شہید زاہد آسکانی سیادیءَ منی برات زتک بزاں کہ آئی پت منی ناکو زتک اِنتءُْ مئے دمگاں ناکو زتکءَ برات گْشاں ءُْ ناکو زتکءِ زہگءَ برات زتک گْشاں.من عمرءَ چہ شہیدءَ باز کستر بوتگاں بلے مدام کہ ما یکجاہ بوتگاں آئی منءَ ناکوءِ نامءَ توار کْرتگ اَت.ما چہ کسانیءَ بگر تاں یک بلاہیں وہدےءَ یکیں میتگءَ زند گوازینتگ اَت.یکیں لوگ، یکیں میتگءُْ یکیں دمگءَ مئے کسانی گوستگ اَت۔

برے کلہ کورءَ پہ بڈولءُْ ماہیگء ِ شکارءُْ برے ما سرناگءُْ سگار کنڈءَ پہ سیلءُْ سوادءَ ما شْتگ اِتاں.گیشتریں وہداں آ گوں وتی ہمسرءُْ ہم کدیں بچکاں گوں شْتگ اَت بلے کدی کدی ما ہم گوں آیاں ہمراہ بوتگءُْ پہ گردءُْ تراں شْتگ اِتاں.وہد گوزان بوتءُْ چہ ششمی کلاسءَ چہ پد آئی ناکو مرحوم حاجی امام الدین آسکانیءَ آرا وتی ہمراہیءَ پنجگورءِ شہرءَ پہ وانگءَ بْرتگ اَت.چہ ششمی کلاسءَ بگر تاں دہمی کلاسءَ آئی ماڈل ہائی سکولءَ وتی وانگ دربْرتگ اَتءُْ پہ دیمی وانگءَ گورنمنٹ ڈگری کلاج پنجگورءَ داخلہ گپتگ اَت.اے وہداں کہ آ پنجگور وانگءَ اَت کدی کدی وتی موکلانی وہداں آ پدا وش کوشیں پرومءَ اتکگ اَتءُْ مئے نیادءُْ دیوان پدا برجاہ بوتگ اَت.گوں وانگءْ زانگءَ ہبءْ واہگ داروکیں زاہدءَ مدام گوں وانوکاں مِہر کْرتگ اَت.مئے میتگءُْ نزیکءِ تیوگیں ہلکءُْ میتگاں آئی وانوک شوہاز کْرتگءُْ آیانءَ سکین داتگ اَت.ابید چہ وانگءَ آ یک جفا کشءُْ جْہد کنوکیں مردمے اَت۔

منءَ یات بیت کہ وہدے من دہمی کلاس پاس کْرتگءُْ ڈگری کالج پنجگورءَ داخلہ زْرتگ اَت گْڈاشہیدءَ اے وہداں وتی بی اے وانگ ہم سرجم کْرتگ اَت.ڈگری کالج پنجگورءِ شہید برکت ہاسٹلءِ اولی نمبرے کوٹیءَ یکرندے پدا مئے وانگ ْ زانگءُْ نیاد بندات بوتگ اَت۔

