بلوچستان دنیا ءِ لہتیں انچیں ملکاں شمار بیت کہ آئی مادنانی کچ ءُُ کیاس چہ یکے ءَ گیش اِنت۔ دنیا ءَ بازیں ملکے است کہ اوداں یک ءُُ حدائی مادن است بلئے آانچو ازگارءُُ آبات اَنت کہ آوانی گپ نہ بیت۔بلوچستان ءَ بازیں مادنانی استی ءَ پد ہم اے ملک ءِ جاور روچ پہ روچ حراب بوہان اَنت۔یک مستریں وئیلے کہ نوک بلوچستان ءَ مان کپتگ آ ورناہانی بے روزگاری اِنت۔
حکومت ءَ اے نیمگ ءَ اگاں دلگوش بدنت داں بازیں جیڑہ ءُُ جنجالے وت گیشوار بیت۔بلئے وائے من ءُُ وائے قسمت کہ نیست بادشاہ یے کہ درداں بہ ماریت۔یک دورے بوتگ کہ گشتگ اِش کہ بے وانندگ باز اَنت ءُُ وانندگ کم اِنت پمشکا بے وانندگ روزگار دئیگ نہ بنت بلئے نوں وَ جاور بدل اِنت کہ بلوچستان ءَ ناوانندگءِ کچ ءُُ کیاس سک کم انت ءُُ درائیں ورنا وانندگ اَنت۔ بلئے اے وانندگیں مردمانی پہ روزگاری ءَ سرکارءِ نیمگ ءَ ہچ رنگیں سوڑگے کنگ نہ بوتگ۔
یک دور ے اَت کہ مردماں سی ایس ایس ءُُ پی سی ایس ءِ چکاس دئیوکیں مردمانی کچ ءُُ کیاس سد ءُُ دوسد ءَ گیش بہہ نہ بوتگ ءُُ ہمے مردماں گیش چہ گیش وانگی بی اے بوتگ بلئے نوں جاور ایش اِنت کہ اے دوئیں چکاس کہ پاکستان ءِ مستریں چکاس اَنت ایشانی کچ ءُُ کیاس ہم دہ ہزار ءَ سر اِنت گوستگیں چکاس ءَ پی سی ایس ءِ مردمانی کچ ہپت ہزار بوتگ۔چریشی ءَ پدر اِنت کہ بلوچانی گورا وانندگیں مردمانی کیاس چنچو ک اَنت۔
بلوچستان ءَ نوں پوسٹ انچو کم کنگ بوتگ اَنت کہ کسان ءَ چہ کسانیں تریں پوسٹانی حاترا ہم ہزارانی کساس ءَ مردم وتی کاگداں جمع کناں۔اگاں حکومت ءَ اے جیڑگ ءِ بابت ءَ ہمے زوتاں اگاں گامگیج زورگ نہ بوت گڈاں اے کساس گیش بوہان بوت۔ حکومت روزگار ءِ گیش کنگ ءِ جاہ ءَ وڑ وڑیں بہانہ پہ بے روزگارانی دیم ءَ کاریت چوکہ جاہ یے گشت کہ ایکس پرئیرینس برے پروفیشنل ڈگری، برے عمر اے پیمیں بازیں بہانہ وَ حکومت ءِ گورا است بلئے پہ بے روزگاراں یک جوانیں سوڈگے گیشواری کت نہ کنت۔
انوں شاہ دربرجاہاں بی ایس پروگرام وَ پچ کنگ بوتگ بلئے پرے وانگی ءَ دگہ پوسٹانی جار جنگ نہ بوتگ اگاں پوسٹانی جار جنگ بیت داں آوانی کچ ءُُ کیاس کم بیت نوں اگاں پوست سے دانگ اَنت بلئے جمع کنوکانی کچ ءُُ کیاس ہزارانی حساب ءَ اِنت پمشکا میرٹ ءَ ہم سک برز کنگ بیت پمشکا درائیں مردم آ جاہ ءَ سر بوت نہ کناں۔پدا سفارش ءُُ زرداریں مردمانی وتی وتی سوڈگ جتا اَنت۔
اے جاوراں یک لس مردمے کہ وانگ ءَ اِنت آدلپروش بیت ءُُ بے راہیاں دور کنت رند احکومت ءِ گپ ہمیش اَنت کہ جاور حراب بنت،بے راہی ءُُ ناشری گیش اِنت۔اے دگہ ملکاں ہم بے روزگاری است انت بلئے اے کیاس ءَ نیست اِنت۔پدا پاکستان ءِ ڈولیں ملکے کہ اِداں کارخانہ ءُُ فیکٹری ہم نیست اَنت۔
پیشی ءَ وَ ایوک ءَ ہمے بی اے ءُُ ایم اے پاس بوتگ اَنت کہ پہ روزگاری ءَ وتی کاگداِش جمع کرتگ اَنت بلئے نوں اگاں کسے بلوچستان ءَ ایم فل ءُُ پی ایچ ڈی آن حساب بہ کنت اگاں ہزارانی حساب ءَ نہ بنت داں ہزارانی کچ اِش سرے الم کتگ۔ اگاں اے ملک ءَ ایم فل ءُُ پی ایچ ڈی بے روزگار اَنت گڑاں میٹرک پاس، ءُُ بی اے والا بائد گپ مہ کن اَنت۔