بلوچی زبان ءَ رجانکءِ روایات سک کہن اِنت ۔ اگاں چوش گشگ بہ بیت کہ اے چہ ردانک ءِ بنداتی ءَ گون اِنت داں رَد نہ بیت ۔بلوچ ندکاراں دائم ءَ اردو ءُُ انگریزی ءِ شر شریں موادانی بلوچی زبان ءَ رجانک کرتگ ءُُ بلوچی لبزانک ءَ گیشی آورتگ ۔

بلئے چوش باز کم بوتگ کہ کسے ءَ بلوچی زبان ءِ موادے یاکتابے دگہ زبانے ءَ رجانک کتگ ۔ ’’ دانشِ سید‘‘ سنگت رفیق ءِ یک انچیں جہدے ۔ اے کتاب سید ہاشمی ءِ ’’ سِستگیں دستونک‘‘ ءِ اردو رجانک اِنت ۔ کتاب سرجم ءَ 120تاکدیمان اِنت۔کتاب ءِ نام دات ،سید ءِ لبزانکی ایمان ءِ نام ءَ کنگ بوتگ۔ اے کتاب ءَ را بلوچی اکیڈمی ءَ 2019 ءَ چھاپ کتگ ۔کتاب ءَ را دگہ گیشیں چیزے ہوار کنگ نہ بوتگ۔

بلکیں ہما کہ سید ہاشمی ءَ کتاب ءِ بہر ،بہر کتگ اَنت ۔سنگت رفیق ءَ اے کتاب ہم ہما رنگ ءَ بیان کتگ۔یک دگہ گپے کہ من گشگ لوٹاں اے کتاب ءِ درائیں مُزکہ زرانی دروشم ءَ اکیڈمی ءِ نیمگ ءَ چہ سنگت رفیق دئیگ بوتگ انت آ درائیں زر سنگت رفیق ءَ سید ہاشمی ءِ کہول ءَ را روان داتگ اَنت ۔ اے یک بلائیں قربانی یے کہ سنگت ءَ داتگ۔سید ءِ کتاب کہ آئیءِ شاہ زانتی ءِ مستریں درور اِنت ۔

سید ہاشمی ءَ یک انچیں راہ یے بلوچاناں شون داتگ ءُُ نوکیں تجربتے لبزانک ءَ را بکشاتگ بلئے سید ءَ پد اے راہ ءَ دگہ کس ءَ شت نہ کتگ ۔ اے کتاب ءِ رجانک ءَ بلکٰیں ہما راہ نوک بہ بیت ءُُ دگہ یکے انچیں کارے بہ کنت۔

کتاب رجانک ءُُ لبزانی کماہگ ءُُ شوہازی ءَ چہ پدر اِنت کہ رجانکار ءَ باز محنت کتگ یک درورے بچار کہ ’’آج کے سورج کو غور سے دیگھو شاید کل کا سورج تمہیں دیکھ نہ پائے ‘‘ہمے گپ ءَ سید ءَ چوش گشیت کہ ’’ مرچیگیں روچ ءَ شر بچار ،بلکیں بانداتیں روچ ترا دیست مہ کنت‘‘اے یک شاہ زانتی لیکہ ءُُ پگرے اگاں کسے ایشی ءَ زانت بہ کنت ۔ سنگت ءِ اے رجانک ءِ یک مستریں جوانی یے ایش اِنت کہ وتی زبان ءِ دری زبانے ءَ رجانک کنگ ءَ چہ اے اوں پدر بیت کہ بلوچی زبان اے لاحق اِنت کہ دری زبانے ءَ رجانک کنگ بہ بیت ۔

ایوک ءَ دری زباناں وتی زبان ءَ رجانک کنگ ءَ لبزانک دیمروئی نہ کنت بلکیں دری زبانے ءَ وتی اوں رجانک لوٹ اَنت۔ گڈی ءَ سید ءِ ہمے گپ ءَ گوں آسر کناں کہ ’’آدمی نہ بادشاہ زادہے ،نہ غلام زادہ ، صرف آدمی زادہ ہے اس بات کو کوئی اپنے لئے معقول سمجھے یا نہ سمجھے ‘‘