بلوچستان پاکستان ءِ شاہرگ انت بلئے بلوچستان ءَ را آ اگدہ ءُُ جاہ ہچبر نہ رستگ کہ آئی ءَ را دئیگ لوٹ اتگ ات۔بلوچستانءِ اے دگہ جیڑہاں ابید بلوچستان ءَ انوں کہ مستریں جیڑہ انت آ بے روزگار ی انت۔بلوچستان ءَ بے روزگاری ءِ شرح انوں 97 درسداِنت پرچکہ ہمک ورنا ءَ را ڈگری گون انت بلئے نوکری نیست انت۔

حالانکہ بلوچستان ءِ گیشتریں بہرگاں نوکری است انت،ہمک ادارہ ءَ را مردم ءِ پکار انت،بازیں ادارگ است انت کہ مردم ءِ نیستی ءَ بند انت بلئے انگت ءَ اے ادارگانی پوسٹ پُر کنگ بوہگ ءَ اَنت۔ بلوچستان ءِ ورناہا ں یک وہدے بیچلر کتگ ءُُ بے روزگاری ءِ زنگ جتگ بلئے مرچی بلوچستان ءَ ایم فل ءُُ پی ایچ ڈی ہمے زارشانی ءَ کنگ ءَ انت کہ نوکری نیست انت۔بلوچستان ءِ پوسٹاں دومی صوبہ آں چہ مردم لوٹائینگ بیت،ہما کہ مہاجر اَنت آواناں ہم نوکری دئیگ بیت پرچکہ اے ملک ءَ رشوت ءُُ زرزوری ءَ ہرکس ہرچی کت کنت۔

بلوچستان ءِ دمگ بلکیں پاکستان ءِ سیر تریں دمگ انت پرچکہ اے دمگ ءَ ہر وڑیں معدنیات است انت سہر، اشکر،چاندی،پوپل، بلائیں زر ءُُ زری پورٹ بلئے انگت ءَ اے دمگ ءِ مردم پہ نوکری ءَ چمدار اَنت۔استیں جاور ءِ ذمہ واری ایوک ءَ فیڈرل حکومت ءَ نہ انت بلکیں دمگی حکومت ءَ ہم پرے کار ءِ گیشواری ءَ ہچی کرت نہ کتگ اَنت۔ہمک حکومت گوں نوکیں دروگ ءُُ نوکیں پندلاں اتکگ۔

بے روزگاری ایوک ءَ ایجوکیشن ءِ سکٹر ءَ نہ اِنت بلکیں درائیں جاگہاں است انت۔بلوچستان ءَ یکیں میڈیکل کالج اِنت،کوئٹہ کہ بلوچستان ءِ بنجاہی شہر انت اداں ہزارانی حساب ءَ ورنا پہ میڈیکل ءِ چکاس ءِ تیاری ءَ کاینت ایشی ءِ مستریں سوب ہمیش انت کہ بلکیں سیٹ ءَ بہ گراں ءُُ ڈاکٹری یے بہ رسیت۔ہمے واہگ ءَ را ایشانی چہ وتی کالج ءَ چہ درکتگ ءُُ کوئٹہ ءَ پرائیوٹ ادارگاں وانگ ءَ مجبور اَنت۔

دومی اگاں کسے ءَ را جست بہ بیت کہ کجام بورڈ ءِ کتاب پہ وانگ گہتر اَنت کس بلوچستان بورڈ ءِ نام ءَ نہ گپت پرچکہ جست نامہ ہم چہ پنجاب بورڈ ءِ کتاباں جوڑ کنگ بنت۔اے درگت ءَ ایوک ءَ پرائیوٹ ادارگ زر کمائی کنگ ءَ اَنت۔اگاں ہمے سہولت حکومت ءَ ہندی کالجاں بہ دات انت یاکہ انچیں سے ءُُ چار میڈیکل کالج پچ کتیں یاکہ ہما ورنا کہ لٹریچر وانگ ءَ اَنت آوانی اسکوف ءَ گیش بہ کرتیں مرچی حال چوش بلکیں مبوتین اَنت۔

سرجمیں بلوچستان ءَ فیکٹری چنت اَنت؟کارخانہ آنی کچ چنچک اِنت؟ مزن شاہ دربرجاہ چنت اَنت؟ اے درائیں چیز انی نیستی ءَ بلوچستان ءَ روچ پہ روچ بے روزگاری ءِ جیڑہ گیش بوہان اِنت۔ہزارانی حساب ءَ ہمک سال ورنا چہ کالج ءُُ یونیورسٹیاں چہ فارغ بنت۔

اے درائیں مردمانی روزگار دئیگ حکومت ءِ اولی ءُُ بنجاہی کاراں شمار بیت بلئے اے درگت ءَ ہچ پیمیں سوڈگے چہ بنجاہی یا دمگی حکومتءِ نیمگ ءَ نہ یتکگ۔ دانکہ اے جیڑہ گیشوار مہ بیت بلوچستان ءِ اے دگہ جیڑہ ہچبر گیشوار بوت نہ کن اَنت۔ہمے بے روزگاری ءِ سوب انت کہ ورنا بے راہیاں سرکش اَنت۔گندہ کاریاں گون بنت اے پیم ءَ یک جوانیں چاگردے ہچبر جوڑ بوت نہ کنت۔