بلوچستان ءِ لس مہلوک ءَ را باریں چنت سال اِنت رپینگ بوہگ ءَ انت کہ چہ سی پیک ءَ بلوچستان ءِ بحت چست بیت ءُُ آئی ءِ بے روزگاریں ورناہاں روزگار دئیگ بیت ءُُ بلوچستان وشحال بیت۔بلئے اے درائیں گپ ایوک ءَ بٹاک بوتگ اَنت ۔
زیکیں اسمبلی ءَ قرار دادے منظور بوتگ اے قرار داد ءَ سی پیک ءِ بنگیجی ءَ پہ بلوچستان ءَ بازیں دیمروئی پروجیکٹسانی بندات ءِ جار جنگ بوتگ اَنت بلئے چرے پروجیٹکساں یکے ءِ سرا ہم کار نہ بوتگ ۔ نئے روڑ ءُُ دگ جوڑ کنگ بوتگ اَنت نیکہ گوادر ءِ جندءَ را یک میگا سٹی ءَ وَ بل یک سٹی یے درجگ داں روچء مرچی دئیگ نہ بوتگ اَنت ۔
گوادر ءِ مہلوک داں روچ مرچی ءَ پہ آپے ترمپے ءَ تلوسگ ءَ اَنت بلئے حکومت ءِ نیمگ ءَ دائم ءَ ہمے جار جنگ بوہگ ءَ اِنت کہ گوادر ءُُ سرجمیں بلوچستان ءَ را درائیں کول کہ کنگ بوتگ اَنت آ درست دئیگ بنت ۔اسمبلی ءِ ہمے دیوان ءَ اے اوں لوٹ کنگ بوتگ اَنت سی پیک ءِ درائیں پروجیٹکس کہ قوم ءِ دیم ءَ پدر کنگ بوتگ اَنت آدرستانی یک کمیشنے جوڑ کنگ بہ بیت ءُُ اے ہم گشگ بہ بیت کہ اے درائیں کوٹاں پہ بلوچ ءُُ بلوچستان ءِ نندوکاں چتوریں کٹے دست کپیت ۔
اے درگت ءَ ثنا بلوچ ءَ گشتگ اَت کہ سی پیک ءِ بہر ءُُ بانگی ءَ ہمے تاثر دئیگ بوہگ ءَ اِنت کہ بلوچستان اے ملک ءِ بہر نہ اِنت اگاں چہ سی پیک ءِ بندات ہمے ملک ءَ چہ بوتگ اَنت بلئے کٹ ءَ اے دگہ دمگ ورگ اَنت ۔بلوچستان ءِ بازیں دمگاں ورگی ساپیں آپ نیست ،اسکول ءُُ کالجانی کمی اِنت ءُُ بازیں دمگاں اسکول ہم نیست ءُُ نیکہ درمان جاہ ءُُ نادراہ جاہ یے است ۔
گوستگیں دہ سال اِنت کہ بلوچستان ڈکال ءِ آماچ اِنت ءُُ ہورے ترمپے نہ گوار اِنت اے میان ءَ بائد وَ ہمیش اَ ت۔حکومتی دست کمے پہ بلوچستان ءِ لس مہلوک ءَ بہ دات اِنت بلئے ؛ وائے شدکیں لاپ وتارا چانگ نیلیت مہر نہ دنت، اے وڑیں جاوراں حکومت ءِ نیمگ ءَ دائم ءَ سی پیک سی پیک ءِ جار جنگ وَ بیت بلئے ایشی ءِ عمل یک درسدے ہم بلوچستان ءَ انگت ءَ نہ بوتگ ۔ نیکہ دراج بریں دگ بلوچستان ءَ است ءُُ نیکہ میگا پروجیکٹس گندگ بنت ۔
چین ءِ گوں پاکستان ءَ دوست ءُُ مہر ءِ درشان ءَ کسے ءَ را باک ءُُ اڈے نیست اِنت بلئے چین ءِ تیاب دپی مہلوک ءُُ ملکانی گوما چے چے بوتگ اَنت آ دپتر ءَ است ۔پمشکا بلوچستان اسمبلی ءِ درائیں سروکاں ہمے گشتگ کہ چو مہ بیت کہ باندہ گوں بلوچستان ءَ ہم ہما رنگ بہ بیت ۔
پمشکا آ یاں گشتگ کہ سی پیک ءِ جہت ءَ ششت ءُُ دو ارب کلدار کہ بلوچستان ءَ سرمایہ کاری ءَ پہ دئیگ بوتگ چو مہ بیت کہ بلوچستان ءَ اے سرمایہ کاری ءَ بے بہر بہ بیت ءُُ آئی ءِ بہر ایوک ءَ بزگی ءُُ واری بئیت اِنت۔
انچو کہ پیسر ءَ بلوچستان ءِ بنجاہی شہر ءَ پہک ءُُ ساپی ءِ چیزے پروجکٹس است اَنت بلئے آئی درائیں زر ءُُ انچو کہ پیسر ءَ کرد ءُُ برد بوتگ اَنت انچو درا بیت پرچکہ کوئٹہ ءَ نئے پہکی گندگ بیت ءُُ نیکہ آئی ڈولداری ءَ گیشی یے آرگ بوتگ اَنت ۔
درائیں مردمانی چم گوں سی پیک ءَ اَنت کہ بلکیں چریشی ءَ بلوچستان ءِ بزگ ءُُ لنگڑیں مہلوک ءِ درداں درمانے بہ بیت بلئے چہ درمانی ءَ گیش اے آزگیں ٹپانی کدینگ ءِ دیم ءَ روان اِنت ۔بلوچستان پاکستان ءِ درستیں کستریں صوبہ اِنت ءُُ ایشی ءِ وتی آبادی انچو نہ اِنت اگاں دری مردم حساب کنگ مہ بنت پرچکہ بلوچستان ءَ دری مردمانی یک بلائیں بہرے پہ روزگ مُشگ بوتگ ،اگاں اے مردم بلوچستان ءَ ہوار مہ بنت داں بید ئے سی پیک ءِ کمک ءَ بلوچستان دیمروئی دئیگ بوت کنت ۔
آئیءِ بے روزگاری ءِ درسدی حساب روچ پہ روچ گیش بوہان اِنت ءُُ سرکار ءَ انگت ءَ چشیں گامگیجے نہ زرتگ کہ اے بے روزگاری کمتر کنگ بہ بیت ۔اگاں سی پیک ءَ روزگاری یے جار جنگ ہم بہ بیت داں بلوچستان ءِ مہلوک ءِ بہرگ ءَ درائیں روزگای بہرگانی کمتریں بہر بہر ءَ کیت اِنت ۔