وہدے گوستگیں سال ءَ سینٹ ءِ چئیرمین چہ بلوچستان ءَ نامینگ بوت گڈا بنجاہی واکداراں ہوار بنجاہی ءُُ مزنراجی پہنات داریں راجمانی گلاں ہمے گپ دیم ءَ آورتگ ات کہ سینٹ ءِ چئیرمین بلوچستان ءِ اے حاترا حق انت کہ بلوچستان پاکستان ءِ پد منتگیں دمگ انت اگاں سنیٹ ءِ چئیرمین بلوچستان ءَ دیگ بہ بیت گڈا بلوچستان ءِ بازین جیڑہ یے وت گیش و گیوار بوت کنت۔

چرآئی ءِ سوب ءَ بلوچستان ءِ سینیٹر وتی راجی ءُُ دمگی جیڑہاں جوان تریں وڑے ءَ دیم ءَ آورت کن انت بلئے ہنچو کہ بلوچستان ءَ بازیں لیڈر ءُُ رہشونانی لیکہ انت کہ بلوچستان ءِ مردم کجام ہم ادارگے ءَ بہ بنت آہانی گپ ہچ وڑا گوشدارگ نہ بیت ملک ءِ مزنیں واکدار ہما کن انت کہ آہانی دل! بلے پیری سینٹ ءِ چئیر مین واجہ صادق سنجرانی ءِ مکران ءِ گروک (بجلی) ءِ جیڑہ ءِ سرا گوں ایران ءِ سفیر ءُُ کیسکو ءِ واکداراں گوں گپ و تران کتگ ات اے بابت ءَ وشیں حال ایش ات کہ گروکءِ بنجاہی وزیرءِ ملک ءَ ساڑی نہ بوہگ ءِ سوب ءَ آئی ءَ گروک بنجاہی سیکریٹری لوٹ اتگ کہ اے وہد ءَ مکران ءِ سنیٹر کہدہ بابر ہم ساڑی بوتگ کہ آئی ءِ دیم ءَ اے گپ ءُُ تران بوتگ انت کیسکو ءِ واکداراں سدکی داتگ کہ 17 گھنٹہ مکران ءَ گروک پجاریں انت۔ بلئے مکران ءَ حالانی رد ءَ انگت گروک ءِ جاور گہتر نہ بوتگ۔

اے وہد ءَ گروک ءِ گنترین جاور مکران ءَ انت ءُُ دومی دست ءَ ملک ءِ گرم تریں دمگ ہم مکران انت کہ اودا گرمیءِ حد کہ54 سینٹی گرڈ ءَ کیت اگاں اے گرم ءُُ جلءَ گروک مہ بیت گڈامردمانی حال چی بیت؟ اے گپ ءَ حدا زانت یے مکران ءِ گرم جتیں مہلوک۔اے بابت ءَ بائدیں سنیٹ ءِ چئیرمین بلوچستان ءِ جہگیری ءِ حق ءَ ادا بہ کنت ءُُ بنجاہی واکداراں کھڈن بہ کنت پرچکہ مکران ءَ گروک چہ پاکستان ءَ نہ روت بلکیں ایران ءَ کیت ءُُ ماں ایران ءَ گروک ءِ ہچ وڑیں کمی نیست۔

دومی سنیٹ چئیرمین اے گپ ءَ بزانت کہ اگاں مکران ءَ نیشنل گرڈ ءَ گوں ہوار کنگ بوت گڑا مکران ءِ انوگیں ہمے نیم شلونگیں گروک ہم دست نہ کپ ایت پرچکہ پیسرا بنجاہی حکومت ءِ غیر منطقی دلیل ایش انت کہ کس ءَ آئی ءِ پیداک کنگ ءِ سرا گروک نہ رس ات۔ اے وہد ءَ بلوچستان پیسرا چہ 24 سد میگاواٹ گروک پیداک کنگ ءَ انتءُُ بلوچستان ءِ سرجمیں لوٹ ایوک 14سد انت۔وہدیکہ بلوچستان ءَ اے وہد ءَ کہ چہ ہزار ءَ کم میگاواٹ گروک دئیگ بوہگ ءَ انت۔

اگاں اے وہد ءَ ہم بنجاہی حکومت وتی غیرمنطقی دلیل، جاہلی ءُُ تعصب ءَ یلہ بدنت گڈا بلوچستان کہ دنیا ءِ گرم تریں دمگاں ہوار انت اودا گروک ءِ کمی نہ بیت بلئے بنجاہی حکومت ءِ دلیل ایش انت کہ درائیں پیداک بوتگیں گروک یکبرے گوں نیشنل گرڈ ءَ ہوار کنگ بہ بیت ءُُ رند ءَ بہر ءُُ بانگ کنگ بہ بیت پدرا انت کہ گروک ءِ بہر ءُُ بانگ کنوکانی سیادی گوں بلوچستان ءَ نہ انت پمشکہ آ ہچبر بلوچستان ءِ حق ءَ گپ نہ کن انت۔

نوکیں لیب اے بوہگ ءَ انت کہ مکران ءَ گوں نیشنل گرڈ ءَ ہوار گیجگ ءِ گپ بوہگ ءَ انت اگاں یکبرے مکران ءِ دمگ ءِ گروک گوں نیشنل گرڈ ءَ ہوار کنگ بوت گڈا اے گروک ءِ حال بلوچستان ءِ 2ہزار ءُُ4سدیں گروک ءِ وڑا بیت ءُُ بنجاہی حکومت یکبرے پدا گوں غیر منطقی دلیل ءَ بلوچستان ءِ سرپدیں ئیں ءُُ زانتکاریں راج دوستاں سرپد کن انت کہ”نوں اے وڑ انت کہ پیسر ءَ گروک نیشنل گرڈ ءَ ہوار کنگ بیت گڈا پدا درائیں دمگاں آبادی ءِ حساب ءَ بہر ءُُ بانگ کنگ بیت پدابلوچ راج دوستیں رہشون ہنچو شیوار انت کہ اے وڑیں مشکل ءُُ گرانیں گپاں دمان ءَ سرپد بنت ءُُ درک بنت پہ بلوچ مہلوک ءِ سرپد کنگ ءَ کہ ”بچار ات شما چونیں جاہل ات کہ اے وڑیں گپے ہم شمئے سمجھا نئیت“۔

پمشکہ اے سنیٹ ءِ چئیرمین صادق سنجرانیءِ ذمہ واری انت کہ یکے بنجاہی حکومت ءَ اے گپ ءَ سرپد بہ کنت کہ ہرچ گروکے کہ دمگے پیداک کنت یکبرے بائدیں آئی ءِ جند ءِ زلورت پورا کنگ بہ بیت پرچکہ دنیا ءَ اے یک بیپاری حقے ءُُ دمگ ءِ زلورت ءِ پورا بوہگ ءَ پد نوں سرتکگیں گروک نیشنل گرڈ ءَ دئیگ بہ بیت۔

دومی ایش کہ اگاں مکران نیشنل گرڈ ءَ ہوار کنگ بیت گڈا بنجاہی حکومت ءَ اے حق نیست کہ آ ایران ءِ گروک ءَ نیشنل گرڈ ءَ ہوار بگیج ایت ۔سنیٹ ءِ چئیرمین صادق سنجرانی دگہ ذمہ واری یے ایش انت کہ بائدیں وتی جندءِ دمگ دالبندین ءَ ہم چہ ایران ءَ گروک پجارینگ ءِ منگ نامہ یے ءِ واستہ گامگیج بزورایت۔