَ نبشتہ کنگ ھیل کت کن انت۔ اے چیز قربانی لوٹ انت، کار کنگ لوٹ انت۔ بایدیں کہ بلوچی زبان ءِ کلاس بنگیج کنگ بہ بنت۔
زبان ءِ سرءَ مارکیٹنگ کنگ بہ بیت۔ زبان ءِ کلاسز آن لائن یوٹیوب چینل ءِ سرا اڈ دئیگ بہ بنت۔ انچوش کہ ورچوئل یونیورسٹی کنگ انت کہ یکرندے لیکچر کلاسز جوڑ کتگ اِش ہماانت کہ تنے وہدی مہلوک سکین زورگ ءَ انت۔ اے وڑیں کار ادارگ کت کن انت۔ بلوچ ءِ چم بلوچی ادارگاں سک اَنت۔
بلوچی اکیڈمی، سید ہاشمی ریفرنس لائبریری اے درگت ءَ یک شریں گامگیجے چست کت کن اَنت۔ پرچیا کہ گپ نوں کاغذ ءُُ قلم ءَ چہ دراتکگ نوں کمپیوٹر ءِ کی بورڑاں سر ِانتءُُ اے دور مقابلہ ءَ دورانت۔ بایدیں مقابلہ ءِ دورءَ بلوچی زبان بہر بزوریت ءُُ دیم ءَ بروت۔ دگہ زباناں چہ سکیں بزوریت۔ وتی آؤکیں نسل ءِ ھاترءَ یک شریں راہ یے پیداک بہ کنت۔ زبان وتی تام ءَ ہر کنڈ ءُُ دمگ ءَ تالان بکنت۔