بلوچی لبزانک ءِ دیمروئی ءَ لبزانکی ادارگ ءُُ گلانی یک بلائیں دست ہواری یے گون انت۔کراچی ءَ ابید ءَ اے دگہ دمگاں ہم بلوچی لبزانک ءِ بابت ءَ بازیں کارے بوتگ۔ہمے مزن ادارگ ءُُ لبزانکی بنزہاں چہ یکے بلوچستان اکیڈمی تربت انت کہ آئیءِ یک سرجمیں لبزانکی دپترے است انت۔

یکبرے کاروان ءِ نام ءَ تربت ءُُ تربت ءِ کش ءُُ کری مردماں لبزانکی چست ءُُ ایراں کار کتگ پدا سرچمگ ءُُ ایندگہ لبزانکی گل ءُُ ادارگاں لبزانک ءِ دیمروئی ءَ کار کتگ۔ اچ ایشاں پد نون یک بنجلے پہ لبزانکی کار ءُُ لبزانکی مردماں رستگ آ بلوچستان اکیڈمی تربت اَت۔بلوچستان اکیڈمی تربت گوستگیں سی سال انت کہ بلوچی زبان ءُُ لبزانک ءِ مزن نامیں شاعرءُُ لبزانتاں چہ ہمے ادارگءَ وتی حیال ءُُ لیکہ کتابی دروشم ءَ آ تُری شاعری ءِ بہ بنت یاکہ ردانکی چھاپ کتگ ءُُ وتی لبزانتانی دلبڈی کتگ بلئے بازیں مدتے ءَ اے گل ءَ سرکاری ہچ وڑیں سرپرستی نہ بوتگ۔

بلوچستان اکیڈمی تربت ءِ یکبرے وَ گرانٹ دارگ بوتگ اَت پدا ایشیءِ رجسٹریشن ءَ را معطل کنگ جوانیں کتہ کاری یے نہ بوتگ کہ چہ سرکارءِ نیمگ ءَ کنگ بوتگ۔اے درگت ءَ گوستگیں سال ءِ گرانٹ وَ بلوچستان اکیڈمی تربت ءَ گوں چیزے مردمانی کمک ءَ پچ گپتگ اَت بلئے ہمے رجسٹریشن ءِ کار انگت ءَ مہتل اِنت۔حکومتی زر ءُُ مال پہ مہلوک ءِ آسراتی ءُُ جان سلامتی ءِ حاترا اَنت۔ لبزانک ءُُ زبان ءِ دیمروئی ءِ کار ہمے شاعر ءُُ ادیبانی اِنت بلئے دانکہ ایشاناں آسراتی مہ بیت ایشانی کتاب چھاپ مہ بنت اے کار اوں نہ بیت۔ہمے کارءَ اکیڈمی کنگ ءَ اَنتءُُ بلوچستان اکیڈمی تربت گوستگیں 30سال اِنت کہ ہمے کارءَ گوں مشکول اِنت اے درگت ءَ سی ءُُ چل کتاب اوں بلوچستان اکیڈمی تربت ءِ نیمگ ءَ چہ چھاپ ءُُ شنگ بوتگ اَنت۔

چیزے شخصی مردم کہ ایوک ءَ وتی جندءِ نپ ءُُ سیتاں اکیڈمی جوڑ کن اَنت ءُُ سرکار ءِ ریپنگ ءَ پریس کلباں پروگرام کن اَنت ءُُ چہ سرکار ءَ گرانٹ گر اَنت بلئے ہما ادارگ کہ شپ ءُُ روچ پہ قوم ءِ زبان ءُُ لبزانک ءِ دیمروئی ءَ کارءَ اِنت، آوانی واست سرکاری در ءُُ دریگ بند اَنت۔بلوچستان اکیڈمی تربت ءِ پیم ءَ بلوچستان ءِ اے دگہ بازیں اکیڈمی چوکہ سید ہاشمی اکیڈمی،گوادر،سید ریفرنسن لائبریری کراچی، عزت اکیڈمی پنچگور،راسکو ادبی دیوان نوشکی ءُُ اے دگہ انچیں ادارگ اَنت کہ بازیں سالاں بلوچی زبان ءُُ لبزانک ءِ دیمروئی ءَ کار کنگ ءَ اَنت آوانی کمک تنی وہدے کنگ نہ بوتگ۔

سرکار ءِ بائد انت کہ وتی زر ءُُ مالاں شخصی ءُُ وت ساچیں ادارگانی دئیگ ءِ جاہ ءَ کہ آ واں گوں زبان ءُُ ادب ءَ ہچ سیاد ی یے نیست انت ایوک ءَ وتی جندءِ نپ ءَ اے کارءَ کن اَنت اے پیمیں ادارگانی جاہ ءَ آ بلوچستان اکیڈمی تربت ڈولیں ادارگاں بدنت دانکہ آ زبان ءُُ لبزانک ءِ کاراں مہتل مہ بنت۔بلوچستان اکیڈمی تربت ءِ یکے وَ گرانٹ کم اِنت بائد ایشی ءِ گرانٹ گیش کنگ بہ بیت دومی آئیءِ انوں رجسٹریشن ءَ را معطل کنگ بوتگ کہ اے یک زوراکی یے بائد سرکار اے پیمیں ادارگانی ہر وڑا بوت کنت کمک ءُُ مدت بہ کنت دانکہ زبان دیمروئی کت بہ کنت۔