بلوچ ہزاراں سال یک کوہنءُ کدمیں ءُ ُ ازگاریں دودءُُ ربیدگےءِ واھند اِنت، یک شاھگانیں زمینےءِ واجہ اِنت ءُ مروچی کہ اے دمگءَ بزاں سینٹرل ایشاءِ ھرچ راجے است بلوچ اشانی تہءَ کوہن تر ھساب کنگ بیت بلئے بدبہتی ایش اِنت کہ راجءَ را تنیگتہ الکاپیں راجدپترے نیست۔ بلوچ تاریخءِ بابتءَ مروچی کہ ھرچ گپے جنگ بیت آ برصغیرءِ وھداں ادءَ اتکگیں انگریز فوجی کماندارءُُ آئیءِ ایجنٹانی نویستگین اَنت۔
آہاں زاھریں ھرچی کہ بلوچ راجدپترءِ بابتءَ نوشتہ کتگ گڑا وتی جندءِ نپءُ سیتءِ ھاترا کتگ۔ نوں ھبر اش اِنت کہ بلوچءِ پدریچ مروچی ھم پہ وتی جندءِ زبان، ربیدگ،زمینءُ ُ راجدپترءِ شوہازگءِ ھاترا ھما انگریز نبشتہ کارانی کتابءُُ نکانانی چمداراِنت کہ اے شاھگانیں زمین مدام آہانی پادانی چیرءَ لگتمال بوتگ۔ ادءَ چے اے جست پاد کئیت کہ ما پرچہ درامدانی نبشتگیں تاریخءِ سرا بیسہ کنیں۔۔؟ اشیءِ مستریں سوب وَ ایش اِنت کہ بلوچءَ را وتءَ چشیں راجدپتر نویسے بیتگءُُ ناں کہ است، بازیں بلوچ نبشتہ کاراں بلوچ تاریخءِ بابتءَ نبشتہ وَ کتگ بلئے آہانی ھبرانی تہءَ دگری است اَنت۔اگاں مرچی بلوچ وتی جندءِ نویستگیں تاریخءَ پٹگءُ درگیجگ بہ لوٹیت گڑا آ تہنا اہدی شعرانی تہہءَ است اِنت۔
یک زمینءُُ قومےءِ تاریخ کہ تچکءُُ راست مہ بیت گڑا الم آ راجءِ پدریچ ھوں اے گپءَ زانت نہ کنت کہ منی بامرد کئے بوتگ۔۔۔ پہ اے زمینءِ رکینءُ ُ راجی یکجاہیءَ کئےءَ وتی سَر داتگ اَنت۔۔۔ کئے لگوراِنتءُُ کئے اے زمینءِ ھکیگیں وارث اِنت۔
مرچی گپ اتکگءُ ُ سر بوتگ کہ بلوچ ءِ پدریچ چاکرءُُ گوھرامءَ وتی راجی بامرد لیک اَنتءُُ اے گپءِ گشگءَ دم نہ براَنت کہ ما چاکرءِ اولادیں گوہرامءِ دلءِ بندیں۔
نوں اے جیڑگی اِنت کہ چاکرءُُ گوہرامءِ بامردی ءِ کسہ چے اِنت؟ چاکرءُُ گوھرامءَ چی واستہ جنگ کتگ۔۔۔؟ گوں کئےءَ جنگ اِش کُتگ۔۔! اے جنگ ءِ داستان گوہرءِ ھِراں چہ بندات بیت۔سی سالءَ داں یک ھونءُُ ارسانی توپانے بلوچ سرزمینءَ مانپوشیت کہ چریشیءِ سوبءَ دوئیں نیمگاں ہزارانی کچءَ بلوچ مِر اَنت ءُُ گڈ سرءَ چاکر کہ اے زمینءِ ھاکم بیتگ آئیءَ اے زمینءِ سینگءَ یک گزے زمین ھوں نہ بیت۔
