بلوچ ءُُ بلوچی زبان ءُُ دپترءِ انگت ءَ بازیں چیزے نبشتہ کاراں شوہازگ ءُُ نبشتہ کنگی اَنت۔بلوچی زبان ءِ دپتر ہمنچو کُہن اِنت آئی ءِ راجدپتر ءِ کُہنی ہم ہما اِنت بلوچانی راجدپترءِ بابت ءَ بازین ندکاراں بازیں چیزے نبشتہ کتگ ءُُ بازیں چیزے انگت ءَ منتگ کہ نبشتہ کنگ لوٹ اَنت ۔پروفیسر فاروق بلوچ چما ندکاراں یکے کہ آواں بلوچانی راجدپتر نبیسی ءَ وتی ندکاربستگ ۔

واجہ فاروق بلوچ ءِ چد ءُُ ساری ہم بلوچ دپتر ءِ چارکتاب کتاب بوتگ اَنت چریشاں چہ ’’ بلوچ اور انکا وطن ،بلوچستان کے تہذیبی نقوش،بابا امیر حمزہ،خان اعظم میر نصیر خان نوریِ‘‘ چاپ بوتگ اَنت ءُُ اے آئی ءِ پنچمی کتاب اِنت کہ بلوچ دپتر ءِ یک حاصیں دور ءِ بابت ءَ اَنت ۔

اے کتاب پنام ’’ بلوچستان اور برطانوی مورخین‘‘ ءِ نام ءَ بلوچی اکیڈمی کوئٹہ ،2018ءَ چھاپ ءُُ شنگ کتگ ۔اے کتاب ءِ بلوچستان ءِ ہما بہر ءِ بابت ءَ نبشتہ بوتگ کہ برطانیہ ءِ دپتر نویساں بلوچانی سرا نبشتگ ۔اے کتاب ءَ را سرجم ءَ پنچ دراں بہر کنگ بوتگ اولی در ءَ بلوچستان ءِ حد ءُُ ابیلانی بابت ءَ آئی ءِ راجکاری ارزشت ءِ بابت ءَ بیان بوتگ۔

دومی در ءَ برطانیہ ءِ ہما جاسوس کہ بلوچستان ءَ پہ سیاسی ءُُ چاگرد جاورانی حال بری ءِ بابت ءَ بلوچستا ن ءَ روان دئیگ بوتگ اَنت ءُُ ہمے میان ءَ کہ آواں ہرچی کتابے کہ نبشتگ آوانی بابت ءَ شرگداری اوں کنگ بوتگ سیمی در ءَ ہمے جاسوسانی بلوچستان ءَ آئیگ ءُُ آوانی کارانی سرا تران کنگ بوتگ۔

چارمی در ءَ ہما درائیں جاورالانی سرا تران کنگ بوتگ کہ برطانوی جاسوسانی آئیگ ءَ پد بلوچستان ءَ کہ گندگ بوتگ اَنت آوانی بابت ءَ جوانی ءَ تران بوتگ ۔گڈی ءَ پنچمی در ءَ درائیں گپانی یک آسرے دیم ءَ آرگ بوتگ ۔واجہ فاروق بلوچ وت یک پولکار ءُُ دپتر نویسے پمشکا اے کتا ب ءَ آئی ءَ پولکاری رہبنداں گوں سرشوناں وتی گپ جتگ اَنت ۔ 

