بلوچی اکیڈمی کوئٹہ بلوچی زبان ءُُ لبزانک ءِ درستاں مستریں ادارگ انت کہ گوستگیں ششت سال اِنت کہ گوں بلوچی زبان ءُُ لبزانک ءِ سرا کار کنگ ءَ انت۔اے تک بلوچی اکیڈمی ءَ سدانی حساب ءَ کتاب چھاپ کتگ انت ءُُ ہمے کتاباں پہ مفت بلوچستان ءُُ چہ صوبہ در درائیں اکیڈمی ءُُ کتابجاہ ءُُ ہما وانگی کدگاں روان دئیگ انت کہ آ جاہاں بلوچی کتابانی پکار انت۔

ہمے زوتاں بلوچستان ءِ حزانگی وزیر ظہور بلوچ بلیدی ءَ اکیڈمی ءِ ترو تاب کتگ۔اکیڈمی ءِ کماش ءُُ سر کماش ءَ واجہ ظہور وش اتک کنگ ءَ پد درائیں اکیڈمی ءِ ترو تاب پرماتگ اَت۔ واجہ ظہور بلیدی ءَ اکیڈمی ءِ کماش ممتاز یوسف ءَ را اے سدکی دات کہ حکومت ہر پیمیں کمک ءُُ مدت ءَ ساڑی انت۔آئی ءَ گشتگ ات کہ حکومت ءَ دائم ءَ علم ءُُ ادب دوستانی کمک کتگ ءُُ اے بلوچستان ءِ مستریں علم دوستیں کدگ انت پمشکا ایشی ءِ ہرچند کہ کمک بوتگ کنت آ اش کنگ ءَ ساڑی اَنت۔

اکیڈمی ءِ سرکماش سنگت رفیق ءَ ظہور بلیدی ءَ را سرپدی دیان ءَ گشتگ اَت کہ بلوچی اکیڈمی کوئٹہ ءِ بدوا گیش بوہان انت بلئے آ وتی کاراں گوں پیشی حساب ءَ گیش دلگوش انت۔ انوں آئی ءَ وتی سالتاک بلوچستانیات چھاپ کتگ ءُُ نوں آ بلوچی انسائیکلوپیڈیا ءَ کار کنگ ءَ انت۔پمشکا اے کار ءِ سرجمی ءَ حکومت ءِ کمک درکار بنت۔ظہور ءَ گشتگ ات کہ حکومت ہر حساب ءَ گوں اے مزنیں کار ءَ اکیڈمی ءَ ہمکوپگ انت۔سنگت رفیق ءَ گشتگ ات کہ اکیڈمی ءَ پہ بلوچستان ءِ اے دگہ ادارگانی کمک ءَ حکومت ءِ نیمگ ءَ یک فائیلے روان داتگ ءُُ ما امیت کناں کہ اے فائیل ایر نہ بیت بلکیں ایشی ءِ سرا کار بیت ءُُ بلوچستان ءِ اے دگہ ادارگانی ہم مالی کمک کنگ بیت۔

اے دیوان ءَ بلوچی زبان ءِ لبزانت ءُُ ادیباں ہوار اے دگہ مزن اگدہیں مردماں بہر زرتگ اَت۔واجہ ظہور بلیدی ءَ اے گپ ءِ سرا اکیڈمی ءِ کماش سدکی داتاں کہ ہرچی حکومت ءِ دست ءَ بوت کنت آ گوں اکیڈمی ءَ ہمکوپگ انت۔ ابید چریشی ءَ ظہور بلیدی ءَ اکیڈمی ءِ کتابانی بہر ءُُ بانگی کار ءِ توسیپ کنان ءَ گشتگ ات کہ اے یک جوانیں کارے ءُُ چرے کار ءَ کتابانی وانگ ءُُ زانگ ءِ حب ءُُ واہگ گیش بوہان بیت۔

آئی ءَ گشتگ ات کہ اے گران نیادیں وہد ءَ بلوچی اکیڈمی ءِ درائیں اگدہ دار کہ بے مُز ءَ گوں زبان ءُُ لبزانک ءِ کاراں گلائیش انت اے یک مزنیں قربانی یے کہ اے دئیگ ءَ انت پمشکا آ گوں حکومت ءَ ذاتی صورت ءَ اکیڈمی ءِ گرانٹ ءُُ اے دگہ درائیں کاراں کہ آ ایش کنگ لوٹاں مزن وزیرجام کمال ءَ گوں تران کنت ءُُ اے جہد کنت کہ اکیڈمی ءِ گرانٹ گیش کنگ ءُُ آئی ءِ منتگیں درائیں کارانی سرجمی بہ بیت۔

بلوچی اکیڈمی ءِ انوگیں چھاپ بوتگیں کتابانی بہرءُُ بانگی ءُُ اے دگہ کارانی توسیپ کنان ءَ ظہور بلیدی ءَ گشتگ اَت کہ بائد اے دگہ اکیڈمی ءُُ ادارگ چہ بلوچی اکیڈمی ءَ سکین بگر اَنت۔