بلوچستان وتی کارمرزی ءَ چہ دوسری گیش گروک(بجلی) ودی کنگ ءَ انت بلئے آئی ءَ گروک چہ ایندگہ دمگ(صوبہ) آں کم دئیگ ءَ انت۔بلوچستان اے وھد ءَ 2400میگاواٹ گروک ودی کنگ ءَ انت ءُُ بلوچستان ءِ زلورت ایوک ءَ 1400 میگاواٹ انت۔

وہدیکہ بلوچستان ءَ ایوک ءَ 1000 ءَ کم میگاواٹ گروک دئیگ بوہگ ءَ انت۔ ادا اے گپ گیر آرگی انت کہ اے گروک ءِ کارمرزی ءَ مکران ءِ سے ئیں (ضلع) تربت،گوادر ءُُ پنجگور ھوار نہ انت پرچکہ مشرف حکومتءَ گوں ایران ءَ یک منگ نامگے کتگ کہ آ مکران ءِ دمگ ءَ چہ ایرانی بلوچستان ءَ گروک دنت۔ ایران ءِ حکومت ءِ گشگ ہمیش بوتگ کہ درائیں پاکستانی بلوچستان ءَ گروک دنت بلئے پاکستان ءِ حکومت ءَ اے گپ نہ منتگ۔

اے درگت ءَ ماہ یے ءَ پیسر ایران ءِ دری کارانی وزیر ءَ کہ پاکستان ءِ تروتاب کتگ ات اے وہد ءَ ہم آئی ءَ ہمے گپ جتگ، چریشی ءَ پد ایرانءِ ماں پاکستان ءَ جہگیر ءَ ہم گوں پاکستانی بیپاری مردماں کوئٹہ ءَ یک مراگشے ءَ اے گپ ءِ سرا یکبرے پدا زور پرداتگ کہ ایرانی حکومت پاکستانی بلوچستان ءَ سرجمی ءَ گروک پجارینگ ءَ دل ستکءَ ساڑی انت بلئے تنگہ چہ پاکستانی حکومت یا بلوچستان ءِ جند ءِ دمگی حکومت ءِ نیمگ ءَ اے گپ ءِ ہچ وڑیں پسہ ءُ ُ جواب نہ یتکگ اگاں کہ ایران ءِ حکومت ماں مکران ءَ اے وہد ءَ چہ پاکستانی گروک ءِ نرکءَ باز کم نہادے ءَ گروک دئیگ ءَ انت۔

اے درچ ءَ اگاں پاکستان ءِ حکومت ءَ چہ ایران ءِ نیمگ ءَ بلوچستان ءِ حاترا چہ آئی ءِ جند ءِ ودی کرتگیں گروک ءَ کم نیادءَ رسگان انت گڈا اشی بہا نہ زورگ ءِ مجبوری چی انت؟ پرچکہ اگاں پاکستانءِ حکومت اے وڑا بہ کنت گڈا بلوچستان ءِ سرا کہ ہما 800/1000 گروک ہرچ بوہگ ءَ انت آ پہ پاکستان ءِ مھلوک ءُُ حکومت ءَ سرکیت کہ پہ حکومت ءَ حرابیں گپے نہ انت۔

دومی گپ ایش انت کہ اگاں بلوچستان 2400 گروک پیداک کنگ ءَ انت ءُُ بلوچستان ءِ حاجت ءُُ زلورت1400 انت گڈا بائدیں حکومت اے سوڈگ ءَ بکنت کہ چہ بلوچستان ءَ پیداک بووکیں 2400 گروک ءِ تہابلوچستان ءِ زلورت ءَ بکش ات ءُُ ایندگہ سرتکگیں گروک ءَ نیشنل گریڈ ءَ بدنت۔ چریشی ءَ ایش بیت کہ پاکستان دنیا ءَ گشت کنت کہ درائیں پاکستان ءَ گروک ءِ کمی نہ انت آئی ءِ یک دمگ(صوبہ) یے چہ گروک ءِ پیداک کنگ ءَ وت سیر انت۔

اے درگت ءَ آدری بیپاری مردماں دلگوش کت کن انت کہ اگاں ایندگہ پاکستانی دمگاں گروک ءِ کمی انت بلئے بلوچستان ءَ گروک سرجم ءُُ برجم انت پمشکہ آ”سرمایہ کاریءَ“ بلوچستان ءَ بیا انت۔ اگاں گوں حکومتءَ اے ہم نہ بیت گڈا بلوچستان ءِ مکران دمگ ءَ بائدیں سرجمی ءَ گروک ءِ دئیگ ءِ سوڈگ کنگ بہ بیت پرچکہ گروک ءِ کمی ءِ آماچ پاکستان انت،ایران ایشی کمی ءِ ہچ وڑا آماچ نہ انت۔

وھدیکہ ایران گروک ءِ کمی آماچ نہ انت گڈا مکران ءِ مردم پرچہ چو پاکستان ءِ ایندگہ مردمانی وڑا گرم ءِ حزاب ءِ آماچ انت؟ حکومت ءِ درائیں واکدار اے گپ ءَ زان انت کہ مکران ءُُ گچینی کیچ ءُُ گوادر دنیا ءِ گرم تریں دمگ انت، گرماگ ءَ ادا روچ آس گوار ایت پدا اے موسم ءَ اگاں ادے مھلوک ءَ گروک مہ رس ایت گڈا چو آپ ءَ دراتکگیں ماہیگ ءَ بنت۔

پمشکہ مئے لوٹ گوں بلوچستان ءُُ گچینی مکران ءِ حکومتی جہگیراں ہمیش انت کہ اگاں آ حکومت ءَ پرے کار ءَ مجبور کت نہ کن انت کہ حکومت بلوچستانءَ پیداک بوتگیں نیم گروک ءَ بلوچستان ءَ بہ دینت گڈاہمے گروک کہ چہ ایران ءِ حکومت ءِ نیمگ ءَ کمیں نرکے کہ دئیگ بوہگ ءَ انت آبائدیں جوانین ءُُ سرجمیں وڑے ءَ مکران ءِ مردماں دئیگ بہ بیت۔