دالبندین: دالبندین میں ڈاکوؤں کی فائرنگ سے ٹینکر ڈرائیور جاں بحق کلینر زخمی ہوگیا۔ لیویز نے ملزم کو گرفتار کرلیا۔ لیویز کے مطابق واقعہ دالبندین میں ڈھڈر کے قریب پیش آیا ایک ڈاکو نے اسلحہ کے زور پر لوٹنے کی کوشش کے دوران مزاحمت پر فائرنگ کرکے ٹینکر ڈرائیور شاہ بیگ کو قتل کردیا ۔

فائرنگ سے کلینر ہدایت اللہ زخمی ہوا جس نے بھاگ کر اپنی جان بچائی۔زخمی کلینر ہدایت اللہ نے بتایا کہ انہوں نے پدگ میں مقامی ہوٹل سے ہوٹل مالک کی درخواست پر ایک اجنبی مسافر کو ٹینکر میں بٹھایا راستے میں ملزم نے لوٹ مار کی کوشش کی۔ 

زخمی نے بتایا کہ انہیں کسی راہگیر نے پرنس فہد اسپتال دالبندین پہنچایا جہاں طبی امداد دی گئی۔ لاش کو بھی پرنس فہد اسپتال دالبندین منتقل کرکے ضروری کارروائی کے بعد ورثا کے حوالے کیا گیا۔

دریں اثنائاسسٹنٹ کمشنر دالبندین حبیب ناصر نے دالبندین لیویز تھانے میں پریس کانفرنس سے خطاب کرتے ہوئے کہا کہ لیویز فورس نے خفیہ اطلاع پر کارروائی کے دوران واقعہ میں ملوث ملزم کو ملزم کو گرفتار کرلیا ہے ۔ان کا کہنا تھا کہ زیر حراست ملزم پیشہ ور مجرم ہے جو جرائم کی متعدد واقعات میں ملوث ہے جس کی شناخت پریڈ بھی کرائی گئی۔ 

ان کا کہنا تھا کہ رواں ماہ نوکنڈی اور دالبندین میں قتل کے دو دیگر واقعات میں بھی ملزمان کو بھی بروقت کارروائی کرتے ہوئے گرفتار کیا گیا ۔ان کا کہنا تھا کہ بدامنی کے واقعات کی تدارک کے لیے لیویز فورس مکمل طور پر چوکنا ہے قومی شاہراہ پر ہمہ وقت گشت کی جاتی ہے جبکہ لیویز فورس کی کوئیک رسپانس فورس بھی متحرک ہے۔