شمبئے9 نومبر2019 ءَ خانہ فرہنگ کوئٹہ ءِ ڈائریکٹر جنرل سید محمد حسین تقی زادہ واقفی ءَ بلوچی اکیڈمی ءِ تروتاب کت۔ اے تروتاب ءِ وہد ءَ بلوچی اکیڈمی ءِ واکداراں پرائی ءِ شرپ ءَ یک مراگشے برجمینتگ ات۔ ایران ءِ سفارت خانہ ءِ نیمگ ءَ کوئٹہ خانہ فرہنگ چہ گوستگیں بازیں سالاں کار ءَ انت بلئے خانہ فرہنگ ءِ نیمگ ءَ آئی ءِ واکداراں بازیں سالانی مہتلی ءَ پد اے آئی ءِ اولی تروتاب ات۔آئی ءَ وتی تروتاب ءِ وہد ءَ گشت کہ اے دمگ ءِ راجانی سیادی گوں ایران ءَ باز کوہن ءُُ کدیم انت ءُُ بائدیں سیادی برجاہ بمان انت۔

ایران اولی ملک ات کہ 1947 ءَ پاکستان ءِ جوڑ بوہگ ءَ پد آ منتگ ات اے شاہدی ات کہ ایران ءَ پاکستان ءِ درائیں زبان ءُُ دودمان منتگ انت۔ اے درچ ءَ وہدے پاکستان ءِ ہمساہگ افغانستان ءُُ بھارت گوں آئی ءَ دلگران ءُُ ناراز انت گڈا نوکیں عالمی جاورانی پش در ءَ پاکستان گوں ایران ءَ وتی سیادی ءُُ نزیکیاں برجاہ بہ کنت ءُُ اے سیادیانی برجاہ کنگ ءِ مستریں راہ ءُُ در ہمیش انت کہ دوئیں ملکاں ہستیں زبان ءُُ ربیدگء بنجاہاں سیادی برجاہ کنگ بہ بنت اے درچ ءَ فارسی ءُُ بلوچی دوہنچیں زبان انت کہ ایشانی پشدر ءَ پاکستان ءُُ ایران ءِ سیاسی ءُُ چاگردی سیادی ہم برجاہ دارگ بوت کن انت اگاں کوئٹہ ءَ چہ خانہ فرہنگ ءَ اے وڑیں گامگیجے زورگ بوتگ گڈا چہ حکومت پاکستان یا بلوچستان ءِ صوبائی حکومت ءِ نیمگ ءَ ہم ہنچیں گامگیج زورگ بہ بنت۔

اے وڑا دوئیں ہمساہگیں ملکانی میان ءَ نزیکیں سیادی برجاہ دارگ بنت کہ آئی ءِ سیاسی نپ ءُُ سیت دوئیں ملکانی راجاں رست کن انت۔ ڈائریکٹر جنرل سید محمد واقفی ءِ گشگ ءِ ردا آئی ءِ واہگ انت کہ اے سیادی برجاہ دارگ بہ بنت پرچکہ بلوچی ءُُ فارسی گہواریں زبان انت کہ آہانی بنزہ ایران انت۔ بلوچی یک ہنچیں زبانے کہ ایران پاکستان دوئیں ملکاں گشگ بیت ءُُ ایران ءِ حکومت مادری زبانانی ارزشت ءُُ بستار ءَ سرپد انت۔ بلوچی اکیڈمی ءِ نیمگ ءَ ہم آئی ءَ را وش کنگ بوت کہ دیریں مدتے ءَ پد چہ ایرانءِ خانہ فرہنگ ءِ نیمگ ءِ ماں بلوچی اکیڈمی ءَ اے وڑیں تروتاب ءِ گمانے کنگ بوتگ اگاں خانہ فرہنگ گوں پاکستانی زباناں ہنچو سیادیاں برجاہ بداریت گڈا اے باوری گپے بیت کہ دیم ءَ دوئیں ملکانی حکومتاں مجبور بکن انت کہ آ گوں بھارت ءُُ افغانستان ءَ وتی سیادیاں برجاہ دارگ ءِ بدل ءَ گوں یکے دومی ءَ برجاہ بدار انت۔

اے وہد ءَ کہ سعودی عرب ءِ پشدر ءَ ایران ءِ حکومت ءَ گوں پاکستانی راج ءُُ حکومت گوں بازیں دلگرانی یے است بلئے اگاں پاکستان لوٹ ات کہ گوں ایران ءَ اے دوری دور کنگ بہ بنت ءُُ یک نزیکی ءِ برجاہ داریگ بہ بیت گڈا اے بابت ءَ حکومت پاکستان ءُُ گچینی بلوچستان ءِ صوبائی حکومت بلوچی اکیڈمی ءِ دلبڈی ءَ بہ کنت تنکہ بلوچی اکیڈمی گوں ایران ءِ علمی ءُُ ادبی ادارگاں سیادیاں برجاہ دارگ ءِ حاترا گشادیں گامگیج بزورایت چوکہ بلوچ راج ایران ءُُ پاکستان دوئیں ملکاں ماں یک مزنیں حسابے ءَ جاہ منند انت بلوچی زبان ءُُ بلوچی ادبیات ءِ پشدر ءَ پاکستان ءِ حکومت ایرانی حکومت ءِ دلگرانی ءُُ نازرائیاں دور کت کنت۔اے بابت ءَ بائدیں بلوچی اکیڈمی ءِ واکدار ہم گامگیجے بزورانت ءُُ گون وتی اگدہ داراں خانہ فرہنگ ءَ ہم یک تروتابے بکن انت تنکہ خانہ فرہنگ ءِ واکدار سرپد بہ بنت کہ بلوچی اکیڈمی ءِ واہند ءُُ واکدار آہانی تروتاب ءَ وش بوتگ انتءُُ پاکستان ءِ حکومت ہم اے تروتاب ءَ وش ءُُ رازی انت۔