بلوچی زبان ءِ نامیگی شاعر ظفر علی ظفر ءِ بیرانی پہ بلوچ راج ءَ یک مزنیں تاوانے۔ظفر ءَ راستے کہ بلوچی ءَ را ایوک ءَ یک کتابے بکشاتگ بلئے ہمے یکیں کتاب ہزاران کتابانی کنڈ ءَ گپت کنت۔ ظفر علی ظفر ءِ کتاب ”ہمبوئیں دروت“ اولی بزاں 2005 چھاپ بوتگ ءُُ دومی براں چہ بلوچی اکیڈمی ءِ نیمگ ءَ 2016 ءَ چھاپ کنگ بوتگ۔کتاب ءِ درستی 42 شعر
اَنت ءُُ کتاب ءِ درستی 144 تاکدیم اَنت۔ انچو کہ درائیں مردم سہی ءُُ سرپد اَنت کہ ظفر علی ظفر ءَ را دستونک ءِ بادشاہ گشگ بیت ئئُُ اے کتاب ءَ ہم درائیں دستونک ہوار اَنت۔
کتاب ءِ نامدات ”میجر جمیل دشتی ءِ نام ءَ اِنت“ ءُُ آئی ءِ جہل ءَ نبشتہ اِنت ”بہ عدو فولاد بہ یاراں حریر“۔کتاب ءِ پیش گال ءِ نبشتہ کنوکاں چہ علی عیسیٰ،بشیر بیدار،عبدالصبور،مقبول انور ءُُ بیگل محمد بیگل ہوار اَنت۔اے درائیں پیش گالاں ابید کتاب ءَ را دو گلدار ہم ہوار کنگ بوتگ کہ ساری ءَ ہوار نہ بوتگ انت۔ چریشیاں اولی گلدار ءِ نیاد ءَ جی آرملا،علی عیسٰی،ءُُ مجید بلوچ گون اَنت ءُُ دومی گلدار بلوچی ءِ سہ ماہی تاک کہ نوں اے تاک بند اِنت بزاں ”درد“ایشی ءِ شونکار اے آردا د اِنت ہمیشی ءِ نیمگ ءَ چہ گرگ بوتگ۔
اے بلوچی ءِ اولی شعری کتاب اِنت کہ اِداشعرانی پجی ءَ عکس اوں دئیگ بوتگ اَنت۔اے کتاب ءَ سرجم ءَ ہشت بہر اَنت ءُُ ہشت عکس دئیگ بوتگ اَنت۔اے بہری آئی ءَ حساب ءَ نہ اِنت چوکہ ہمک چار ءُُ پنچ شعر ءَ پد یک عکسے ءُُ پدا چار ءُُ پنچ شعراں پددگہ عکسے ءُُ ہمک عکس ءِ دیم ءَ یک شعرے چوکہ
دل بلوریں مندگ انت پہ تژنے ءَ ترندیں ءُُ تو
مشتکے دست ءَ کتگ پاداں گرانئے پرچیا؟
کتاب ءِ اولی تاکدیماں بلوچی ءِ مزن نامین شاعر واجہ مبارک قاضی ءِ گالاں دلگوش کن انت کہ آ ظفر علی ظفر ءِ بابت ءَ چے پیمیں حیال دار ایت چریشی ءَ و ت ظفر ءِ کد چماں آشنا بیت۔قاضی نبشتہ کنت کہ
”ماکہ بندات کتگ گڑا ما ماراتگ کہ غزل ءِ بادشاہ ظفر انت۔ بلوچی ءِ ھمک عمر ءَ بگر ے ءُُ ایر بیائے تہ ھر بلوچ ءِ دپ ءُُ دل ءَ ظفر ءِ غزل چو بینگ ءَ ایرریچ ایت۔ منی واستہ اے مہربانی یے کہ من ظفر پہ چم ءُُ دل وت دیستگ۔زندگی مبارک ءَ ھچ نام ءُُ نسب نیست بلئے ظفر زندگی ءِ جھگیر انت (ترجمان)انت۔“
مبارک قاضی
کتاب ءِ اولی تاک ءَ ظفر علی ظفر ءَ بھگت کبیر داس ءِ اے شعر یا گال داتگ
گؤ دھن،کچھ دھن،رتن دھن کان
جب آوے نتوش دھن،سب دھن دھور سمان
کتاب ءِ گڈی تاکدیم ءَ بیگ محمد بیگل ءِ پیش گال انت کہ آئی ءَ انگریزی پہ اے کتاب ءَ نبشتہ کتگ۔ بلئے اداں چھاپ کار ءَ رد کتگ اول وَ اے اولی تاکدیماں کیت ءُ دومی ایشی ءِ انگریزی چہ چپ ءَ بندات بیت بلئے کتاب ءَ چہ ایشی ءَ را چو اردو ءِ رنگ ءَ راست ءَ بندات کتگ۔ کتاب ءِ عکس ہما انت کہ اولی براں بزاں اولی چھاپ ءَ انت۔ ءُُ لہتیں لبزانی ردی است انت امیت انت کہ آوکیں چھاپ ءَ اے ردی درکنگ بنت۔بیگ محمد بیگل ءِ اے گپ ءَ گوں وتی نبشتانک ءَ آسر کناں کہ
After passin away of the great masters of modern Balochi Poetry like Unqa,Syed and Murad now Zafar ali Stand out as a leadiing poet.