بلوچستان شہ دربرجاہ ءِ ویڈیو اسکینڈل ءَ درائیں بلوچستان ءِ مہلوک تکانسر ءُُ پریشان کتگ کہ بلوچستان وڑیں نیم قبائلی ءُُ نیم جاگیرداری ءِ چاگردے ءَ اے وڑیں ویل چون دیم اتک کنت؟ بلئے بائدیں اے گپ ءَ زانگ ءُُ منگ بہ بیت کہ بازیں ویلے کہ بلوچستان ءَ دیم ءَ کیت آئی ءِ سیادی گوں بلوچ چاگرد ءَ نہ انت چدوپیش سوئی ءَ وہدے ڈاکٹر شازیہ کیس دیم ءَ اتکگ ات گڈا آ وہد ءَ نواب اکبر خان بگٹی ءَ پریشی ءَ مزنیں جاک ءُُ کوکارے کتگ انت۔

بلئے بلوچستان ءِ ایندگہ رہشونان ہچ نہ گشتگ ات پمشکہ وہدے ہمے ماہ ءَ بلوچستان شہ دربرجاہ ءَ ویڈیو اسکینڈل دیم ءَ اتکگ ات گڈا جمیل اکبر بگٹی ءَ وتی حال ترانے ءَ گوستگیں شازیہ کیس ءِ حال دیم ءَ آورتگ ات ءُُ گشتگ ات کہ اگاں ہما زمانگ ءَ بلوچ ءُُ بلوچستان ءِ رہشوناں گوں نواب اکبر خان بگٹی ہم کوپگی بہ کت انت گڑاں مرچی بلوچستان ءِ اے مزنیں شہ دربرجاہ ءَ اے وڑیں دگہ ویلے دیم ءَ ہچبر نہ یتکگ ات۔

نواب زادہ جمیل اکبر بگٹیءِ اے گپ وتی جاہ ءَ راست ءُُ تچک انت بلئے بازیں ویل اے وہد ءَ کہ بلوچستان ءَ دیم ءَ پیداک انت۔ آہانی سیادی گوں بلوچ چاگرد ءَ بندوک نہ انت۔آہانی سیادی گوں انگریزی دور ءِ قبضہ گیری ءَ انت۔ پرچکہ ہردور ءَ ریاست نزوریں راجانی محکمیں میار ءُُ ربیدگانی نزور کنگ ءِ جہد ءَ کنت تنکہ آہانی”جہل جنی ءِ حیال“ ءِ تہا دور بدنت ءُُ آئی ءِ اوبادگ وتی چاگرد ءُُ وتی ربیدگ ءُُ میار ءُُ میار جلی ءَ بہ ڈوبار انت۔اے وڑا آہاں گوں وتی چاگرد ءُُ بن دپتر ءَ یک وڑیں نپرتے ءُُ نادوستے ودی بیت کہ آہاں چہ وتی”راجی وتیگیءِ مارشت“ ءَ سند ایت۔اے وڑیں پندل گوں ہرچ نزوریں راج ءَ کنگ بنت۔

اگاں افریقہ ءَ نیلسن منڈیلا مہ بوت انت گڈا سیاہ پوستیں راج ہچبر چہ اسپیت پوستیں راج ءِ ڈسکورس(Discors) ءَ نریٹیو(Narative) ءَ دراتک نہ کتگ ات بلئے افریقی سیاہ پوستیں راج بحت ئیگ بوتگ انت کہ آہاں نیلسن منڈیلا وڑیں رہشونے رستگ کہ نیلسن منڈیلا وتی راج ءِ حلاپ ءَ اے وڑیں درائیں پندل پاشک کتگ انت ءُُ وتی راج ءَ ”جہل جنی حیال“ آماچ بوہگ نیشتگ۔ بلوچ راج ءِ مستریں بدبحتی ایش انت کہ آہاں چشیں راہشونے نیست کہ اے وڑیں جاورے ءَ کہ بلوچ پندل ءُُ ریپکاری ءِ آماچ بیت گڈا آئی ءَ سر ءُُ سوج کنوکیں رہشونے بہ بیت کہ آئی ءَ را بہ گش ات کہ اے ویل ءِ سیادی ہچ وڑا گوں بلوچ میار ءُُ چاگرد ءَ نہ انت بلکیں پندلے ءِ پشدر ءَ ایشی ءَ را گوں بلوچ چاگرد ءَ بندوک کنگ ءِ جہد بوہگ ءَ انت۔

چوکہ بلوچستان ءَ شیعہ،سنی ءِ جیڑہ ودی کنگ ہرچ ملا ءُُ بے ملا ءِ نام ءِ دیم ءَ بلوچ قبیلہانی نام ءِ دئیگ یاکہ مذہب ءِ نام ءَ کشت ءُُ کون ءُُ ایندگہ اے وہد ءَ اگاں بلوچ راج دوست دگہ زحمے جت نہ کن انت اے کار ءَ زلور بکن انت کہ بلوچستان شہ دربرجاہ ءِ ذمہ واراں دزگیر بہ کنائین انت ءُُ مہلوک ءِ دیم ءَ پاشک بہ کنائیں انت ءُُ اگاں ہمیشی کت نہ کن انت گڈا بس ہمنچو گشگ بوت کنت کہ
اشتر کہ کوربیت، چراگ جاہ ئےِ دور بیت!