اے بتل ءِ معنا کنگ نہ بیت کسے ایشی ءَ سرپد بیت شر نہ بیت شر بلئے زانوک زانت کہ اے گنج کجا اِنت ءُُ مار کئے اِنت۔گوستتگیں بیست سال ءَ گیش اِنت کہ سرکار جارءَ انت کہ’’ گوادر کو میگا سٹی بنائیں گے‘‘گوادر ءِ میگا سٹی ءَ وَ بل آہود ءِ نندوکیں مردماں پہ ورگی آپے اوں انگت ءَ شوہاز گ نہ بوتگ ۔یکبرے گوادر ءَ را سنگاپور ءَ را دئیگ بوتگ اَت ،پدا چین ءَ را ءُُ نوں عرب ملکانی دست ءَ دئیگے لوٹ اَنت ۔
اے درائیں کار زر ئیگ اِنت ہما ملک کہ گیشتر زر دنت گوادر ہمائی ئیگ اِنت ۔انوں عرب شہزاد ءَ دہ بلینءِ جار جتگ کہ آ گوادر ءِ مہلوکانی حاترا انت بلئے اے گپ ءَ درائیں مردم زان اَنت کہ گوادر ءِ مردماں ہچی دست ءَ نئیت اِنت ۔پیسر ہم ششت ءُُ دو بلین ڈالر ہم گوادر ءِ رم ءَ دئیگ بوتگ اَنت آ اوں گوادر ءَ بے بہر کنگ بوتگ ءُُ اے بری ہم انچو کنگ بیت ۔پرچکہ دائم ءَ زر بنجاہی حکومت ءَ دست ءَ کائینت ءُُ آ زراں وارت ءُُ گوادر ءِ مردماں ہچی دست ءَ نیئت اِنت۔
اے بری ہم ہمے رنگ اِنت بلئے زاری ہمیش اِنت کہ ہندی حکومت ءِ مردم ہم اے بابت ءَ ہچ گشت نہ کن اَنت پرچکہ آ لس مہلوک ءِ گچین کرتگیں نہ اَنت پمشکا آواں گوں مہلوک ءِ درد ءُُ دوراں کار نیست اِنت ۔بلوچستان ءِ درائیں مالی ملکت مردمانی دیم اَنت کہ بلوچستان ءِ بہرگ ءَ چے پیداک اِنت۔
یکیں گوادر ءِ نیلیں زر انت کہ برگ ءُُ چیر دئیگ نہ بیت دگہ اے ہم چہ بلوچاں پلگ بوتگ اَت ءُُ نوں اے کہ میگاپروجیکٹ کنگ بیت یاکہ میگا سٹی کنگ بوہگ اَنت اے ہم گوادر ءِ مردمانی واست نہ اَنت انچوکہ پی سی ہوٹل انت آ اوں لس مردم ءِ بسات ءَ در انت ایوک ءَ زرداریں مردمانی حاترا جوڑ کنگ بوتگ اگاں چین سٹی ءُُ پٹی جوڑ ہم بوت کہ گمانے نیست آ اوں ہمے زردارانی حاترا جوڑ بنت ۔
زی سوشل میڈیا ءَ لہتیں عکس دیم دئیگ بوتگ اَنت کہ چین ءِ مسلمانانی سرا چے رنگین ظلم کنگ بوہگ ءَ انت ءُُ آوانی دینی جاہ ءُُ مسیت یاکہ اللہ ءِ کلام قرآن بن دئیگ بوئگ اَنت اے جاورانی پد ءَ ہم پاکستان ءِ گشگ ہمیش اِنت کہ چین آئی ءِ دوستدار یں ملک اِنت ءُُ دومی نیمگ ءَ آ جار جنت کہ اسلامی مستریں ملک پاکستان اِنت ۔۔۔اے وت حیرانی گپے کہ گوادر ءِ ہما کہ گچین بوتگیں وزیر اَنت۔
یاکہ شہر ءِ مستریں مئیر ءُُ مردم اَنت آوانی ہچبر اے دہ ءُُ زور ءِ بابت ءَ سرپد کنگ نہ بیت ءُُ زر انچو کہ بنجاہی سرکار ءَ را سر بنت آ ورگ بنت بلئے نام گوادر ءِ بد اِنت ۔اگاں اے درائیں بلین ڈالراں وَ بلکیں اگاں حق ءُُ دلی اگاں گوادر ءِ سرا کار کنگ بہ بیت داں گوادر ءَ را چو بانورے ءَ سمبہینگ بوت کنت پرچکہ آئی ءِ آباتی کم انت ،بلئے سرکار اِنت روز نہ دنت ۔گوادر ءِ مردمانی ہما کہ بے روز اَنت آوانی کار مائی گیری بوتگ نوں جاور ایش انت کہ سرکار ءَ آوانی مائی گیری ہم بند کتگ بلکیں آوانی زر ءِ نیام ءَ روگ ءَ مکن کنگ بوتگ ءُُ تیاب ءَ مائی وَ نیست انت کہ گرگ بہ بیت ۔
گوادر ءِ مائی گیر وتی دام ءُُ نئیاں چہ مائی گر اَنت بلئے سرکار ءِ مزن مزنیں شاگ کہ است اَنت ءُُ ہما گجو یاکہ کرنٹ وئیراں چہ مائی کہ گرگ بیت چریشی ءَ مائی ہم زوال بنت ءُُ مائی گیر ی ہم کم بوہان انت ۔گوادر ءِ مردمانی ہما کہ اصل نمائندگ اَنت دانکہ آوانی صلہ ءُُ شور اے پروجیکٹساں گون مہ بنت ءُُ گوادر ءِ جند ءِ لس مہلوک ءِ حبر ءُُ حال دانکہ گوشدارگ مہ بنت گوادر ہچبر دیمروئی کت نہ کنت ءُُ اے دہ بلین ڈالر کہ عرب انرجی ءِ کارمستر خالد الفلاح دئیگ انت۔
آ ہم انچو گار بنت کہ کس سر پِر نہ بیت ۔ بائد یک برے چہ سرکار ءَ جست بہ بیت کہ ہما ششت ءُُ دوبلین ڈالر چون کنگ بوتاں ؟ ءُُ ہمے زراں چہ گوادر ءِ مہلوک ءَ پہ چے چے کنگ بوتگ ؟دانکہ گواستگیں حساب راست مہ بیت بائد آ نوکیں کارانی کنگ ءَ مکن بہ کن انت ءُُ اے کار بلوچستان ءِ حکومتی مردماں کنگ لوٹیت بلئے آ شگنز ءِ واجہ کہ لّلہ اِنت ،آ مال ءِ دیمپان اللہ اِنت۔