نوکیں پاکستان ءِ نوکیں وزیراعظم عمران خان اے وہدءَ ’’گہبودی ءُُ شاہگانی‘‘ ،ءِ لیکہ ءِ برجمیءِ چلمی(40) سالروچ ءِ درگت ءَ چین ءِ تروتاب ءَ انت۔اے تروتابءِ بلوچستان ءِ سروزیر جام کمال یوسف آئی ءِ ہمراہ انت ۔ 

اے ہمراہی ءِ نوبت ایش انت کہ آ سندھ،پنجاب،ءُُ سرحد ءِ ناں بلکیں بلوچستان ءِ سروزیر انت ءُُ پاکستانءِ گوں چین ءِ سی پیک ءِ سیادی ءِ بنزیاہ بلوچستان انت پمشکہ اے وڑیں تروتاباں پاکستان ءِ وزیراعظم پنجاب ، سندھ ،خیبر ءِ سروزیر ءَ ہمراہ کنگ ءِ بدل ءَ بلوچستان ءِ سروزیر ءَ وتی ہمراہ کنت ۔

اشی ءِ دو مول ءُُ مراد انت یکے ایش کہ چین ءِ مہلوک ءُُ حکومت ءَ را باور بہ بیت کہ بلوچستان گوں چین ءَ پاکستان ءِ وفاق ءِ کرتگیں منّگ نامہانی منوک ءُُ پلہ مرزی کنوک انت دومی ایش انت کہ وفاق جہد ءَ انت کہ بلوچستان ءِ مہلوک ءَ را باور بہ بیت کہ وفاقی حکومت کہ ہرچ منّگ نامہ ءِ گوں چین ءُُ ایندگہ ملکاں کنت منّگ نامہانی تہابلوچستان ءِ مہلوکءِ رزا ءُُ مرزی ہوار انت اگاں چارگ بہ بیت نواب اکبربگٹی ءُُ پدا نواب اسلم رئیسانی حکومتاں ساری ءُُ رند ءَ بلوچستان ءِ ہچ حکومت ءِ نیمگ ءَ چشیں گامگیجے دیم ءَ نہ یتکگ کہ مردم بگش ایت کہ واکی بلوچستان ءِ مہلوک ءَ وتی جہگرانی باپشت ءَ چشیں دلگرانی ءُُ لرنجی یے درشان کتگ کہ چہ آئی ءَ چین ءُُ ایندگہ ملکاں پیغام ءُُ کلوہ یے سر بہ بیت کہ بلوچستان ءِ مہلوک چہ وفاقی حکومت ءِ چرے گامگیجاں نہ وش ءُُ دلگران انت ۔ 

سیندک ءُُ حب ءِ گولڈ اینڈ مائینز چاتاں چین ءِ حوالہ کنگ ءَ پد ہم بلوچستان چشیں نپ ءُُ سیتے دست نہ کپتگ سی پیکءِ منزل ءُُ بنزیا گوادر گوستگیں 20 سالاں ترمپے آپ ءَ تلوس ایت درائیں بلوچستان ءَ یک ہم چشیں سڑک ءُُ دگے نیست کہ سرجم بہ بیت اے وہدءَ سی پیک ءِ نام ءَ ہرچ وامے کہ زورگ بوتگ عمران خان ءِ حکومت ءِ گشگ ہمیش انت کہ پنجاب ءَ ہرچ بوتگ انت۔

دومی دست ءَ اے وہد ءَ دہ سال بیت کہ ہور نہ بوہگ ءِ سوب ءَ بلوچستان اے دمگ ءِ مستریں ڈکال ءِ آماچ انت اے درچ ءَ مستریں جیڑہ اے دیم ءَ اتکگ کہ یو این ڈی پی ءِ رپورٹ ءِ ردا بلوچستان دنیا ءَ پد منتگیں ءُُ نیزگار تریں دمگ انت حیرانی ءُُ ابکہی گپ ایش انت کہ بلوچستان ءِ چہ ہما ملکاں گنتر ءُُ بدتر انت کہ دنیا ءَ سرجمیں ملک ہم گشگ نہ بنت ءُُ اشانی تہا بازیں جنگانی آماچ انت ہم چوکہ افغانستان،عراق ، شام ، یمن، الجزائر ءُُ ایندگہ ملک کہ نہ ایوک ءَ جنگانی آماچ انت بلکیں پہ دیمروئی ءُُ رہبند ءِ رد ءَ سرجمیں ملک ہم گشگ نہ بنت بدبحتی ایش انت 2008 بگرداں روچ ء مرچی وفاقی حکومت ءِ نیمگ ءَ یکشل ءَ ہمے جار پرینگ بوہگ ءَ انت کہ بلوچستان ءَ باز دیمروئی بوتگ۔ 