یک بلائیں شم ءُُ شیکے کہ دپتری اے تک ءَ پچ بوتگ واجہ فاروق بلوچ ءَ ہمے شم ءُُ شینک ءِ پُری ءَ وتی گامے دیم ءَ برتگ اَنت۔بائد بلوچ دپتر ءِ انچیں درائیں تکاں نبشتہ بہ بیت کہ پیسر ءَ نبشتہ نہ بوتگ اَنت ۔واجہ فاروق بلوچ ءَ یک انچیں بنگپے ءِ بابت ءَ جتا نبشتہ کتگ کہ پیسرا کس ءَ نہ کتگ۔چنائی ءَ اے نوکیں بنگپے نہ اِنت مدام دپتر نویساں ہمے بابت ءَ وتی جتا جتائیں کتاباں بیان وَ کتگ بلئے کس ءَ ایشی ءِ سرا جتا نبشتہ نہ کتگ پمشکا اے کتاب وانگ کرزیت ۔بلوچ راجدپتر ءِ انگت ءَ بازیں پہناتے است کہ آوانی بابت ءَ ہچی نبشتہ نہ بوتگ ۔بائد ندکار وتی راجدپتر ءَ ہم ہمنچو ارزشت بدینت کہ ہمنچو آ شاعری ءَ دئینت ۔

بلوچی اکیڈمی ءِ نیمگ ءَ انوگیں باریگ ءَ بازیں شاعری کتاب نبشتہ بوتگ ،شاعری لبزانک ءِ یک مزنیں بہرے ءُُ اے دائم ءَ گون بہ بیت بلئے بائد وتی ردانک ءَ را گیشتر ارزشت دئیگ بہ بیت ءُُ دپتر ءِ سرا اے اولی کتاب اِنت انت کہ ا ے بری چہ اکیڈمی ءَ چھاپ بوتگ ۔

بلوچی اکیڈمی اے وہد ءَ بلوچستان ءِ مستریں ادارگ اِنت ءُُ چم ہمائی ءَ سک اَنت بائد آ وتی ندکارانی حاص ہما کہ وتی راجدپتر ءِ بابت ءَ نبشتہ کنگ ءَ اِنت آوانی سرا گیشتر دلگوش بدنت۔پرچکہ ہمک راج چہ وتی دپتر زانگ بیت ءُُ بلوچانی دپتر دنیا ءِ یک کُہن تریں دپترے ءُُ ایشی ءِ بابت ءَ انگت ءَ دلگوش دئیگ انت اے کتاب ہمے راہ ءَ یک مزنیں گیشی یے زانگ بیت ءُُ آوکیں وہد ءَ اے کتاب پہ پولکاراں یک نوکیں راہ یے پچ کت کنت ۔

واجہ فاروق بلوچ چنائی ءَ وت یک جوانیں پولکارے ءُُ آئی ءِ پولکاری ءِ بنزہ بلوچ ءُُ بلوچستان اِنت ۔آئی ءَ نہ ایوک ءَ بلوچءُُ بلوچستان ءِ دپتر درجتگ بلکیں آئیءَ بلوچانی بازیں کہنیں جاہ ءُُ دمگانی ہم شوہازی کتگ کہ دپتری حساب ءَ آوانی یک مزنین ارزشت ءُُ بستارے است انت ۔آوان ثہ مہرگڑھ ہم آئی ءَ بازین عہدی چیزے شوہاز کتگ ءُُ کوہلو کھاہان ءَ واجہ فاروق بلوچ ءُُ آئی ءِ ہمراہاں ہما دور ءِ مزنیں جناور بزاں کہ ڈائنوسار ءِ ہم فوسل شوہاز کتگ اَنت ۔اگاں کسے ایشانی چارگ ءَ لوٹیت داں بلوچستان اسٹیڈی سنٹر ءِ میوزیم ءَ ہما درائیں چیز یکجا مچ کنگ بوتگ اَنت ۔

واجہ فاروق بلوچ یک مہروانین استادے ءُُ زانتکاریں پولکارے اوں است انت ۔ اے کتاب آئیءِ ہمے پولکاری ءِ یک حاسیں بہرے واجہ ءِ پی ایچ ڈی ہم بلوچ دپتر ءِ یک مزنیں بہرگے ءِ سرا کتگ بزاں مکران ءِ سرا آئی ءَ وتی پی ایچ ڈی کتگ کہ ہمے زوتاں آاوں پہ چھاپ ءَ جریدگ بیت ءُُ پولکاراں پہ نوکیں راہ گیشواری ءَ کمکے بوت کنت ۔