اے وہد ءَ بلوچستان ءِ حکومت وانگ ءُُ زانگ ءِ بہرگ ءَ یک سد ءُُ چاردہ سوجکارانی درکنگ ءِ جیڑہ ءِ آماچ انت۔ اگاں کہ بلوچستان ءِ سروزیر جام کمال ءَ وتی کیچ ءِ تروتاب ءِ وہد ءَ سکریٹری ایجوکیشن نیمگ ءَ بے جست ءُُ پرس ءَ درکتگیں سوجکارانی پدا برجم کنگ ءِ سدکی داتگ ءُُ کیچ ءِ ڈی سی ءُُ اے سی کیچ واجہ خرم شہزاد ءِ کماشی ءَ یک کمیٹی یے ہم ٹہینتگ کہ اے 114 ٹیچرانی درکنگ ءِ جاوراں بچار ایت۔ بلئے گامگیج وت سرا زورگ نہ بوتگ۔

اگاں اے سوجکاراں بلوچستان سروزیر ءِ آہگ ءِ روچ ءَ کیچ سرکٹ ہاوس ءِ در ءُُ ر اہ بند مہ کتین انت۔گڈا اے وڑیں گامگیج زورگ نہ بوتگ ات۔ اے پدرائیں گپے کہ اگاں برزی واکداراں مزنیں ءُُ گرانیں زورے سرا مہ بیت گڈا ہالو ہالو لس مہلوک ءِ گپ ناں گوشدارگ بیت ءُُ ننکہ زورگ بلئے اگاں مہلوک ءِ نیمگ ءَ پرزوریں لوٹ ءُُ زہرشانی یے بہ بیت گڈا برزی ءُُ مزنیں واکدار ہما دمان ءَ وتی گپ ءَ بج انت ہنچو کہ چد وپیش ماہ یے ءَ ساری پنجگور ءِ ٹیچرانی درکنگ ءِ وہد ءَ بوتگ۔ اے بابت ءَ بازیں گپے دیم ءَ آہگ ءَ انت۔وانگ ءُُ زانگ ءِ ہندی واکدارانی ردا درکنگ ءِ ردی کیچ ءِ ڈی سی ئیگ انت۔

وہدیکہ ڈی سی،آفس ءِ مردم ایشی ءِ ذمہ وار ہندی وانگ ءُُ زانگ ءِ واکداراں کن انت بلئے چرے گپاں زاہر بیت کہ میار ٹیچرانی نہ انت بلکیں ڈی سی آفس یا ڈی۔ ای۔ او آفس ئیگ انت۔ اے ٹیچرانی سرا بہتام ہمیش انت کہ اے وتی پوسٹانی سرا موجود نہ انت بلئے اشاں گیشتریں ٹیچر ہما انت کہ گوں سدکی ءَ گوش انت کہ کیچ ءِ آر۔ ٹی۔ ایس۔ایم۔ ایس ءِ واکداراں گوں آہاں بدنیتی کتگ پرچکہ اشانی تہا بازیں ٹیچر حاضر انت ءُُ ہما ٹیچر کہ بحرین، مسقط، دبئی ءُُ ایران ءَ جاہ منند انت آہاناں پرچہ غیر حاضر پیش دارگ نہ بوتگ؟ دومی ہمے اسکولاں کہ اے ٹیچرانی نام پہ بدنتیی دئیگ بوتگ انت۔

ہمے اسکولاں بازیں ٹیچر غیر حاضر انت۔ بلئے آگوں آر۔ٹی۔ایس۔ ایم۔ ایسءِ ہچبر گندگ نہ بنت۔ آر۔ٹی۔ ایس۔ ایم۔ ایس اے رپورٹ ءَ بازیں ٹیچر ہما انت کہ وفات بوتگ انت ءُُ بازیں ہما انت کہ ریٹائرڈ بوتگ انت چریشی ءَ کیچ ءِ آر۔ ٹی۔ ایس۔ ایم۔ ایس ٹیم ءِ نالائقی ءُُ نابودی درا بیت کہ آ سہی ءُُ سرپد نہ انت کہ کئے وفات بوتگ ءُُ کئے ریٹائرڈ؟ دومی ایش کہ اے ٹیم بید ء جست،پرس ءُُ تحقیقءَ ایوک ءَ وتی ذاتی پسند ءُُ ناپسند ءُُ سیاسی زلورتانی پدا ٹیچراں حاضر ءُُ غیر حاضر کنت کہ آئی ءَ گوں راستی ءَ ہچ وڑیں سیادی یے نیست۔ دومی گپ اے دیم ءَ اتکگ کہ ہندی واکدارانی گشگ انت۔

کہ اے ٹیچر سے سال انت کہ غیر حاضر انت۔ ادا اے گپ پاد کیت کہ اگاں ٹیچر سے سال انت غیر حاضر انت گڈا داں سے سال ءَ اشاں پرچہ پگار ءُُ تنخواہ دئیگ بوتگ؟ اے حساب ءَ اے جرم ءَ وت ہندی ایجوکیشن آفیسر ہم ہوار انت اگاں اے ٹیچراں درکنگ بوتگ گڈا اشانی ہمرائیءَ بائدیں سکریٹری ایجوکیشن ہندی ایجوکیشن آفیسراں ہم بکش ایت اگاں ناں گڈا سکریٹری ایجوکیشن بائدیں اشانی کشگ ءَ ساری یک پولکاری ءَ کمیٹی یے جوڑ بکنت ءُُ بچار ایت۔

کہ کئے غیر حاضر انت ءُُ کئے پہ سیاسی کست ءُُ کینگ ءَ کشگ بوتگ؟ہما ٹیچر کہ غیر حاضر انت آہاں بے شک کشگ بہ بیت بلئے اے درگت ءَ گوں ہندی آفیسرانی سیاد، عزیز ءُُ وارثاں گوں ریا ءُُ رو کنگ مہ بیت پرچکہ ہمے ترس ءَ درکتگیں ٹیچرانی لوٹ بوتگ کہ ڈی سی ووتی کمیٹی ءَ ہندی ایجوکیشن آفیسرانی نام مان مہ گیج ایت ءُُ ڈی سی ءَ اے گپ ءِ سرا عمل کتگ کہ کہ باز جوانیں گامگیجے!