ملک ءَ عمران خان ءِ حکومت ءِ آہگ ءَ گوں مہلوک ءِ گمان ہمیش ات کہ نوں مسلم لیگ ءُُ پی پی پی ءِ وارثی ءِ واک ءُُ اکتیار ہلاس بنت ءُُ ملک ءَ روزگار ءِ گیشی بیت ءُُ وشحالی کیت۔ عمران خان ءِ مستریں اوگام ہمیش ات کہ ملک ءَ گرانی ہلاس کنگ ءُُ نواز شریف ءُ ُ آئی ءِ کہول ءُُ زرداری ءُُ آئی ءِ کہول ءَ کہ ہرچ زرے چہ ملک ءَ پُل اتگ ءُُ برتگ آ دراہ پچ گرگ ءُُ آرگ بنت۔ آئی ءِ دومی اوگام ایش ات کہ ملک ءَ کرپشن ہلاس کنگ بیت۔

اے وہد ءَ عمران خان ءِ حکومت ءَ سالے پُر بوھگی انت بلئے عمران خان ناں نواز شریف، زرداری ءُُ آہانی کہولانی پل اتگیں زرانی پچ گرگ ءُُ آرگ ءَ سوبین بوتگ ءُُ ننکہ کرپشن ءِ ہلاس کنگ ءَ۔ البت ءَ اے 9ماہ ءَ کہ ہرچی احتسابے بوتگ ملکی ءُُ درملکی ءُُ چاگردی رسانک در ءَ اے گمان محکم کتگ کہ اے ایوک ءَ لہتیں چیریں واک ءُُ اکتیارداریں ادارگ ءُُ عمران خان ءَ سیاسی دگیری داروکیں مردم ءُُ گلانی حلاپ ءَ بوہگ ءَ انت۔

پرچکہ اگاں نیب مسلم لیگ ءُُ آئی ءِ ھواریں حکومتانی حلاپ ءَ گامگیج زورگان انت گڈا ہمے گامگیج ماں بلوچستان ءُُ صوبہ خیبر ءَ پرچہ زورگ بوہگ ءَ نہ انت؟ آیا بلوچستان ءَ چہ ایندگہ صوبہاں کم کرپشن بوتگ؟ بلوچستان ءَ میرانی ڈیم زدگانی زرانی بہر ءُُ بانگ بہ بیت، گوادر پورٹ ءِ جیڑھ، سیندک ءُُ ریکوڈک پروجیکٹانی ٹھیکہانی جیڑہ بہ بیت۔ ایشانی سرا نیب پرچہ کر ءُُ کور اِنت؟گوستگیں ءُُ انوگیں وزیرانی مالی ءُُ جائیدادی پوزیشن چارگ بہ بیت۔

گڑا دراہ لہتیں سالاں ارب پتی بوتگ انت آیا نیب اے گپ ءَ نزانت کہ اے مال ءُُ زر چہ کجا اتکگ انت؟ عمران خان ءِ گوں مہلوک ءَ سیمی کول ءُُ مسام اے بوتگ کہ آ ملک ءَ بیروزگاری ءَ ہلاس کنت ءُُ پاکستان ءِ زرءَ (ڈالر ءِ مقابلہ ءَ) محکم کنت تنکہ پاکستان ءِ وام مہ ود انت ءُُ مہلوک ءَ گرانی مہ پروش ایت بلئے مہلوک گندگ ءَ انت کہ اے وہد ءَ ڈالر 151کلدار ءَ سر بوتگ ءُُ داں بجٹ ءَ 220کلدار ءَ روت۔ ایشی ءِ سوب ءَ پاکستان ءِ وام دپتر ءِ برزتریں بالاد ءَ سرانت۔ گیس،بجلی ءُُ پٹرول ءِ نرک400درسد ود اِتگ انت۔ ٹیکس ایوک ءَ ملازم ٹک ءَ گرگ بوہگ ءَ انت۔

اے جاوران گرانی ہنچو گیش بوتگ کہ مہلوک ءِ زرت ءُُ زور ءِ ذکت ءَ جواب داتگ۔ ملک ءَ ہوار بلوچستان ءَ بیروزگاری سک باز بوتگ بلوچستان ہما دمگ انت کہ ادا پنجاب ءُُ سندھ ءُُ صوبہ خیبرءِ وڑا کاروبار ءُُ روزگار ءِ دگہ درآسراتی نیست انت۔ اے جاوراں ملک ءِ مستریں پارٹیاں مسلم لیگ، پی پی پی ءُُ جمعیت ءُُ جماعت اسلامیءَ پتّ یک کتگ۔

کہ آ نوں چدوگیش حکومت ءِ گرانی، آئی ایم ایف ءِ ناروائیں شرط ءُُ معاہد ہ ءُُ نیب ءِ بے سر ءُُ پادیں احتساب ءِ حلاپ ءَ یک جنزے بندات کن انت۔ اگاں عمران خان ءُُ آئی ءِ صوبہانی حکومت ہمے گپ ءَ انت۔ کہ اپوزیشن چہ نیب ءِ احتساب ءَ رکّگ ءِ ھاترا اے جنز ءَ بنا کنگ ءَ انت بلئے بائدیں حکومت سرپد بہ بیت ءُُ بزانت کہ اپوزیشن ءَ اے گامگیج ہنچیں وہدے زرتگ کہ مہلوک چہ حکومت ءِ 9ماہ ءِ گامگیجاں بیزار ءُُ آسیگ انت۔

ءُُ اگاں واکداراں سُد ءُُ سما نہ کت،گڈا اپوزیشن چہ مہلوک ءِ اے بیزاری ءَ نپ ءُُ سیت گرگ ءِ جہد ءَ کنت ءُُ پہ حکومت ءَ نہ گیگ ءُُ نہ وشیں جاور ودی کت کنت پرچکہ اپوزیشن کتہ کار ءُُ حکومت نوک بلد ءُُ کم گشاد اِنت۔اگاں حکومت اپوزیشن ءَ نزور کنگ لوٹیت گڑا بائدیں مہلوک ءَ راآسراتی بہ دنت۔بیروزگاری ءُُ گرانی ءَ کم بہ کنت۔