پہ گچینی زرداری حکومت ءِ وہد ءَ’’ بلوچستان پیکچ ‘‘ءِ جار ءُُ ایندگہ گامگیج ،دومی رند ءَ 2013ءِ حکومت ءَ وفاق ءِ نیمگ ءَ بلوچستان ءِ ہرچ ہند ( ضلع) ءَ 10ارب کلدارءِ جار بلئے اے درائیں جار ءُُ اوگاماں پد یو این ءَ ڈی پی ءِ گوستگیں ماہ ءَ رپورٹ ءِ رد ءَ بلوچستان ءَ71درسد نیزگاری گیش بوتگ بلئے ہمے دور ءَ بلوچستان ءِ راج دوستان مزنیں نیکی کتگ کہ وفاق ءَ را بلوچستانءِ داتگیں47 ارب کلدار واپس کتگ ایوک ءَ71 درسد نیزگاری ءِ گپ نہ انت ۔

بلکیں ہمے رپورٹ ءِ گشگ بوتگ کہ بلوچستان ءِ ہند کوہلو ءُُ بارکھان ہنچیں ہندانت کہ اودا نیزگاری 96درسد انت بزاں سد درسد ءَ ایوک ءَ 4درسد کم ، ہمے وڑا تربت ، آواران ،پنجگور ءِ بابت ءَ گشگ بوتگ کہ اے ہنداں نیزگاری 86درسد ءَ چہ گیش انت گپ ایش انت کہ سی پیک ءِ نیزہ سیندک ءُُ حب مائینز ءِ چاتانی ہما دمگ کہ آئی ءِ ہر ہند ءَ 10ارب پیکیج رستگ اے وڑا پرچہ نیزگار ءُُ وار انت ؟ دومی بلوچستان ءِ پیکچ ءِ زر ءُُ مال کجا شتگ انت ؟

اگاں بلوچستان ءَ دہ سال انت ڈکال انت ءُُ نیزگاری71درسد ءَ گوستگ گڈا گوستگیں حکومت ءَ 47 ارب کلدار پرچہ واپس کنگ بوتگ انت ؟ آیا ہمے 47ارب کلدار اگاں دو بر ءَ وفاق ءَ دئیگ ءِ بدل ءَ بلوچستان ءِ نیزگاری ہلاس کنگ یا ڈکال ءَ ہلاس کنگ ءِ ہاترا پرچہ کارمرز کنگ نہ بوتگ انت۔؟؟

گوستگیں حکومتانی ہمے گامگیجانی پشت ءَ مرچی بلوچستان ڈکال ءُُ نیزگاری ءِ آماچ انت نوکیں حکومت ءَ نوکیں پاکستان ءِ جار پرینتگ ءُُ گشتگ کہ سی پیک ءِ بازیں منگ نامہ ءُُ پیش بندی نواز شریف ءُُ آئی ءِ براتاں بلوچستان ءُُ ایندگہ دمگانی حق جتگ ءُُ پنجاب ءَ داتگ انت نوکیں حکومت ءِ چین ءِ تروتاب ءَ پیسر گشگ ہمیش بوتگ کہ نوکیں حکومت نواز شریف ءِ گوں چین ءَ منگ نامہ ءُُ پیش بندیاں دوارچاری کنت ءُُ ایندگہ دمگانی حقانی پہریز ءَ کنت ۔

اے وہد ءَ عمران خان حکومت ءِ اے چین ءِ اولی تروتاب انت کہ بلوچستان ءِ سروزیر ہم گون اِنت۔بائدیں گوستگیں حکومتانی شاہدی ءُُ گواہی ءِ جاہ ءَ نوکیں پیش بندی ءُُ بلوچستان ءِ نیزگاری ءَ ہلاس کنگ ءَ حاتراگامگیجے گندگ بہ بیت۔