بلوچی کلاسیکل شاعری ءَ بچار ئے گڈاں زانگ بیت کہ بلوچی لبزانک ءَ را یک جوانیں شعرے دپترے بوتگ بلئے انوگیں شاعری کہ بوہگ ءَ انت اے بلوچی روایتانی خلاف انت۔ خلاف ءِ لبز چمیشامن استعمال کرتگ کہ چیزے شاعر است انت کہ آ اردو ءِ نقالی ءَ کنگ ءَ اَنت ءُُ وتارا بلوچی ءِ بلائیں شاعر گوشگ ءَ انت بلئے راستی اے بلوچی شاعر نہ اَنت بلکیں اردو ءِ ترجمہ نگار اَنت۔اے شاعر کہ انچیں تشبیہ ءُُ انچیں استعارہ استعمال کنگ ءَ انت اے بلوچی حساب ءُُ کتاب ءَ چہ در اَنت۔

اے چیز بلوچی ءَ را نوکیں یا جد ید شاعری نہ دنت بلکیں وتی جندئے کلاسیکل شاعری ءَ حراب کنت۔انوں اگاں بلوچی شاعری بوہگ ءَ انت گڈاں اے بلوچی حساب ءُُ کتاب ءَ نہ انت بلکیں اردو ءِ وڑ ءُُ پیم ءَ انت۔بلوچی شاعری ءَ الم انت وتی جندئے ہند ءُُ دمگانی تشبیہ ءُُ استعارہ زورگی انت۔من اداں خاص بلوچی غزل ءِ گپ ءَ کنگ ءَ اون کہ بلوچی غزل ءَ را انچیں رنگے ءَ پیش دارگ بوہگ ءَ انت کہ آ بلوچی وڑا نہ انت۔

چمیشا اے پیمیں شاعر کڈن کنگ ءَ بہ بیت کہ آ وتی زبان ءَ گوں مسکرا مہ کن انت۔آ وہد ءِ شاعر سید ءُُ کریم ءُُ غلام حسین شوہاز وڑیں شاعر بوتگ اَنت کہ ایشاں وتی جند ئے زمین ءَ چہ تشبیہ ءُُ استعارہ زرتگ اَنت بلئے نوکیں دور ءِ ورنائیں شاعر ہمے اردو ءِ ترجمہ ءَ کن انت ءُُ گوشنت کہ من بلوچیءِ جدید شاعری کنگ ءَ آں۔ بلوچی ءِ جدید شاعری ءِ معنا اے نہ انت کہ وتی لبززبان ءِ لبز یلہ دئیگ یا لبزانی بے معنائیں وڑے ءَ استعمال کنگ جدیدیت انت۔

عطا شاد ہم وتی دور ءِ جدید شاعر بوتگ بلئے آئی ءَ ہچبر لبزانی جاگہ مٹ نہ کرتگ انت۔درچکانی سواس پادا نہ داتگ نیکہ استالانی گوں ورگ وارتگ۔آیاں انچیں نوکیں استعارہ جوڑ کتگ کہ چد ءُُ سارئیگیں شاعراں نہ کرتگ انت بس جدیدیت ہم ہمیش انت کہ انچیں لبز ءُُ انچیں استعارہ کارمرز بہ کن کہ چد ءُُ ساری استعمال نہ بوتگ انت۔ اے پیمیں لبزانی وتی شعراں کارمرزی کنگ ءَ چہ کس جدید شاعرنہ بیت۔ انوگیں شعراں کہ ماچاراں دل سچیت بلئے دست نہ روت اگاں دست بہ شت انت چوشیں شاعرانی شعرانی چھاپ کنگ ءَ ما مکن کتگ انت۔