گشگ ہمے بیت کہ یک راجے ءِ دیما بروک ورنا اَنت بلئے ہمے ورنا اگاں پہ روز بہ بنت گڈا؟ اے جاور بلوچستان ءِ انوگیں نہ اَنت بلکیں اے جاوراں دیر انت کہ گوں بلوچستان ءَ دیمپان اَنت۔ کار ءُُ روزگار ءِ نیستی ءَ وانندگیں مردم بدکاریاں گلائش بنت ءُُ چہ حق ءُُ مادنیں راہ ءَ دربنت۔ ایشی ءِ سرجمیں ذمہ واری حکومت ئیگ اِنت۔اگاں حکومت اے نیمگ ءَ دلگوش بدنت داں اے جیڑہ ہمے زوتاں گیشوار بوت کنت۔

پرچکہ بلوچستان ءَ حالیگیں جاہ انچو باز انت کہ درائیں زردار ءُُ سفارشی ءُُ سیاسی مردمانی مردمانی روزدئیگ ءَ پد ہم ہمنچو روزگار پہ غریب ءُُ بزہ کاراں مانیت کہ پرآہاں راہ ءُُ درے پچ بیت کنت بلئے اے حکومت ءَ را گیش ”کشمیر بنئے گا پاکستان“ ءَ چہ موہ یے بہ رسیت گڈاں۔یکبرے بائد انت اے حکومت وتی جندئے جیڑہاں گیشوار بہ کنت،وتی ملکی جاور کہ روچ پہ روچ حراب تر بوہان اَنت،ہمک روچ یک سیاسی سروکے درکیت پہ روانک ءُُ زارشانی ءَ،ہمک روچ نودربرانی پہ وتی حقانی جست ءَ زارشانی اِنت،گران نیادی آزمان ءَ سر انت،ءُُ دو وہدءِ ورگ چہ نیزگاریں غریب ءِ شام ءَ در انت۔

بلئے اے حکومت ءِ سروکاں ہچ سدئے ماں سراں نیست اِنت کہ ملکے است،اے ملک ءَ را مردم مان،اے ملک دیمروئی کنگ لوٹیت،دنیا ماہ ءُُ آزمان ءَ سر انت،انوں یک نوکتریں حال کہ ہندوستانی سائنسداناں یک راکٹے دیم پہ ماہ ءَ روان داتگ بلئے سر نہ بوتگ ءُُ اے تجربت ناکام بوتگ۔ہمے گپ زرتگ کہ ہندوستان بے سوب بوتگ داں سرجمیں ہپتگے ءَ ہمے یکیں گپ پاکستان ءِ درائیں حالرسانکی ادارگاں گون بوتگ بلئے غیرتی ترمپے ماں ایشان چماں نہ گوایت کہ وت ایشاں چنچو راکٹ دیم پہ ماہ ءَ روان داتگ؟؟؟ وتی سائنسی کدگ چنچو محکم انت۔

دومی حالانی رداں ناسا ءَ گشتگ کہ اے راکٹ انگت ءَ ماں خلا ءَ اِنت ءُُ ایشی ءِ شوہازی بوہگ ءَ انت۔بلکیں آوانی گشگ انت کہ اے راکٹ وتسرا دیم گار نہ بوتگ بلکیں دگہ دری تاکتے ءَ ایشی ءِ راہ بدل کتگ۔ بلئے اے گپ ءَ بہہ اِد ءِ حالرسانک نہ گشنت۔ دومی ہمے یکیں گپ کہ کمشیر بنئے گا پاکستان،شر انت کہ آہود ظلم بوہگی اِنت، مردم کشگ بوہگ اَنت،ورگی سامان نیست انت بلئے کمے وتی جندئے ملک ءِ جاوراں بچار کہ وتی جندئے مردماں گوں انچو بوہگ انت اے چیز ءَ چہ درائیں سیاسی سروکاں وتی چم بند ءُُ گوش کر کرتگ اَنت۔

پیسر ءَ گپ بوہگ ءَ اَت کہ بلوچستان ءِ ورہانی روزگاری یے اے ہم چنائی ءَ حکومت ءِ اولی ذمہ واری ہمیش اِنت کہ وتی وانندگیں ورہاں زورگار بہ دنت دانکہ آوتی درائیں علم ءُُ صلاحیتاں پہ قوم ءُُ راج ءَ بدینت۔اگاں نہ پدا ہمے ورناکہ ناشرکاریاں گون بنت داں ہمے گشگ بیت کہ اے ناشرکار اَنت بلئے اے بہہ چارگ بہ بیت کہ اے ناشرکاریانی ودی کنوک وت حکومتی مردم اَنت۔

اے کہ جلسہ ءُُ جلوساں کایاں ایشانی گپ ءُُ حبراں اگاں کسے بہ گندیت ءُُ بچاریت داں انچو گمان بیت کہ اے مردءَ را درائیں راج ءِ غم سینگ ءَ اَنت بلئے جلوس ءَ پد کسی گوشی مورے ہم نہ وارت چریشی ءَ ہمے پدر بیت کہ نا اے حکومت ءُُ نا اِدئے سیاسی مردماناں وتی ورناہانی سد ءُُ پگرئے ماں لاپاں است اِنت۔ یکیں نواز ءُُ زرداری ءِ حاندان گپتگ کہ ایشاں ملک ءُُ راج ءِ زر وارتگ انت بلئے درائیں سیاسی سروکانی اگاں بینک چارگ بہ بنت داں زانگ بیت کہ کیا قوم ءِ زر وارتگ اَنت۔