پاکستان ءَ جیڑہانی گشواری ءِ نہ بوہگ ءِ مستریں سوب ایش انت کہ جیڑہانی بنزہ ءُُ روتگ شوہازگ نہ بنت بلکیں سرزاہری ءَ ادارکی گشواری یے پہ مہلوک ءِ دپ بندی ءَ کنگ بیت۔ کمشنر مکران حدامرزی طارق زہری ءِ بیرانی ءَ ٹیل ءِ کاروبار ءِ سرا چہ دمگی حکومت ءِ نیمگ ءَ بندش ہم انچیں گامگیجے کہ آئی ءِ بیرانی ءِ ذمہ واری ٹیل ءِ کاروبار ءِ سرا مشگ بوت۔

اگاں ٹیل ءِ کاروبار ءَ گوں مرگ ءُُ موت ءُُ ناگہانی ویلاں گوں سیادی یے بوت انت گڈا بائدیں درائیں ملک ءَ پیٹرول ءِ کاروبار بند کنگ بوت انت پرچکہ اسلام آباد ءَ بگرداں جیوانی روچے ہزاراں ٹینکرچہ ٹیل ءُُ پیٹرول ءَ پرانت ءُُ دگ ءُُ سڑکانی سرا رہادگ انت۔ بائدیں اے دراہ بند کنگ بہ بنت اگاں اے بندگ کنگ نہ بنت گڈا ایوک ءَ بلوچستان ءَ پرچہ اے کاروبار بند کنگ بوتگ پرچکہ کیچ ءُُ پنجگور ءُُ دالبندن ءُُ تپتان ءَ اے ٹیل کاروربا کہ برجاہ انت بازیں شونداری ءِ ردا اے داں پنجاب ءُُ پدا ہندوستان ءَ ہم سر بوہگ ءَ انت وہدیکہ دومی نیمگ ءَ افغانستان ءَ کے پی کے ءَ ہم سر بوہگ ءَ انت ءُُ روتاکانی ءِ ردا کراچی ءَ بازین پٹرول پمپ ایرانی ٹیل ءِ کاروبار ءَ کنگ ءَ انت اگاں ہمے ٹیل یا ٹیل ءِ کاروبار بلوچستان ءَ ترسناک انت گڈا کراچی، اسلام آباد ءُُ پشاور ءُُ افغانستان ءَ پرچہ ترسناک نہ انت۔

چریشی ءَ پدرانت کہ بلوچستان ءَ ٹریفک ویلانی سیادی گوں ٹیل ءِ کاروبار ءَ نہ انت بلکیں حکومت ءِ بے دلگوشی ءُُ دگ ءُُ سڑکانی آسراتی نہ بوہگ ءِ سوب ءَ انت۔ اے وہد ءَ بلوچستان یک چشیں سڑکے نیست کہ دو راہی بہ بیت دنیا ءَ درائیں دراجیں سڑک شش ءُُ ہشت راہی انت وت پاکستان ءَ موٹروے ءُُ سندھ ہائی وے چاراہی دگ انت بلئے بلوچستان ءَ یک چشیں سٹرکے نیست کہ دو راہی بہ بیت ءُُ اے وہد ءَ کہ مکران داں کوئٹہ ایم 8 ءِ نام ءَ سڑک جوڑ کنگ بوتگ آ کوئٹہ کراچی،آر سی ڈی ءِ سڑک چارکے ہم نہ بیت۔

ہما مردماں کہ کوئٹہ کراچی آر۔سی۔ ڈی دگ ءِ سرا سفر کتگ آ ایم۔8 سڑک ءِ سرا سفر بکن انت گڈا آہاں گمان بیت کہ یکدارے ءَ سوار انت ءُُ زر ءَ سپر کنگ ءُُ انت پمشکہ حکومت ءِ بائد نہ انت کہ وتی سڑکانی ناشری ءُُ وتی اخلاقی ذمہ واریانی پورا نہ کنگ ءِ ڈبہ ءَ مہلوک ءِ کاروبار ءِ سرا مش ایت۔ اگاں مکران کوئٹہ ءُُ مکران کراچی دگ ءُُ سڑک دو راہی ءُُ کشادہ جوڑ کنگ بہ بنت گڈا وت اے وڑیں ویل دیم ءَ نیاانت۔

دگہ گپے ایش انت کہ زمباد ءُُ ٹیل ءِ کاروبار مرچیگین انت چد و پیش کہ کوئٹہ کراچی،کوئٹہ مکران،مکران کراچی ءِ دگ ءِ سرا کہ بازیں ویل دیم ءَ اتکگ انت آ وہد ءَ ناں زمباد گاڑی بوتگ ءُُ ننکہ ٹیل ءِ کاروبار پمشکہ گوں بلوچستان ءِ سروزیر مزنءُُ سکریٹری ءَ دزبندی انت کہ وتی اے بے وڑیں سوڈگ ءُُ گامگیج ءِ سرا دوار چار بکن انت ءُُ وتی حکومت ءِ نہ کرتگیں ڈبہ ءُُ ذمہ ءَ مہلوک ءِ سرا مہ مُش انت پرچکہ بلوچستان ءَ چہ پیسر ءَ بیروزگاری باز انت نوں بلوچستان ءِ مہلوک چد ءُُ گیش بیروزگاری سگ ات نہ کنت۔