نزاناں اے وہد ءَ کوئٹہ۔کراچی یا کراچی۔کوئٹہ مسافر دل ءَ چے بند انت ءُُ سفر کن انت پرچکہ نوں اے دگ راہ ءُُ کشکے ءَ گیش مرگ ءِ چہرے ءِ چہر ءَ جنت۔ آدینگ ءِ روچ ءَ مستونگ ءِ کر ءَ دگہ یک دگی ویلے ءَ 19 مردم ٹپی بوتگ انت۔ گمان انت کہ اے ماہ ءِ اے اولی ویل انت کہ چریشی ءَ ہچ مردم بیران نہ بوتگ بلئے ماہ وتی ہپتگے ءَ پیش ءِ شونگالءَ نبشتہ کتگ ات کہ اے ہما بدبحتیں دگ انت گوستگیں ہپتگءِ ہپتیں روچاں یک روچے ہم کزا نہ بوتگ کہ مردم ءِ دل تسلہ بوارت کہ مرچی اے دگ ءِ سرا ہچ بدی ءُُ بیرانی نہ بوتگ۔

یکم جولائی ءَ بگر داں روچ مرچی کہ(باندات ءِ ہم بدگمانی ءُُ بدزبانی یے نہ بیت پرچکہ بلوچیءَ مرگ دعایے نہ انت) بزاں اے چاردہ روچاں ہچ چشیں روچے نہ گوستگ کہ اے دگ ءِ سرا ویلے نہ بوتگ۔ شرپ مندیں وانوکاں! یک گپے ءَ بہمنتگ ءُُ حیراناں کہ ملک ءِ کجام کنڈے ءَ یک مردمے بیران بہ بیت گڑا ملک ءِ کماشءُُ مزن وزیر ءِ نیمگ ءَ زلور دلپدری ءِ درشانی ءُُ حالے کیت بلئے یا پہ ارادہ یا پہ ناسرپدی اگاں اے دگ ءَ یک روچے دہ مردم بیران بہ بیت نباکنئے کہ سروزیر، گورنر بلوچستان یا پاکستان ءِ کماش یا پاکستان ءِ مزن وزیر ءِ نیمگ ءَ دلپدردی حالے رسانک ءَ شنگ بہ بیت،پرچہ؟ اے مردم نہ انت؟یا چہ ملک ءِ مزنیں واکدارانی نیمگ ءَ سوڈگ کنگ بوتگ کہ دگ کراچی۔کوئٹہ، کراچی۔ مکران پہ مرگ ءِ ساز ءِ سازینگ ءَ جوڑ کنگ بوتگ انت۔ پرچکہ بازیں مردمانی گشگ ءِ ردا بلوچستان ءَ ناشری ءُُ طالبانی دست ءَ ہنچو مردم بیران نہ بوتگ ہنچو کہ بلوچستان ءِ ایوک ءَ ہمے کراچی ءِ دگ ءِ سرا بوتگ۔

گپ ایش انت کہ 5سد کلومیٹر سڑک ءِ دوبندی جوڑ کنگ ہنچیں بلائیں جیڑہ ءُُ گرانیں کارے کہ ہچ وڑا بندگ بوت نہ کنت؟ اگاں بنجاہی حکومت اے بابت ءَ گامگیج نہ زورایت گڈا بلوچستان ءِ راج دوستیں گل ءُُ رہشون پرچہ بے ترک ءُُ توار انت؟ آہاں کئی بیم ءَ ایر موش کتگ؟، بلوچ بازیں راجی رہشون ہما انت کہ وت یک وہدے ملک ءِ ”روڑاسینڈنگ کمیٹی“ ءِ چئیرمین بوتگ انت آیا آ وہد ءَ آہانی سما کور بوتگ کہ اے د گ ءَ بے کسیں بلوچ مرگ ءَ ءُُ گار بوہگ ءَ انت۔

اے تورناکیں جاور ءَ ادارگ ءِ گمان ہمیش انت کہ اے دگ ءَ بے گناہیں مردمانی بیرانی سوب ہمیش انت کہ بلوچ راج دوست بے ترک ءُُ توار انت اگاں یک نیمگے اے دگ ءِ سرا بیران بوتگیں مردمانی ڈوہ دار بنجاہی حکومت انت گڈا دومی نیمگ ءَ اشانی کوشءَ بلوچ راج دوستانی مزنیں دستے ہوار انت راج دوست ہنچو کہ سینٹ ءِ چئیرمینی ءِ باہند ءَ ہدوناک انت اگاں ہمے وڑا ے دگ ءِ بندگ ءُُ جوڑ کنگ ءَ ہدوناک بوتین انت گڈا اے 5سد کلومیٹرءِ دگ دیری دو بندی جوڑ بوتگ ات ءُُ مہلوک چہ وتی دوستیں کس ءُُ عزیزاں زبہر نہ بوتگ ات۔

ساچینک اے سرپد بیت کہ اے وہد ءَ چہ سینٹ ءِ چیرمینی ءِ چست ءُُ ایراں مستریں جیڑہ کراچی – کوئٹہ دگ ئیگ انت۔ بائدیں بلوچ راج دوست ہنچو کہ سینٹ ءِ چئیرمینی ءَ دلاپ ءُُ ہدوک انت ہنچو پہ بلوچ ءِ مرگ ءُُ بیرانی ءَ دلپدرد ءُُ دل تپرکہ بہ بنت ءُُ اے وہد ءَ سینٹ ءَ یلہ بدئینت ءُُ ہمے دگ ءَ بندگ ءُُ جوڑ کنگ ءِ سوڈگ ءَ بکن انت پرچکہ چدو دیم ہمے راجی رہشونانی جند ءِ چک ءُُ زہگاں ہم ہمے سڑک ءُُ دگانی سرا سفر کنگی انت۔ اگاں راج دوستاں مہلوک ءِ سرا بزگ نہ کنت وتی جند ءِ چکانی سرا وَبہ کنت۔