گوستگیں روچاں بلوچستان ءِ بے روزگاریں ورناہانی دل ءَ نوکیں حب ءُُ واہگے چست بوت کہ بلکیں اے بری آوانی بے روزگاری ہلاس بہ بیت ءُُ بلئے سرکار ءِ اے جار ءَ اے نوکریاں ایوک ءَ ہما مردم بہر زرت کنت وت اِش بی ایڈ کتگ۔ گڑاں بازیں ورہای یے دل پرشت ءُُ آوانی واہگ ءُُ ارمان درست آپ بوتاں۔اے ورناہاں چہ ہما مردم ہم گون اِتاں کہ آہاں ایم فل ءُُ پی ایچ ڈی سائنس ءُُ آرٹس ہردو وانگیاں کرتگ۔

نوکیں پاکستان ءَ نوکیں دود ہمیش اِنت کہ یک ہبدہ گریڈ ءِ استادے ءَ اگاں بی اے کرتگ وَ شر اِنت بلئے اگاں کسے ءَ پی ایچ ڈی کتگ آئی ءَ را اے اجازت ہم نہ اِنت کہ آ ایس ایس ٹی ءِ نوکری یے کرت بہ کنت۔ اے چونیں دودے؟؟؟ اے حبر ہم راست اِنت کہ ہما مردماں بی ایڈ یا ایم ایڈ کرتگ آوانی اولی واہگ ہمیش بوتگ کہ جاہ یے ءَ ایس ایس ٹی ءِ نوکر بہ بنت بلئے اے ملک ءَ ہرچی بوت کنت بلئے واہگ پیلو بوت نہ کناں۔

اے بری ہم انچو بوت،یکے وَ بی ایڈ ءُُ ایم ایڈ ءِ سے سال اِنت کہ مزن شاہ دربرجاہ ءُُ علامہ اقبال اوپن دربرجاہ ءَ نہ بوتگ اَنت دومی ہما کہ استیں مردماں ایشاں چہ بازیں مردمے ءَ پرے حاترا بی ایڈ نہ کرتگ کہ ایشیءِ فیس چہ غریبے حد ءَ در بوتگ۔ ایوک ءَ ہما مردماں کہ وت سرکاری نوکر بوتگ اَنت یاکہ جے وی ءُُ جے اے ٹی کہ آوانی واست ءَ اے کورس کنگ ءَ المی اِنت دانکہ آوانی پگار ءَ گیشی یے بہ بیت۔بلئے ایندگہ لس نودربرے ءَ کہ بی ایڈ ءُُ ایم ایڈ کہ نہ کرتگ آ اوں مپت حدا نہ نشتگ اَنت بلکیں آواناں وانتگ ءُُ ایم فل ءُُ پی ایچ ڈی کہ پاکستان ءِ ناں بلکیں دنیا ءِ وانگی ءِ گڈی بہر لیکگ بنت۔

نون یک گپے کہ سرکار ءَ پہمگی اِنت کہ یک استادے کہ آئی ءَ پی ایچ ڈی یک حاصیں وانگی یے ءَ کتگ آ یک زہگے ءَ را جوان وانینت کنت یاکہ ہما نودربر کہ ایوک ءَ بی اے باریں پرائیوٹ کرتگ ءُُ بی ایڈ ءِ چکاس ءَ ہم دگہ مردمے ءَ آئی جاہ ءَ چکاس داتگ آ یک نودربرے ءَ را جوان وانینت کنت؟ اے گپ سرکار ءَ را چارگی اِنت۔ بلوچستان ءَ بے روزگاری انچو باز اِنت کہ اگاں اے ورنا انچیں جاہ یے ءَ گت کنگ نہ بوتاں چہ بازیں ورناہ یے بے راہی ءَ روت ءُُ بازیں ورہاناں وت کشی ہم کتگ۔اے وت کشی ہمے گژن ءُُ لاچاری ءِ بوتگ۔پرچکہ ایشاناں دگہ روزگار نہ رستگ۔

اے حکومت ءِ کار چونائی ءَ لائقی نہ اَنت کہ کسے ایشاں گلا ءُُ ستائے بہ کنت نہ بنجاہی حکومت ءِ کار جوان اَنت نیکہ دمگی بلئے ہمے کار اگاں ایشاں پہ وڑ بہ کرتیں داں بلکیں ایشانی ہما برتگیں شرپ اگاں سرجم ءَ نہ یتک بلکیں پہ گامے ءَ گیش وَ بوتیں۔حکومتی واکدارانی گشگ اِنت کہ ایس ایس ٹی ءِ پوسٹ پہ بی اے ایڈ ءِ حاترا جم دئیگ بوتگ اَنت گڑاں آ دگہ مردم چون بہ کن اَنت؟ بائد وَ ہمیش اَت کہ ہما نودربراں کہ بی ایڈ کرتگ آوانانی ڈگری ءَ را انٹریو ءِ روچ ءَ دہ ءُُ پنچ نمبر بداتیں یاکہ آئیءِ ڈگری ءَ را چہ اے دگہ ڈگریاں کمے ارزشت بداتیں ءُُ اے چکاس ءَ درائیں بے روزگاریں ورناہ بہر بہ داتین اَنت پرچکہ بازیں ورناہاں ڈگری آاوں پی ایچ ڈی گون اِنت بلئے بے روزگار اَنت ءُُ چد ءُُ آدیم آ چہ نوکری ءِ عمر ی کساس ءَ ہم دربنت پدا آواناں کس نوکر ی ہم نہ دنت۔بائد انت اے چیز وَ چارگ بوتیں بلئے دل ءَ پہ واجہ ءَ بدی نیست اِنت۔۔۔۔