نیشنل پارٹی ءِ کماش ڈاکٹر عبدالمالک بلوچ ءَ وتی یک گشتانکے ءَ گشتگ ات کہ بلوچ راج ءِ مستریں دشمن ہیپاٹائیٹس انت۔ ڈاکٹر عبدالمالک ءِ نیت بلوچ راج ءُُ آئی ءِ رہشوناں آگہہ ءُُ شیوار کنگ انت،کہ اے دوئیں نادراہی اگاں گر ءُُ دار کنگ مہ بنت گڈا بلوچ راج ءَ را مزنیں نکس ءُُ تاوانے دئینت۔ اے دگہ بنگپے کہ واجہ ڈاکٹر عبدالمالک بلوچ ءَ وتی سروزیری ءِ وہد ءُُ پاس ءَ اے نادرھانی گر ءُُ دار ءِ حاتر ءَ چے گامگیج زرتگ؟

بلئے یک لیڈر ءَ رہشونے ءِ جہت ءَ آئی ءَ وتی اے ذمہ واری پیلو کتگ کہ بلوچ راج ءَ را آئی ءِ چاگردی ذمہ داری شون داتگ کہ اے وہد ءَ راج ءِ مستریں دشمن کئے انت؟ اے گپ ءَ دیریں کہ آزگ سمائیں مردماں ماراتگ ءُُ درشان ہم کتگ کہ بلوچ دمگاں گچینی مکران ءُُ چاغے ءِ دمگاں تھیلیسمیا ءُُ ہیپاٹائیٹس ءِ نادرا گوں ترندی شنگ ءُُ تالان بوہگ ءَ انت۔ مکران ءَ میرانی ڈیم ءِ بندگ ءَ پد2007 ءِ ہار ءِ سوب ءَ میرانی ڈیم ءِ کش ءُُ گورانی میتگاں ہیپاٹائیٹس ءِ نادراہی سک شنگ بوہگ ءَ انت ءُُ اوداں چشیں لوگے نیست کہ ہیپاٹائیٹس ءِ نادراہ یے مہ بیت۔ بلئے شُمی ایش انت۔

کہ ناں سروے بیت ءُُ ننکہ ہسپتالاں اے نادراہیانی بابت ءَ داشتگیں ریکارڈ ءُُ رسانک ءُُ مہلوک ءَ سرکنگ بنت۔ اے درچ ءَ بلوچستان ءِ بازیں مزن نامیں لیڈر ءُُ رہشون وت ہم ہیپاٹائیٹس ءِ نادررہی ءِ ہرجان انت بلئے سر پر نہ بیت کہ اے دوئیں نادراھانی حلاف ءَ پرچہ گامگیج زورگ نہ بیت۔ میرانی ڈیم ءِ ہار ءَ رند استیں کسر گوستگیں 12 سال ءِ ڈکال ءَ پورا کتگ کہ آپ ءِ نہ بوہگ ءِ سوب ءَ مردم مجبور ءُُ لاچار بوتگ انت کہ کنڈ ءُُ کابیلانی آپاں بور انت۔ اے ڈکال ءَ چاغے ءِ دمگ چہ درستاں گیش آماچ بوتگ۔

بلئے ملک ءَ کس سرپد نہ انت کہ دمگ ءَ چنچو مردم اے دوئیں نادراھہیاں گور جتگ انت ءُُ اشانی سوب چے انت؟ ءُُ چے وڑا دارگ بوت کن اَنت؟ بدبحتی ایش انت کہ اے میانجی ءَ اگاں حکومت ءَ وتی ذمہ واری پیلو نہ کتگ انت مزنیں لیڈر گیش وتی جند ءِ نادراہیاں نہ بوتگ انت بلئے بلوچستان ءَ بازیں ”سول سوسائٹی“ ءُُ دگہ بازیں ”این۔ جی۔ او“ ءِ کار ءَ انت کہ وتی سنچ ءُُ بود ءِ گپ ءَ ہچبر نہ تس انت۔

بلئے اے ادارگ ہم بلوچستان ءَ ایڈز، ہیپاٹائیٹس ءُُ تھلیسمیا ءِ نادراھیاں گر ءُُ دار وتی جاگہ ءَ پہ مہلوک ءَ آگہی ءُُ سرپدی جنزے ہم دیم ءَ نیارانت پرچکہ اے ادارگ اگاں ہشکیں چاہ ءُُ چلم ءُُ فوٹوشین ءُُ وت گلاہی ءِ نادراہیاں دربیا انت گڈا پہ مہلوک ءِ آکبت ءَ اے کار ءَ جوان تریں وڑے کت کن انت بلئے کئی گوش ءَ مورے بوارت؟بندری گپ پدا ہمودا کیت ءُُ اوشیت کہ اے درچ ءَ اولی ءُُ بنکی ذمہ داری حکومت ءُُ ریاست ئیگ انت۔

کجام ہم ریاستے ءِ گوں وتی جاہ مننداں اے منگ نامگ ءَ کنت کہ جاہ منند ریاست ءِ ہمک روچی کارانی حاترا ریاست ءَ ٹیکس دنت ءُُ ریاست ہمے ٹیکس ءِ بدل ءَ آئی ءَ را جان سلامتی ءُُ وانگ ءُُ سلامتی ءِ مانزمانی دنت بلئے ما چہ انوگیں حکومت ءُُ ریاست ءَ اے حاجت کت کنیں آ وتی جاہ منندانی زند، عزت ءُُ ساہ ءُُ جان ءِ رکینگ ءُُ سلامتی ءِ حاترا وتی ذمہ واریاں پیلو کنگ ءَ انت اگاں ریاست کنگ ءَ نہ انت۔

گڈ اہمے ریاستی چاگرد ءَ نندوکیں لیڈر ءُُ رہشون،ڈاکٹر ءُُ طبیب، این۔ جی۔ او ءُُ سول سوسائٹی چے کنگ ءَ اَنت؟اگاں ہمے وڑا ریاست ءُُ رہشون سول سوسائٹی ءُُ چاگرد گلاں ہچ نہ کت گڈابلوچ ءِ دژمن ایمن بہ باں کہ گوں بلوچ ءَ ہرچی کنت،ہمے نادراہی کن اَنت۔