بلوچ ءِ زمینءَ اگاں مروچی مردم پہ ڈگارےءِ بندءِ سرا مڑ اَنت وت کوشی کن اَنت گڑا اے رواج چہ چاکرءُُ گوھرامءَ پیداگ اِنت۔ چاکرءُ ُ گوھرامءَ اے راج بہرءُُ ٹکرانی تہءَ شنگینتگ۔ راجدپترءِ تاکانی تہءَ اے گپ نکش اِنت کہ ھرچ دمگءِ بادشاہ وتی زمینءَ رکین ایتءُُ اشیءِ ھمراہیءَ وتی زمینءَ را پراہءُُ شاھیگان کنگءِ جہدءَ کنت۔ بلئے چاکرءُُ گوھرامءِ چشیں کارنامگے است؟ اگاں است گڑا دہلیءِ جنگ اِنت۔وھدے رندءُُ لاشار یکجاہ بنتءُُ دہلیءِ تھتءَ وَ گر اَنت بلئے آہانی وت ماں وتی ناتپاکیءُُ کینگءِ سوبءَ یک فتح کتگیں دمگے پدءَ چہ آہانی دستءَ رؤت۔
سکندراعظم چہ یونانءَ درکپیتءُُ مکرانءَ کئیت بلئے چاکرءُُ گوھرامءِ کرد اش اِنت کہ یکیں دہلیءِ تھتءِ سرا مِڑ اَنت ءُُ آئیءَ یل کن اَنت۔ گوھر یک بے وسیں زالے بوتگ،آ ھمے زمینءِ مردم بوتگ بلئے بیا کہ وتی جندءِ زمینءَ آئیءِ ڈاچیاناں چراگجاہے پہ نسیب نہ بیت۔گوھرام آئیءَ وتی ھلکءَ گلینیت۔ھمے چاکرءُُ گوھرام کہ بلوچءِ ہزاراں ورناہانی ھونءِ ریچوک اَنت ھمشاں ما وتی رھشون گشیں۔۔۔؟
منءَ ھئیرانی ھمے گپءَ بیت کہ من گوستگیں روچءَ سوشل میڈیاءَ ھمے تران ایرکتگ اَت کہ چاکرءُُ گوھرام مئے بامرد نہ اَنت گڑا مئے راجءِ زانندگءُُ سرپدیں ورناہانی پسو ھمیش اَت کہ “اگاں چاکرءُُ گوھرامءَ ھرچی کتگ بلئے بلوچءِ بامرد اَنت ءُُ ھماھانی سوبءَ مارا یک پجارے اَست “
مارا کجام پجار داتگ اش۔۔؟ ھمے کہ بلوچ ناتپاکیں راجے۔۔۔؟ ھمے پجار اش داتگ کہ بلوچ انچیں دلیرءُُ توانائیں قومے کہ گوں وتی جندءِ براتءَ داں سالءَ جنگ داشت کنت۔۔۔۔!! بلوچ ورناہاں اے ھبر یاد بہ بیت کہ گوکپروشءِ کنڈگءَ کئے گوں انگریزاں جنگ کنت۔۔ءُُ پہ بندیانی رکینگءِ ھاترا کئے میرسُہرابءِ زُلمانی دیمءَ اوشتیت ءُُ بلوچ نوجواناں اے ھوں زانگ المی اِنت کہ میرشاھو کئے بیتگ۔۔؟ بلئے بژن کہ بلوچءِ بچ تنیگتہ اے زہنیتءَ چہ درنیاتکگ کہ ما چاکرءِ اولادیں ءُُ گوھرامءِ دلءِ بندیں۔۔۔!
بائدگیں بلوچ تاریخ نویس وتی راجدپترءَ پد بہ جن اَنتءُُ اے گپءَ پدر بکن اَنت کہ بلوچ سرزمینءَ برات کوشیءِ بن ھشت کئےءَ ایر کتگءُُ بلوچءِ زمینءِ ھاترا کئے درامدانی دیمءَ اوشتاتگ۔۔!