زبان ءُُ لبزانک ہما وہد ءَ دیمروئی کنا ں کہ آہانی پشت ءَ کار کنوکیں ادارگ مالی ءُُ انتظامی رنگ ءَ مہر ءُُ محکم بہ بنت اگاں ادارگ نزور بہ بنت گڈا آ پہ زبان ءُُ لبزناک ءِ دیمروئی ءَ وتی آ کرد ءَ دیمءَ آورت نہ کن انت کہ آئی ءِ زبان ءُُ لبزانک محتاج انت ۔ اے وہد ءَ دنیا ءِ بازیں ادارگ پہ وتی زبان ءُُ لبزانک ءِ دیم ءَ برگ ءَ کار ءَ انت اگاں کہ درائیں ادارگانی پشت ءَ فرد ءُُ نپر بنت بلئے اگاں نپر ءُُ فرد ادارگاں پشت ءَ بہ کن انت گڑا نپر ءُُ فرد دیمروئی کن انت۔

ءُُ ادارگ اوشت ءِ آماچ بنت۔ بلوچی زبان ءُُ لبزانک کہ مرچی1950 سیمسراں دراتکگ ءُُ اے جاہ ءَ سر انت ایشی ءِ تہا مستریں دست ہمے ادارگانی ئیگ انت ۔ البت بلوچی لبزانک پہ ادارگانی شونگ ءُُ پلگارگ ءَ آ وڑا سوبین نہ بوتگ کہ ایندگہ زبان ءُُ لبزانک انت بلئے بلوچی لبزانک ءَ بازیں ہنچیں ادارگ ہست انت کہ آ پہ بلوچیءِ دیمروئی ءَ گران ءُُ سنگینیں جہد ءَ انت۔

اگاں کہ اے ادارگاں جوانیں سرکاری فنڈ ءُُ مالیاتے دست کپگ ءَ نہ انت بلئے وڑے نہ وڑے ءَ زبان ءُُ لبزانک ءِ دیمروئی ءَ دست گٹ انت اے درچ ءَ بائدیں بلوچ زبان دوست ،لبزانک ءُُ راج دوست اے ادارگانی پلہ مرزی بکن انت تنکہ اے ادارگ چہ بدواہانی دیم ءَ نزور ءُُ کم گشاد مہ بنت بلئے اے بژنی گپے کہ مدتے بیت کہ بازیں بلوچ بدواہانی نیمگ ءَ بلوچی زبان ءُُ لبزانکی ادارگانی حلاپ ءَ زہرشانی بوہگ ءَ انت۔

اگاں کہ اے مردمانی زاہری گپ ایش انت کہ آ اے ادارگاں شریا شرتر کنگ لوٹ انت بلئے وہدے اے مردمانی کر د ءُُ عمل چارگ بنت گڈا درا بیت کہ اشانی کرد بلوچی زبان ءُُ لبزانک ءِ ادارگاں کمزور کنگ ءَ انت پرچکہ ادارگانی محکم کنگ ءِ معنا ءُُ مطلب ایش نہ انت کہ بلوچی زبان ءُُ لبزانک ءِ درائیں ادارگانی سرا ایوک ءَ لہتیں مردمانی دزگیری بہ بیت ءُُ اگاں ہما ادارگاں کہ ایوک ءَ ہمے مردم نہ بنت گڑا آ ادارگ نہ دیمروئی کن انت ءُُ ننکہ زبان ءُُ لبزانک ءِ دیمروئی کردے پیش داشت کن انت ۔ اے پدرائیں گپے کہ دنیا ءِ ہرچ ادارگے کہ جوڑ کنگ بیت ۔

ہما ادارگ ءِ بنکی باسکانی ہم حیالی ءُُ ہم پتی ءَ جوڑ کنگ بیت ہچ ادارگ ایوکءَ مردمانی مچ کنگ ءَ دیمروئی نہ کن انت ادارگانی دیمروئی ءَ مستریں کرد چہ مردمانی بازی ءِ بدل ءَ ہما ادارگ ءَ گوں ہواریں باسک ءُُ نپرانی دل پہکی ءُُ دل ستکی ءَ بندوک انت اگاں ادارگ ءِ ہواریں باسک ءُُ نپردل پکی ءَ پہ ادارگ ءَ کار بکن انت گڑا چہ بازیں مردمانی مچ بوہگ ءَ گیشتر کار کت کن انت۔

بلوچی زبان ءِ چہ بن ءَ بدبحتی ایش انت کہ ادارگانی باسکاں چہ دل پکی ءِ گیشتر پہ میر ی ءُُ کماشی ءُُ قبضہ گیری ءِ نیمون ءَ کش ءُُ چل بوتگ انت اے بابت ءَ اولی درور بلوچی زبان ءِ سرچمگ ئیگ انت کہ باسکانی گر ءُُ چل ءُُ ناوشی ءَ سید ظہور ہاشمی ءَ ملک یلہ کت ءُُ درملک ءَ شت ۔

اے بابت ءَ چارگ بہ بیت گڈا زبان ءُُ لبزانکی ادارگانی سرا وتی کماشی، ءُُ متبری قبضہ ءِ دارگ چہ 1951 ءَ گون انت ۔ ہرچ دور بازیں فرد ءُُ نپراں گوں لہتیں زبان ، لبزانکءُُ راج دوستی بٹاکاں وتی دست ءِ چیرا آرگ ءِ جہد کتگ تنکہ ہمے ادارگاں یکے وَ بلوچ راج ءُُ بلوچی زبان ءُُ لبزناک ءِ حلاپ ءَ کارمرز کنگ بہ بیت ءُُ دومی ہمے ادارگانی پشت ءَ وتی چاہ ءُُ چلم ءِ راہ یے بکش انت ءُُ دومی دست ءَ بلوچ راج ءِ دیم ءَ پہ وت ءَ پونزے بدار انت ۔

بائدیں بلوچ زانتکار،شاعر، لبزانک کار ءُُ ایندگہ زبان ءُُ لبزانک دوست اے پندلاں سرپد بہ بنت ءُُ بلوچی زبان ءُُ لبزانکءِ ادارگاں چدو گیشتر نزور ءُُ کم گشاد کنگ ءِ جہداں ہوار مہ بنت ۔ اے بابت ءَ اگاں کسے چہ وت ءَ سرپد بیت کہ آمزنیں کار گشاد ءُُ لائقیں مردے گڈابائدیں آ بلوچی زبان ءُُ لبزانک ءِ دیمروئی ءَُ پہ وت ءَ جوان تریں ادارگے جوڑ بکنت ءُُ وتی لائقی ءُُ کارگشادی ءَ ہمے ادارگ ءَ مثالی ادارگے جوڑ بکنت۔