خانہ فرہنگ ءِ ڈایریکٹر سید حسین تقی زادہ واقفی بلوچی اکیڈمی ءِ ترءُُ گرد ءَ شمبئے روچ 9-11-2019بلوچی اکیڈمی ءَ اتک۔چیئرمین ممتاز یوسف ءُُ جنرل سیکریٹری ظاہر جمالدینی ءَ سید حسین تقی زادہ واقفیءَ را سرجمیں اکیڈمی ءِ تروتاب کنائینت۔چیئرمین ممتاز یوسف ءَ حسن تقی زادہ ءَ اکیڈمی ءِ چہا پ بوتگیں کتاب ءُُ آوانی بہر ءُُ بانگی ءِ بابت ءَ سرپد کت۔اکیڈمی ءِ سئیل ءَ پد مہمان دیوان ءَ نشت اَنت ءُُ گپ ءُُ تران اِش کت۔

سنگت ممتاز یوسف ءَ را پہ وش اتک کت انت۔ممتاز یوسف ءَ بلوچی ءُُ فارسی زبان ءِ سیادی بیان کت آئی ءَ گشت کہ بلوچی ءُُ فارسی ءِ ہما کہ گاریں لبز اَنت آ بائد چنگ ءُُ یکجا ہ کنگ بہ بنت۔ آئی ءَ بلوچی اکیڈمی ءِ تاریخ ءُُ بن اشت ءِ بابت ءَ سید حسین تقی زادہ واقفی ءَ را سرپد دات۔ ممتاز یوسف ءَ بلوچی اکیڈمی ءِ نوکتریں پروجیکٹسانی بابت ءَ اوں سرپد دات۔

ممتاز یوسف ءَ پد سنگت رفیق ءَ سید حسین تقی زادہ واقفی ءَ را گوانک جت کہ آ وتی بلوچی اکیڈمی ءَ آیگ ءُُ مولمراد ءِ حیالاں درشان بہ کنت۔ تقی سید حسین تقی زادہ واقفیءَ چوکہ بلوچی نزانتگ اَت پمشکا آئی پی ایس حسین محمد ءَ پہ اکیڈمی ءَ آئی گال اردو ءَ درشان کت اَنتءُُ اکیڈمی ءِ بلوچی احوال فارسی ءَ سید حسین تقی زادہ واقفی ءََ را سرپدکت اَنت۔ سید حسین تقی زادہ واقفی ءَ گشت کہ آ اکیڈمی ءِ تروتاب ءَ باز وش ءُُ گل انت۔

آئی ءَ وتی تران ءِ بندات گوں سعدی ءِ شعراں کت ءُُ ہمے شعرانی پچریچی ءَ وتی تران دیم ءَ برت۔آئی ءَ گشت کہ بلوچی ءُُ فارسی ءِ سیادی باز کہن انت ءُُ اے سیادی بائد گیشتر ردوم دئیگ بہ بیت۔دیمترا آئی ءَ زبان ءُُ زبان ءِ ارزشت ءِ بابت ءَ تران کنان ءَ گشت کہ زبان ایوک ءَ مردمانی حالانی سرکنگ ءِ وسیلہ نہ انت بلکیں یکے دومی ءِ ثقافتانی زانگ ءِ نام انت۔ بلوچی ءُُ فارسی ءَ بازیں حرفے یک دومی ءَ گوں مشترک اَنت ایشی ءَ پیش کہ مارا دگہ قوم اے شیگان ءَ بجنت کہ شما پرچہ یکے دومی ءِ زبان ءِ سرا کار نہ کتگ بائد ما اے کار ءَ ملہی ءَ بنگیج بہ کنیں۔

