روزگاری جیڑہ ایوک ءَ بلوچستان ءِ جیڑہ نہ اِنت بلکیں درائیں پد منتگیں ملکانی جیڑہ اِنت۔اے ملکاں اے جیڑہءِ بابت ءَ مدام تران وَ کنگ بوتگ ءُُ حکومتی مردماں مزن مزنیں کوہ پروشتگ اَنت بلئے کار ءِ جست بہ بیت داں یک گامے اوں دیمروئی نہ بوتگ۔ بلوچستان ءِ نوکیں حالانی پداں بلوچستان ءَ بے روزگاری ءِ کچ ءُُ حساب ءِ ہمے رنگ اِنت کہ سنگے لیٹین چار بے روزگار درکیت۔ تب زانتانی گشگ اِنت۔

کہ درائیں جنگ ءُُ جیڑہانی بنزہ ہمے بے روزگاری اِنت ءُُ نیکراہی کتاباں ہم نبشتہ اِنت کہ”خالی دماغ شیطان کا مکان“اے گشتن ءِ مول ءُُ مراد ہمیش اِنت کہ مردم اگاں ہشک حدا نندایت داں الم ءَ آئی دل ناشری یے کنت،پمشکا عہدی بلوچاں گشتگ کہ ہشکیں نندگ ءَ ناہ گڈگ کنگ،اے گپ ءِ مانا ایش نہ اِنت کہ مردم ناہ گڈگ بہ کنت بلکیں ایشی ءِ پژدر ہمیش اِنت کہ وتی حالی ایں وہد ءَ پہ سیت بکشیں کارے ءَ بدئے۔

بلوچستان ءَ بیزوگاری وتی گڈی سیمسراں سر انت ہما ورنا کہ وتی وانگی ایش آسر کتگ ءُُ ڈگری اش گون اَنت ءُُ دفتر پہ دفتراَنت بلئے روزگار نیست اَنت پمشکا ہمے نودربر سرے پہ نشہ ءَ کپ ایت یاکہ دگہ حراب کاریاں گون کپ اَنت۔حکومتی مردمانی اولی ءُُ مستریں ذمہ واری انت کہ وتی راج ءِ ورناہاں روزگار بدینت پرچکہ یک راج ءِ مہکم تریں بہرگ آئی ورنا اَنت۔انوگیں جاور بلوچستان ءِ ہمیش اِت کہ نوکریانی جار وَ دائم ءَ،ایکسپریس،جنگ،آزادی،مشرق ڈولیں روتاکاں دئیگ وَ بنت بلئے درائیں مردم سرپد اَنت کہ پوسٹ پیسر ءَ بہر ءُُ بانگ کنگ بوتگ اَنت۔

ایوک ءَ زر ءِ یکجاکنگ ءِ اے مکر ءُُ ہنر اَنت،داتگیں پوسٹ دائم ءَ یک ءُُ دو بنت ءُُ چالان ءِ جم کنگ ءِ زر یک ہزار ءَ بگر داں دو ہزار کلدار بنت ءُُ ہمے پوسٹ ءِ جمع کنوکیں مردمانی کچ پنچ ہزار ءَ بگر داں دہ ہزار ءَ برز اِنت۔نوں وت حیال بہ بیت حکومتی مردماں کہ دو پوسٹءُُ پنچ ءُُ دہ ہزار مردم؟؟؟؟بازبراں چوش بیت کہ سبجکٹ وائیز پوسٹ و َ کیت بلئے جہل ءَ اے اوں نبشتہ بیت کہ دو سال ءَ چہ پنچ سال ءِ کارءِ تجربہ داریں مردم پکار اِنت۔

نوں یک مردمے کہ بے روزگار اِنت آ چہ کجا کار ی تجربہ ءِ سرٹیفکٹے کاریت چمداں چہ سفارش ءُُ زر ءِ کارو بارءِ بنگیج بیت ءُُ ہما مردماں کہ وت حکومتی مردم است یاکہ زردار اَنت آ وَ انگت ءَ وڑے نہ وڑے ءَ وتی مردماں روزگارے پٹ انت دینت بلئے گارانت سدو ءُُ جاڑیں جنکاں۔۔۔۔حکومت بائدیں اول روزگارءِ گیشاں چہ گیش جاہ گشاد بہ کن اَنت دانکہ بے روزگاری اگاں ہلاس نہ بیت داں کمتر بہ بیت ءُُ چوش ہم نہ اِنت۔

کہ روزگاری جاہ ءِ جند نیست جاہ وَ است ءُُ باز اِنت بلئے وت ہمے حکومتی کار گشاد نہ لوٹ اَنت۔پمشکا گش اَنت کہ دُز اگاں واجہ کار ءِ جند انت داں دُز ءَ میار گون نیست“۔ یک وہدے بوتگ کہ پولیسی ءُُ ماسٹری پوسٹاں درستاں گیشتر مردمانی فارم ءُُ کاگد جمع بوتگ اَنت ءُُ ہمے پوسٹاں گیشتر مردمانی رش بوتگ بلئے نوں وَ کمپیٹیٹو چکاس چوکہ پی سی ایس ءُُ سی ایس ایس وڑیں چکاساں ہم مردمانی رشی اِنت۔

داں سال دو ہزار ءَ آدیم اگاں کسے ہمے کمپیٹیٹیو چکاسانی چارگ ءَ بہ کنت داں آ زانت کہ آ وہد ءَ چکاس دئیوکیں مردمانی کچ سد یاکہ دو سد ءَ گیش نہ بوتگ بلئے نوں ہمے کچ ءُُ کساس دہ ءُُ دوازدہ ہزار ءَ داں سر بوتگ انت۔انوگیں بزاں 2018 ءِ پی سی ایس ءُُ سی ایس ایس ءِ چکاساں مردمانی کساس شش ہزارءَ بگرداں دوازدہ ہزار بوتگ ءُُ پوسٹانی کچ ہمک دمگ ءِ بہرگ ءَ چار ءُُ شش بوتگ۔
نوں یک تالے آرت ءَ چنت چانگ درکیت۔ اے یک مزنیں جیڑگے ءُُ اے کچ ءُُ کساس ہمک سا ل گیش بوہان اِنت اگاں حکومت ءَ اے نیمگ ءَ زوت دلگوش نہ دات نہ گپ انوں انگت دست ءَ پدا چہ دستءَ درکیت۔