عالماں گشتگ کہ دیوان ءَ ہما مردم نامدار گشگ بیت کہ دیم ءِ مردم ءِ گپاں پہ دلگوش اش کنت ءُُ گوں اوپار ءَ جواب ءُُ پسو ءَ بہ دنت بلئے اے چاگرد ءَ چش نہ انت بلکیں اداں ہما مردم ءَ را گیش زانتکار ءُُ عالم سرپد بنت کہ ہما دیوانءِ تام ءَ بارت بلئے آئی ءِ گپ ءُُ تران ہلاس مہ بیت۔اے وڑیں مردم باز انت کہ دیوان ءِ تام ءَ بارت بلئے وتی گپاں کنت۔

انچیں یک دوستے ءَ گوں منی سرکپتگ اَت۔یکے وَ منی جند ءَ را لیڈری ءُُ گپ ءِ شوق دومی پدا دیوان ءَ انچیں مردمے ہوار بہ بیت کہ ترا حبر ءَ میلیت ءُُ وت درائیں روچ وتی بے سریں تران ءَ گوں سرجمیں دیوان ءَ بے تام بہ کنت گڈاں چشیں مردمانی دوا چے بیت؟ وہدے دیونان ءَ آئی ءِ گپانی ہلاپ ءَ کس گپ کہ نہ کنت داں آ ہمے سرپد بیت کہ بلکیں من وش تران کنگان اَنت۔

آ وتی دستءُُ پاداں گیش سُریت ءُُ وتی دستاں پہ دابے اے دیم ءُُ آ دیمگ کنت۔اگاں اے پیمیں مردمانی سرپدی ءَ کسے کنگ بلوٹ یت داں آ وت وتی گپاں بے حیال کنت۔اے پیمیں مردم کہ باز گپ کنت داں بزان کہ ایشی ءِ گپانی نیم ءَ چہ گیش دروگ ءُُ ایوک ءَ پتاری اَنت۔وتی چاگرد ءَ وت بچار ءُُ سما بہ کنت کہ اے وڑیں مردم یک چاگردے ءَ چنچو است انت؟ اے وڑیں مردمانی دارگ ءُُ حبر ی ءِ سوڈگ چون ءُُ چے وڑ کنگ بہ بیت۔

بلوچ راج ءِ پدا یک مزنیں بد بختی یے است انت کہ اداں ایوک ءَ گپ کنوک اَنت کار ءُُ عمل کنوک ءِ نیستی اِنت پمشکا اے راج دیمروئی ءَ کنٹ انت۔اگاں گپ کم ءُُ کارگیش بہ بیت داں اے راج ءِ مردماں دیمروئی ءَ کس داشت نہ کنت۔پمشکا فارسی ءَ گشنت کہ کم گفتاری باادب۔۔۔۔