آئی ءَ گشت کہ بلوچی،فارسی، کردی، ءُُ گیلکی درستیں زبانانی مات ایران انت ءُُ اے درست ایرانی زبان گشگ بنت۔بلوچی بہ بیت یاکہ اردوءُ فارسی لبزانی کارمرزی الم ءَ کنگ بوتگ انچو کہ پاکستان شاعر اقبال ءَ وتی شاعری ءَ فارسی لبز کارمرز کتگ انت اے لبزانی کارمرزی ءَ را گوں ہما زبان ءِ ثقافت اوں زانگ الم انت۔
سنگت رفیق ءَ ہمے گپ ءِ گیش کنان ءَ گشت کہ بلوچستان ءَ چشیں شاعر باز انت کہ آئی ءَ بلوچی ءُُ فارسی ہردو زباناں شاعری کتگءُُ بائد اے سلسلہ ہمے پیم جاری بہ بیت۔

بلوچی اکیڈمی ءَ را وتی چیزے گپ کہ آوکیں وہد ءَ ایشانی سرا اوں کار کنگ ءِ واہگ اَت آ سید حسین تقی زادہ واقفی ءَ را پیشدارگ بوت انت۔ ہمے نکتہ اکبر ساسولی ءَ چہ ممتاز یوسف ءِ رضا ءَ فارسی ءَ وانت ءُُ سید حسین تقی زادہ واقفی ءَ را سرپد کت انت۔ہمے گپانی پشدر ءَ سید حسین تقی زادہ واقفی ءَ گشت کہ اکیڈمی ءِ داتگیں درائیں گپاں گوں من تپاک کناں۔آئی ءَ گشت کہ ایران ءُُ پاکستان ءِ لہتیں مردماں من گشتگ کہ آ ایرانی ءُُ بلوچستان ءِ ثقافتانی بابت ءَ یک ڈاکومنٹری فلمے ءِ جوڑ کنگ لوٹ انت۔ اے ڈاکومنٹری ءَ ہردو دمگانی دو د ءُُ ربیدگانی شونداتی بیت۔

من لوٹاں اے ڈاکومنٹری منی دور ء َجوڑ بہ بیت بلوچانی اصل میراث چنائی ءَ زبان ءَ پد آئی مہمان داری انت کہ سرجمیں دنیا ءَ نامدار انت۔ دومی کالج ءُُ یورسٹیاں بلوچی ڈیپارٹمنٹ بائد پچ بہ بیت ءُُ من وتی واتری ءَ الم ءَ اے کار ءَ کناں۔ دومی ما گوں یونیورسٹی آف بلوچستان ءَ پیسرااوں انچیں گرد ءُُ تاب کتگ ءُُ دیم اوں بنت،اکیڈمی ءِ نیمگ ءَ ہمے گپ ءِ پشدر ءَ سید حسین تقی زادہ واقفی زادہ واقفی ءَ سرپدی دات کہ بلوچی اکیڈمی انوں مستریں ادارگ انت بائد یونیورسٹی ءَ ابید اگاں ادبی ءُُ ثقافتی اگاں تر ءُُ تابے بیت داں اکیڈمی بائد ہوار کنگ بہ بیت۔

سید حسین تقی زادہ واقفی ءَ گشت کہ انچو بلوچی اکیڈمی بلوچستان ءِ مستریں ادارگ انت ہمے پیم ایران ءَ فرہنگ ِ ثقافتستان ءِ ادارہ مستریں ادبی ادارگ انت پمشکا من گوں آوانی کارمستر ڈاکٹراحداد عاقل ءَ گوں شمئے تعارف ءَ کناں ہمے زوتاں گوں آواں شمئے گندءُُ نندے ءِ پروگرامے ہم ٹہینگ بیت۔ سید حسین تقی زادہ واقفی ءَ دیوان ءِ گڈی ءَ بلوچی اکیڈمی ءِ تروتاب ءِ بابت ءَ وتی تاثرات نبشتہ کت انت ءُُ وتی ادارگ ءِ نیمگ ءَ ممتاز یوسف ءَ را سوگاتے ندر کت۔بلوچی اکیڈمی ءِ دود ءِ پدا ممتازیوسف ءَ سید حسین تقی زادہ واقفی ءُُ خانہ فرہنگ ءَ پہ بلوچی اکیڈمی ءِ چہاپ بوتگیں کتابانی سیٹ دات انت۔دیوان ءُُ چاہ ءُُ چلیم ءَ آسر بوت۔