سائنسی جوڑشت بنی آد م ءِ ارزانی ءِ درگت ءَ جوڑ کنگ بوتگ اَنت ۔ہما درائیں سائنسی جوڑشتاں چہ یکے ہمے موبائل فون اِنت۔چوکہ اولی براں گرائم بل ءَ اے چیزے جوڑ کتگ اَت کہ مردمانی آسراتی بہ بیت پرچکہ نمدیاں یکے دومی ءَ سربوہگ ءَ بلائیں وہدے پکار بوتگ بازبراں انچو بوتگ کہ یک مردمے ءِ نمدی آئی ءَ را ہما وہد ءَ سر بوتگ کہ آئی جند چہ دنیا ءَ سپرے کتگ ۔
بلئے گرائم بل ءَ نزانتگ اَت کہ آئی ءِ جوڑ کرتگیں اے آسراتی مردمانی گٹ ءَ لوپ بیت۔موبائل ءِ کار یکے دومی ءِ گپانی سرکنگ ءُُ آرگ اِنت ۔اگاں بچار اِت داں اے یک جوانیں آسراتی یے بلئے ہر چند کہ ایشی ءِ تہا گیشی آرگ بوہان اِنت ہمنچو آ پہ مردماں جیڑہ جوڑ کنان اَنت ۔
یک وہدے ءَ مردمانی گور ءَ سادئیں موبائل بوتگ کہ ایوک ءَ گپے سرے کتگ ءُُ گپے آورتگے زیات گوں موبائل ءَ چمانی حرابی ہمے موبائل گیمانی بوتگ بلئے نوں کہ آئی فون ءُُ سمارٹ ،ءُُ انروڈ موبائل مارکیٹاں پہ نیاد ءَ سر بوتگ انت ایشی ءَ بنی آدم ءِ زند ءَ را جہندم کتگ ءُُ ایشتگ ۔اے گون بہ بیت ہم مردم پریشان اِنت ءُُ اے گون مہ بیت اوں انچو سما بیت کہ چیزے گون نہ اِنت ۔ مرچی یکے ءِ گور پہ ورگ نان مہ بیت بلئے اسمارٹ فونے الم ءَ بیت ۔
اے جیڑہ ایوک ءَ پدمنتگیں ملکانی نہ اِنت بلکیں دیمروئی کتگیں ملک ہم ہمے جیڑہ ءَ دوچار اَنت ۔ یک دیوان ءَ دہ مردم نندوک بہ بیت بلئے انگت ءَ حاموشی اے یک اجبیں گپے بیت، بلئے راست ئے ۔۔۔۔چنائی ءَ اے نہ بوتگین گپے بلئے نوں دیوان اوں گو ں ہمے موبائل ءَ بندوک اِنت یکبرے فیس بک ءِ وبال سرا اَت بلئے نوں وٹس اپ ءُُ ٹوئٹر ءَ ہم مردمانی تام برتگ چہ دیوانی تران ءَ مردماں گستا کتگ۔ہرکس ءَ بچار گوں موبائل ءَ سر ءُُ لینڈ اِنت بلکیں نوں یک گس ءَ اگاں کسے بیمار بہ بیت داں آ دپ ءَ رند ءَ گشیت پیسر ءَ فیس بک ءُُ وٹس اپ ءَ اپڈیٹ کنت کہ من بیماراں منی بیماری ءِ سرا کمٹس ءُُ لائک بدئیت ۔۔۔۔بل ایشاں دنیا ءُُ جہان ءِ گندگیں چیزے ہمے موبائلانی سرا چارگ ءُُ شنگ کنگ بنت ۔ چنچو لوگ ہمے موبائلاں عکس درائی ءَ پروشتگ اَنت ۔
