بندرءَ حکومت مہلوک ءِ کاردار انت بلئے حکومت بازیں جاہ ءَ آوڑءَ کار کنگ ءَ بے سوب بوتگ۔اگاں آوانی نام یک پہ یک گرگ بہ بنت داں سرجمیں کتابے جوڑ بوت کنت۔آواں بل انوگیں ناں بلکیں گوستگیں بازیں سالانی اے جیڑہ اِنت کہ تنی وہدے ایشی ءِ کار پیلو کنگ نہ بوتگ۔بزاں کوئٹہ ءِ ہمے سیوریج سسٹم کہ تنی وہدے انگت ءَ گٹر ءِ آپ روڑانی سرا تالان اِنت ءُُ چریشی ءَ مہلوک ءُُ راہ گیر چنچو جیڑگانی آماچ اِنت اے گپ ءَ آ زانت نہ کنت کہ وت گاڑیانی سرا سئیل کن اَنت۔
گٹر ءِ آپ ہور ءُُ بے ہوری ہردو موسماں کوئٹہ ءَ گندگ بیت۔انوگیں ہوری موسماں اے جاور چد ءُُ حراب تر انت۔حکومت ءَ را بائد انت کہ اے انچائیں شہرے نہ اِنت بلکیں اے بلوچستان ءِ سرشہر انت۔ دری مردم ءُُ درائیں وزیر ءُُ گزیر،گورنر، سروزیر ءُُ اے دگہ مزن اگدیں مردم ہمے شہر ءَ نندوک اَنت ءُُ آ اے جیڑہ ءَ انچو ڈالچار کنگ ءَ اَنت کہ گشئے اے جیڑہ کوئٹہ ءَ گون نہ انت۔یکے ہما روڑ جوڑ کنوکیں کنٹریکٹرانی ذمہ واری اِنت کہ آوانی انچیں روڑ جوڑ کتگ کہ کنڈ ءُُ بیٹ ءَ پر چکار اَنت۔
دومی اے یک پکہ ئیں روڑے کہ ایشی ءِ سرا آپ اوشیت گڈاں بزاں اے گوں وتی روڑ ءَ بے سوب انت۔دومی ہما سیوریج بزاں گٹر ءِ آپانی ماں کور ءُُ کنڈ اں دور دئیوکانی کہ آپ ہمداں روڑءَ اوشتوک انت ءُُ حدائی روچ ءُُ گاڑیانی اے دیم ءُُ آدیم ءَ ایشانی شنگ ءُُ شانگی ءَ چہ آپ وت ہشک بیت۔
راہ گیر اے وشیں روچاں کہ ہور ءُُ باران اِنت کہ آ ڈن ءُُ دراں سئیل ءُُ سوادے پہ چاہ ءُُ واری یے ءَ ڈنے ءَ روگ ءَ ترس انت کہ سرجمیں روڑ گٹری آپاں چکار انت۔ چریشی ءَ نہ ایوک ءَ ہما راہ گیریں مردماں پہ جیڑہ انت بلکیں ہما کہ گاڑیاں سوار اَنت ءُُ ٹریفک ءَ کہ گھنٹہ گھنٹہ یے ءَ اوشتوک بنت ءُُ ہمے نیام ءَ باریں چنچو مردم یکے دومی ءَ گوں دپ جاکی کن اَنت ءُُ جنک ءُُ مڑ بیت۔ گاڑی ءُُ سائیکلانی ہمے گٹری آپاں چہ حرابی ءُُ ششت ءُُ شودءَ چہ چنچو زر نقص بیت۔
اے گپ ءَ چہ حکومتی مردم بے خبر اَنت۔ اے دگہ ملکانی شہراں ہمے دمانی کہ ہور بیت روڑانی سرا آپے ترمپے نہ بیت بلکیں انچو گمان بیت کہ ہور ءِ جند نہ بوتگ بلئے اے شہر ءَ اے گٹری آپ ہور ءَ پد داں چنت روچ ءَ ہمے روڑانی سرا مردمانی رنجینگ ءَ اوشتوک بیت ءُُ حکومتی مردماں اے بابت ءَ مورے ماں گوشاں نہ وارت۔کوئٹہ بلوچستان ءِ انچائیں شہرے بوتیں داں گپے پہ دو بلئے اے بلوچستان ءِ سری شہر انت۔۔۔۔اداں اگاں چیزے رد بہ بیت داں مردم ہمے گمان کنت کہ پہ سیوریج ءَ لکھانی حساب ءَ کہ زر کہ سیوریج آفیسراں دئیگ بنت آایشاں وت ماں وتی خرد ءُُ برد ءَ ہلاس کن اَنت ءُُ سیوریج سسٹم ءِ ہرچی بیت بہ بیت۔
اے ملک ءِ حال وت ہمے حکومتی مردماں کتگ اَنت اگاں اے چوشیں مزنیں شہرے نہ اِنت کہ ایشی ءِ کار بوت مہ کنت۔ یک وہدے کوئٹہ ءَ لیٹل فیرس گشگ بوتگ بلئے مرچی لیٹل فیرس ءَ بل بلکیں اے کوئٹہ ءِ اوں رنگ ءَ نہ جنت۔ ایشی ءِ ذمہ وار ہمے شہر ءِ کارگشاد اَنت۔
اے شہر ءَ نہ ٹریفک لائٹ است،ناں اسٹریٹ لائٹ،ناں سیوریج ءِ سسٹمے است نہ استپالے،نہ جوانیں وانگجاہ یے ناں پارکے،ناں نند جاہے۔ اے پیمیں چاگردے ءَ جوانیں مردم چتور ودی بوت کنت پمشکا اے شہر ءَ ناشریں مردم ودی بیت پرچکہ اداں چہ کسانی ءَ ہمے گشگ بیت کہ حق دئیگ نہ بیت پچ گرگی اِنت۔