بلوچ ءِ چاگرد چہ اے وڑیں جوانیں چیزاں سرریچ اِنت کہ آ یک نیمگے اے راجءِ ربیدگءِ زندگیں بہراَنت ءُُ دومی نیمگا بلوچ ءِ ساچستی کدءُُ کئیلاں پدرکن اَنت کہ چریشاں اندازگ جنگ بیت کہ اے راجءِ تہءَ ساچست کاریءِ چنچو توان است۔ اے گپ وَ راستے کہ Necessary is the mother of inventionبزاں کہ زلورت انسانءَ را ھروڑیں چیزءِ ساچگ پرمائیت۔

بلئے اے ھوں ھیال دارگی اِنت کہ ھما چیز کہ آئیءَ انسان پہ وتی لوٹءُ گزرانی ھاترا جوڑ کنت یاکہ درگیجیت گڑا آئیءِ تہءَ انسانءِ دماغی توان ءُ ساچستی زور چنکدر گندگءَ کئیت۔۔؟ بلوچ وھدءُ زمانگاں چہ کوہءُ ُ گراں،جنگلءُُ لداں زند گوازینانءُ ُ پیداک اِنت۔ نوں زاھر اِنت کہ آئیءِ جوڑ کتگیں دستکاری ھوں ھمے وڑیں بنت کہ جنگلءُ ُ کوھی زندمانءِ لوٹ اَنت۔

سواس بلوچ ربیدگءِ یک زندگیں بہرے کہ اشیءِ تہءَ راجی دودمانے پدر بیت ءُُ مروچی بیستءُُ یکمی کرنءَ ھوں اگاں بلوچ نودربر یاکہ لبزانکی گل بلوچ ربیدگی روچءَ دار اَنت گڑا سواس الم پادءَ کن اَنت۔ سواسءَ اگاں ساچستی نگاہاں بچارئے بزاں کہ اشیءِ جوڑ کنگءِ وڑءُُ پئیمءُُ جوڑ کنگءِ وھداں بازیں اڑءُ جنجالاں مردم سما بکنت گڑا اندازگ جنگ بیت کہ اشیءِ تہءَ انسانی ساچستانی مزنیں بہرے مان اِنت۔ بلوچ راج دنیاءِ ازگار ترین ربیدگءِ واھند اِنت کہ اے ربیدگی چیزانی تہءَ یکے سواس اِنت۔

سواس ھما مہرءُ مھکمیں چپل اِنت کہ بقولءِ کماشانی کہ اے پادءَ کنگا اُمرے جنت۔ اے کدی جوڑ بوتگ، چینچو کوہنءُ کدیم اِنت اے بابتءَ گپ جنگ باز گران اِنت پرچہ کہ داں بلوچ اَست اِنت سواس آئیءِ پادانی ھمراہ اِنت۔

سواس چون جوڑ کنگ بیت:
سواس جوڑ کنگءَ بنداتیءُ ھژدری چیز کوہی پیشّ اِنت۔پیشّ یک دابےءِ درچکے کہ گیشتر کوہی دمگاں رُدیت۔دگہ یک گپےءِ ھوں ھیال گورکنگی اِنت کہ پیشءِ ھمراہیءَ سواس جوڑ کنوکیں مردم گونی ئی ٹالاں ھوں کارمرز کن اَنت ءُ باز رندءَ پُچّ ءُ گونیءِ ٹالاں ھوں زور اَنتءُ سواس جوڑ کن اَنت ءُ سواسءِ ڈولدار کنگءِ واستہ دگہ چیز ھوں کامرز کن اَنت بلئے درستاں چہ کوہن ترءُ زیبا تریں سواس پیشّ ئیگ اِنت۔سواس جوڑ کنگءِ ھاترا بنداتی دو المی ئیں چیز اَنت کہ یکےءَ جَتکءُ دومیءَ تِجیگ گوش اَنت۔

جَتک: کوہی پیشءَ زور اَنتءُ اشیءَ سِنگءِ سرا چوپ اَنت کہ آ دوئیں سِنگانی نام سَر چوپءُ پُن چوپ اِنت۔پیشانی چوپگءَ رَند اشاں یک ءُ دو روچ یا کہ اشیءَ گیش روچ آپاں کن اَنت دانکہ پیشّانی زہرگ در بئیتءُُ مھکم بہ بنت۔وھدے آپاں چہ درے کن اَنت گڑا تاپءَ دئیگ ءُ ھُشک کنگ بنت۔ اشیءَ جَتک گوش اَنت۔ جتک وھدے جوڑ بیت گڑا داں بازیں مدتےءَ ایر بکن ءُ پدا سواس گوپگءَ کامرزے کن ھراب نہ بیت۔

تِجیگ: اشیءِ جوڑ کنگءِ وڑءُ پئیم بزاں کہ processجَتکءِ وڑا اِنت بلئے جندے چہ جَتکءَ جُتا اِنت۔ اے یک زَنڈیں سادے کہ بریسگءَ پد سنگءِ سرا چوپگ ءُ پدا آپاں کنگ بیت۔ وھدے ھشک بیت گڑا نرمءُ مھکم بیت، ھمیشیءَ تِجیگ گوش اَنت۔

جَتک ءُ تِجیگ ءِ جوڑ کنگءَ پد نی سواس گوپگ بیت۔ سواس گوپگ ھرکس نزانت بس لھتیں بلدیں Expertمردم سواس گوپگ زان اَنت۔سواسءِ بُنگیج چہ تِجیگ ءَ بیت کہ اشیءَ پد جَتک ھمے تِجیگءِ سرا گوپگ بنت۔ سواس جوڑ کنگءَ چینچو وھد لگیت؟ اے نوں ھما جوڑ کنوکءِ سر ءَ اِنت بلئے روچے اگاں نیم بیل وشیءِ سرا جنت۔گوپگءَ پد سواسءَ را کڑی بزاں کہ بَند پر کنگ بیت کہ آھاں سواس بند گوش اَنت۔
سواس بند گوں پیشّءَ ھوں جوڑ کنگ بنتءُ باز کس پہ زیبداریءِ ھاترا اشیءِ بنداں گوں گونی ءِ ٹالءُ پُچّءَ ھوں جوڑ کنتءُ پدا شوکیں پُل ھوں پرے کنت کہ زیبدار بہ بیت۔

بازارءَ سواسءِ نِہاد:نہاد گوں اشیءِ Quialityبزاں کہ شریءَ کار داریت۔ شریں تہرءِ جوانیں سواسانی یک جُتکےءِ نہاد 1500ءَ بگر داں 2500ءَ اِنت (کمءُ گیش بلکیں بیت)۔

ارزشتءُ پائدگ:

سواس یک باز ارزشت داریں چپلے کہ اشیءِ پادا کنگءِ بازیں پائدگ اَنت۔ اولی ھبر اش اِنت پیشءَ بلوچانی رہ رؤ کوہءُ گیابان بیتگاں کہ اودءَ لس چپل کارمرز کنگ بیتگ پمشکا سواس پادا کتگ اِش ءُ دومی ایش کہ سواسءَ وھدے کہ آپ بجنئے گڑا پاداں سک سارت کنت ءُ سپرءَ ھوں سُبکءُ وش اِنت۔

یک شریں جُتکے سواس داں سالےءَ رؤ کُت کنت۔ گوستگیں زمانگاں سورءِ وھداں سالونکءُ بانورانی ھاترا سواس گوپگ بیتگ کہ آروسءِ وھداں آھاں پاداں کتگ اَنت۔