چنچو جنک ہمے موبائلانی سرا بدنام ءُُ رسوا کنگ بوتگ اَنت ۔بلئے کس ءَ اے چیزے سما نہ اِنت کس ترانی نہ اِنت ایوک ءَ گوں وتی ہمے موبائل ءَ مشگل اِنت بلکیں مرچی موبائل بنی آدم ءِ زند ءِ یک بہرے جوڑ بوتگ انچو کہ جوانیں گد ءُُ پچ ،ہمے رنگ ءَ جوان ءَ چہ جوان تریں موبائل ءِ ہم فیشن اِنت ۔مردمانی چمانی حرابی ءِ مستریں بنزہ ہمے موبائل اِنت بلئے انگت ءَ کس ءَ را سما نہ اِنت ۔
مردم چم ءُُ دستے ءِ روگ ءَ ساری وتی اسٹیٹس ءَ روان دنت کہ من چم ءُُ دستے ءَ روگ ءَ اوں ، بل ایشاں اڈے مکہ ءُُ مدینہ ءَ کہ مردم عبادت ءَ روت ءُُ وتی گناہانی پہلی ءَ چہ حدا ءَ لوٹیت اے جاہ ءَ ہم پیسر ءَ وٹس اپ ءَ شئیر کنگ بیت کہ من سر بوتگ اَنت من خانہ کعبہ ءَ اوشتاتگ اَنت ءُُ آئی ءِ عکس ءَ کشیت ءُُ ویڈیو ہم کنت ۔
اے وڑیں دور ے ءَ انگت ءَ مردم ہور ءُُ باران ءِ پگر کنت کہ ہور نہ بیت حشک سالی اِنت ،مہر ءُُ وفا کہ گوں موبائل فون ءِ سوگات ءَ بندوک اِنت دگہ چے بیت ۔یک جنکے ءَ را اگاں تو سمسنگ فونے دات آتئی سنگت اِنت ءُُ اگاں دومی مردم ءَ آئی ءَ را آئی فونے دات گڈا آئی سنگتے اِنت اے وڑیں دور ے ءَ حانی ءُُ شے مرید ءِ کسہ چون سازگ بنت۔ چک ماتی نہ اِنت پت چکی نہ اِنت اے وڑ ءَ حاندانی جنجال چون دیمروئی کن اَنت ۔
یک وہدے بوتگ کہ بیگاہاں مردماں نشتگ نیاد کتگ ہمروچی گپ ءُُ تران کتگ مجلس بوتگ یکے دومی ءِ درد ءُُ رنجاں ہور بوتگ اَنت بلئے نوں جاور مٹ اَنت۔کس ءَ را گوں دومی ءَ کار نیست ہریکے گوں وتی موبائل ءَ سرءُُ لینڈ انت ۔پیش ءَ گاڑی ءَ را شیطان ءِ اولاکے اِش گشتگ نوں ہمے موبائل اِنت کہ چہ شیطان ءِ اولاک ءَ گندگ تر اِنت۔
ہمے موبائل ءِ کارمرزی ءَ چنت روڑی واکیا بوتگ اَنت چنت مردم بیران بوتگ ایشی ءِ اگاں یک لڑے جوڑ بہ بیت داں سرجمیں کتابے جوڑ بوت کنت ۔چش نہ اِنت کہ سائنس ءِ اے جوڑشت ءَ چہ نپ زورگ مہ بیت بلئے ہما کہ اے جوڑشت ءِ اصل مول ءُُ مراد بوتگ آ بے حیال کنگ مہ بیت ءُُ چہ نوک نوکیں آسراتیاں نپ بزور بلئے ایشانی درگت ءَ وہدے ایر بہ کنت دیوانے ءَ نندگ ءُُ موبائل ءِ پنڈینگ بائد مہ بیت بلکیں دلگوش گوں دیوان ءَ بہ بیت ۔یک گاڑی ءُُ سائیکل ءِ چلائینگ ءِ وہد ءَ دلگوش گوں موبائل ءِ جاہ ءَ وتی راہ ءَ بہ بیت پرچکہ چہ تئی بے دلگوشی ءَ دومی مردم ءَ را نکش رست کنت۔