بلوچستان ءِ دمگ پاکستان ءِ ہما دمگاں چہ یکے کہ وانگ ءُُ زانگ ءِ پڑاں نوکی دیم ءَ روان اِنت۔ بلوچستان ءَ اسکول وَ است اَنت بلئے وانینوک نیست،ءُُ ہما جاہ ءَ کہ وانینوک است گڈاں اسکول نیست اِنت۔اے کارحکومت ءِ ذمہ واری اِنت کہ بچارایت ہما جاہاں کہ اسکولءِ کمی اِنت اسکول بدنت ءُُ اے ہم کھڈن کنگ ہمائی ذمہ واری اِنت کہ ایوک ءَ اسکول ءِ ماڑی ءِ بندگ ءَ آئی ءِ کار سرجم نہ بیت بلکیں آ اے ہم بچاریت کہ اسکولاں استاد ءُُ وانینوک است بہ بیت۔دومی بلوچستان ءَ ہما کہ بے روزگاری ءِ توپان اِنت۔

آ یک شلہ برجاہ اِنت ءُُ ایشی ءِ دارگ ءُُ کم کنگ ءَ حکومت سرجم ءَ بے سوب بوتگ۔ ہمیشی ءِ سوب ءَ بازیں مردمے وتی زہگاں وانینت نہ کنت۔حکومت ءِ بائد اِنت کہ اول وَ سرکاری نوکری پہ ہما مردماں کہ وانندگ انت پریشاں نوکری دیم ءَ بیاریت بلئے اے کساس یک ءُُ دو ءِ مہ بیت۔پرچکہ نوں وَ اے حبر پدر انت کہ یک ءُُ دو پوسٹان پہ ہزاراں حساب ءَ مردم کاینت وتی کاگداں جم کن اَنت ءُُ پوسٹاں ہما مردم بر اَنت کہ سفارشی ءُُ زردار بہ بنت۔ پمشکا حکومت ءِ بائد اِنت کہ آپوسٹانی کچ ءُُ کساس ءَ ہزارانی اگاں نہ کنت کم چہ کم سدانی حساب ءَ بہ بنت۔

دومی ہما مردم کہ نہ وانندگ اَنت پرآواں ہم دست کاری ءُُ ہنرکاریءِ کدگ جوڑ بہ کنت ءُُ آوانی روز گاری ءِ درے پچ بہ بیت۔ مردم کہ روزگار بنت داں اے وتی زہگاں وانگ ءَ روان دینت ءُُ بلوچستان ءَ کہ نہ وانندگی اِنت آ کم تر بیت۔بلوچستان ءِ مہلوک ءَ را زر نیست اِنت پمشکا آ وتی زہگاں پرائیوٹ اسکولاں واننت نہ کن اَنت پرچکہ آوانی فیس چہ لس مردمے ءِ گنجائش ءَ در اِنتءُُ حکومت یا سرکاری اسکولانی جاور انی گپ نہ بیت۔انچو کہ پیسر ءَ گپ بوتگ اَت کہ اسکولان وانینوک نیست ءُُ جاہ یے اسکول ءِ جند نیست اِنت۔

اے دیمروئی ءِ دور ءَ کمپیوٹر ءُُ انٹرنیٹ ءِ دور ءَ بلوچستان ءِ زہگاں وانگ اگاں مہ رسیت آ گوں اے ترند گامیں دنیا ءَ چون ءُُ چتور ہم کوپگی کت کنت۔اے حکومت ءِ ذمہ واری اِنت کہ آ زہگاں پہ انچیں ماحولے ودی بہ کنت کہ آ وتی زہگاں پہ ارزانی ءَ اسکولے ءَ وانینت بہ کنت۔ انوگیں حکومت ءَ گپ باز کتگ بلئے وتی گپاں چہ یکے اوں پیلو نہ کتگ۔ بلوچستان ءِ اے کسانیں دمگ کہ مدام ایشی ءِ بہر ءَ ہچی نہ بوتگ۔اے حکومت ءَ دور ءُُ باریگ ءَ ہم چشیں حاصیں اومیتے گندگ نہ بیت کہ اے گرمیں لوار ءَ سارتی یے بیاریت۔

زہگانی بنکی وانگ بائد آوانی وتی ءِ جندءِ زبان ءَ بہ بیت بلئے اے دگہ دمگانی پیم ءَ بلوچستان ءَ ہم اے پیم بوہگ ءَ نہ اِنت۔یک کسان سالیں زہگے پیسر قومی زبان بزاں اردو ءَ ہیل دارکنگ بیت۔پدا آئی ءَ را گشگ بیت کہ اردو بے کار اِنت انگریزی ءَ بوان ءُُ انگریزی بزان اگاں انگریزی نزانت داں ہچی بوت نہ کنت۔ پمشکا آئی ءَ را انگریزی وانگ پرماہگ بیت۔ انگریزی ءِ وانگ ءَ پد نوں آوت بود کنت کہ آئی ءَ را وت زبانے است ءُُ آ وتی جند ئے زبان ءِ بابت ءَ ہچی نزانت۔۔۔۔۔