21 فروری ءَ ماتی زبانانی میان اُستمانی روچ ءَ دُریں دنیا ءِ کُنڈ کُنڈ ءَ برجم دارگ بیت، مئے جُہد پہ زبان ءَ ہمے بہ بیت ما وتی وانگجاہ ءُُ مراگشاں وتی جند ءِ زبان ءَ تران بہ کنیں بلے مئے بد بختی اِیش اِنت زبان وت ءَ اَست پجار وت ءَ اَست بلے اَپسوز ءُُ بژن ءِ گپ اِنت کارمرز کنگ ءِ جا گہءَ ما وت ءَ اَنچو بے سماکُتگ گْشئے زاناں ما بے زبانیں گُنگدامیں۔

ما چہ یونیسکو ءَ لوٹ کنیں بلوچی ءُُ براہوئی زبان ءِ رکینگ ءِ جُہد ءَ بہ کنت پہ بلوچی ءُُ براہوئی زبان ءِ درگت ءَ دنیا ءِ ہر کنڈ ءَ نشتگیں زبان زانتاں سرپدی بہ دنت کہ بلوچ یک زندگیں کومے ءِ رِد ءَ ھوار بیت، بلوچ ءِ زبان بلوچ ءِ پجار اِنت بلوچی زبان ہزاراں سال کہن ءُُ کدیم اِنت اگاں بچارئے بلوچی یک وتی جتائیں رنگ ءُُ دروشمے بلوچی زبان ءِ وتی راہ ءُُ راہبند است انت۔ کجام کومےءَ وتی زبان پشت ءَ دور دات پہ آئی ہچ پشت نہ کپ اِیت زبان مانیت راج مانیت اگاں ما راجدپتراں پٹ ءُُ پُول بہ کنیں دژمناں کومانی پروش دیگ ءَ پیسر آئی ءِ زبان ءِ ہنڈال بُر اِتگ ءُُ چہ بُن ءُُ بیہاں گارکُتگ چیا کہ زبان ءَ دیمروی کُت گڑا المّ کوم دیمروی ءِ نیمگ ءَ جنز اَنت۔مئے زبان بلوچی ءُُ براہوئی انت بائدیں ہر ہما شہدربرجاہ کہ تنی وہدی بلوچی ءُُ براہوئی وانینگ نہ بوہگ ءَ اِنت اِے کُل نودبر ادیب دانشور ءُُ زبان زانتانی زمہ واری بیت اِے رنگیں کاراں یکجاہ ءُُ ہمکوپگ بہ بنت۔

بلّے تُری مئے زبان انگت ءَ مزنیں زبانی(اسٹینڈر)ءِ رِد ءَ شمار نہ اِنت۔ بلے ایشی ءِ ہاتر ءَ مارا وت تچ ءُُ تاگ ءُُ سُر ءُُ پُر لوٹیت۔ مرچی من پہ پہر گشاں کہ منی زبان بلوچی اِنت، من ہمیشی ءَ نبشتہ کناں ءُُ وتی دراہیں ہیال ءُُ لیکہاں ماں قرطاسانی دلبند ءَ نکش کنان باں داں ساہ ءِ ساز روان کنت ءُُ زندگی ءِ گاماں گامے پر کناں۔ من وتی زبان ءَ نبشتہ کناں ءُُ وانان باں۔ ہمے داب ءَ زندگی کنان باں روان باں۔ انچوش کہ آ دگہ راج ترک، عرب، پارس، بنگالی،ہندو، دگہ دگہ وتی زباناں نبشتہ کنان ءُُ روان اَنت۔

من پرچا اے کشکاں وتی ماتی زبان ءَ ویل بہ کناں ءُُ دگرے ءِ پادوماں بہ کپاں۔زبانانی میان استمانی روچ ہر ہمک زبان ءُُ راجدوست ءَ چہ منی نیمگ ءَ گوں دل ءِ جہلانکاں مُراد بات۔

گڈسرا منی کلوہ پہ راج ءَ ہمیش اِنت کہ وتی زبان ءَ بہ وان اِت وتی زبان ءَ نبشتہ بہ کن اِت وتی زبان ءَ بہ پہریز اِت ءُُ وتی زبان ءِ مردماں گوش بہ دار اِت۔
نمرانیں مْراد ساحر گْشیت:

نہ علم شْوک نہ کوم ءِ دوستی نہ سُد دنیا ءِ
چْشیں بے جوہر ءُُ جان دُز ءُُ سستیں نوجواناں سوچ