نبشتہ رہبند ءِ جیڑہ مرچیگیں جیڑہ یے نہ اِنت بلئے اے گیشوار بوت کنت۔بلوچی رہبندءِ بازیں جیڑہ نہ اَنت بلکیں منی دل ءَ جیڑہ ءِ جند نیست۔پرچکہ انوں دان بلوچی زبان وانگ ءُُ نبشتہ بوہگ ءَ اِنت،بلوچی ءَ ہزارانی حساب ءَ کتاب چہاپ بوہگ ءَ اَنت۔وہدے یک زبانے نبشہ بوہگ ءَ انت،وانینگ بوہگ ءَ انت آ چون بے راہبند بوت کنت؟دومی زبان اگاں زندگیں چیزے بقول زبانزانتانی گڈاں زندگیں چیزانی اڑ بہہ ہلاس نہ بنت۔

ہمے پیم ءَ بلوچی رہبند ءَ را ہم چندے انچیں اڑ گون انت کہ گوں یک نندے ءَ گیشوار بوت کن اَنت بلئے شرط ایشی ءِ شر کنگ ءُُ یکے دومی ءِ حیالانی پہمگ اِنت۔انوں چیزے روچ اِنت کہ بلوچی اکیڈمی ءَ جار پراینتگ کہ سید ہاشمی رہبند ءِ ہما نزوری کہ است انت ہماوانی گیشواری ءَ دیوانے کنگ بیت ءُُ ہمے دیوان ءَ پیش مردمانی ہما کہ زبان ءَ سرپد انت آوانی نبشتہی دروشم ءَ حیالانی سرپدی ءَ لوٹیت۔

پرے گپ ءِ نزاناں عیب چے انت کہ سوشل میڈیا چندے سنگت بے سریں گپاں گوں ہمے نیکیں واہگ ءَ ڈالچار کنگ لوٹ اَنت۔اگاں یک دیوانے پہ سیدہاشمی ءِ رہبند ءَ کنگ بہ بیت پریشی ءَ چے بیت؟سید ءَ وت ہم گشتگ کہ اے رہبند سرجم نہ انت بلکیں پریشی ءَ کار لوٹیت ہمے کار ءَ بلوچی اکیڈمی ءَ گامگیجے زرتگ۔بائد درائیں زبانزانت ءُُ زبان دوست پریشی ءَ گامے دیم ءَ بیا اَنت دانکہ ہما یکے کپے جیڑہ گوں نبشتہ راہبندءَ بندوک اَنت آاوں ہلاس بہ بنت۔بلوچی اکیڈمی سید رہبند ءَ دوبر جوڑ کنگ یاکہ آئی ءَ بدل کنگ ءَ انت بلکیں آئی ءِ ہما کہ نزوری اَنت آوانی نشانی ءَ چہ زبانزانتاں پولگ ءَ اِنت ءُُ ہما نشانی ءِ سرا تران کنگ لوٹیت۔

بائد ہما چندے کہ پہ دپ کار بند اَنت آ نبشتہی دروشم ءَ وتی حیالاں دیم ءَ بیار اَنتءُُ اے گپ ءَ پدر بہ کن اَنت کہ سید اگاں سرجم انت داں چون سرجم انت ءُُ سید رہبند ءَ ہما چیزانی گیشی یا کمی کنگی اِنت آ کجام کجام اَنت۔چریشی ءَ یک اسکرپٹے قوم ءِ دیم ءَ کیت ءُُ ہرجائے ہمے یکیں چیز پیش کنگ بیت کہ مئے رہبند ایش انت۔