کمے وہداں چہ پد آ دیم پہ وش کوشیں پرومءَ شْتءُْ اودا یک کسانیں وانگءُْ زانگءِ یک.ادارہے آئیءَ جوڈ کْرتءُْ چکانی وانینگ بِندات کْرت.کساس یک سرجمیں سالےء َ پرومء َ وانینگءَ چہ پد اودا وانگءُْ زانگی ماہولءِ نہ بوگءَ آئی پروم یل داتءُُ دیم پہ گوادرءَ شْت.گوادرءَ آئی جْہدءُْ سکیءُْ سوریءِ بابتءَ آئی گوادرء ِ سنگت گیشترءُْ شرتِر گْشت کناں بلے تہنا من ہمے گْشت کناں آئی زندء ِ تہا بازیں جنجالءُْ سکی دیستگ اَت بلے گوں سگءُْ اوپارءُْ پہ گوادرءِ چْکانی بابتءَ یک شریں زندءُْ زانتءُْ سرپدی ءِ واستہ آئی وتی جْہدانی گام تیز کْرتگ اِتاں.منءَ شری ء ِ سرا یات نہ.بیت بلے 1999ءِ گْڈ سرءُْ 2000ءِ سالءِ بِنداتءَ کہ من دوازدہمی کلاسءَ وانگءَ اِتاں ہمے وہداں آئی منءَ گوادرءَآیگءْ چْکانی وانینگءْ آئی ہمراہ داری کنگء ِ واستہ گوانک جتگ اَت.دیر نہ بوت کہ من ہم ما گنجیں گوادرءَ سر بوتاں.اے وہداں ما دوئیناں ما گوادر ءِ مستر یں پرائیویٹ سکول آغا خانءَ وانینگ بِندات کْرتء بیگاہء َ انگریزی زبانءِ وانینگ ءَ ہم ما گْلائیش اِتاں.اے وہداں من آرا یک مزنیں جہدکارءُْ سکیءُُ سوری سگگوکیں بامردےءِ وڈا دیستگ اَت.روچءُْ شپ گرمءُْ سردءُْ ہمک وہدءُْ ساہتاں آئی پہ گوادرءِ چْکانی شریں بانداتے ءِ واستہ جیڑ اِتگ اَت.یک سالےءَ تاں گوں آئی ہمراہ داریءُْ یکجاہیءَ من آرا یک مہروانءُْ جْہد کنوکیں بامردےءِ رنگءَ دیستگ اَت.آئی گوں وتی اصولءُْ جوڈ کْرتگیں راہ بنداں کدی ہم سودا بازی نہ کْتگ اَت.یک استادےءِ بستارءَ چہ ابید آ زبانءُْ لبزانک،شیئرءُْ زیمرءَ چہ ابید یک انچیں مردمے اَت کہ آرا ہر چیزے سرا یک شریں سرپدیءِ است اَت.گوادرءَ انچیں مردم است اَنت کہ شہیدءِ بابتءَ شریں سرپدی دار اَنتءُْ آئی سکیءُْ سوریءُْ جنجالانی سگگءِ چم دیست گواہ اَنت.گوادرءِ ہمک چْکءُْ کسانءْ مزن چہ آئی مِہرءُْ جْہداں سرپد اِنت کہ آئی جْہد پہ گوادرءِ چْکانی بانداتءِ باروا بوتگ اَت۔

وہدءَ وتی گام تْرند کْرتاں ءُْ زند چو یک وش رواجیں اْشترےءِ ڈولءَ گوانز کنانءُْ دیمء روان بوت. منی سر برے ما پنجگور، برے ماں کیچءُْ برے ماں وش کوشیں پرومءَ کپتءُْ ما یکے دومیءَ چہ گِستا اِتاں بلے وہدیکہ ما دْچار کپتگ اِتاں گْڈا پدا مئے دیوانءُْ مجلس بِندات بوتگ اِتاں۔

4 دسمبر 2014 ہما شومیں روچ اَت کہ چتکان بازارءَ من نِشتگ اِتاں کہ منءَ سر زاہر حْسینءِ فون اتکگ اَت کہ زاہد آسکانی چہ ما جتا کنگ بوت.گوں آئی اے گپءِ اْشکنگءَ منی چم تہار بوتاں ءُْ روڑنائیں روچ پہ من چو تہار ماہیں شپءَ انچو تہار بوت کہ من ہما جاگہء َچو ہْشکیں دارءَ بے ساہ بوتاں.5دسمبرءَ شہیدءِ میت آئی بْنکی ہنکین پرومءَ آرگ بوتءُْ منءَ یات اِنت کہ تاں دیراں من آئی تہتءِ سرونءَ اوشتاتگ اَتءُْ آئی گْڈی دیدار کْرتگ اَت.زاہد ءَ وہدءِ زوراکءُْ وش نیاتکاں چہ ما جتا کْرت بلے آئی پگر آئی فلسفہ انگت ہمک بلوچءِ کسان تاں مزن کْلانی دلءَ اِنت.مروچی گوادرءِ ہمک لوگءَ بے کساس زاہد پیداک بوتگءُْ آئی جْہدءِ زمہ واری آیاں وتی کوپگاں زْرتگ.ہمک بنی آدمءَ یکرندے مرگءِ تہلیں تام چشگی اِنت۔

بلے بازیں مردم مرگءَ چہ پد ہم نمیران بنت.شہید زاہد آسکانی چہ ہما بامردیں سراں چہ یکے کہ آئی مرگءَ آرا گیشتر نمیران کْرتگ.1998ءِ گوادرءُْ مرچی گوادرءِ تہا زمینءُْ آزمان ءِ حسابءَ علمءُْ زانتءِ بدلی آتکگءُْ علمءُْ زانتءِ اے بدلیءَ شہید زاہد ہما کاروانءِ سروکء ُکماش اِنت.اگاں آ مرگ کہ مردمءَ نمیرانءُْ گیشتر زندگ کنت آ مرگ گْشگ نہ بیت.من ائیدانی روچءَ مدام کہ شہید زاہدءِ قبرءِ سرونءَ اوشتاں ءُْ سما کناں کہ زاہد پہ بدواہءُْ زوراکاں ہمے کلوہ ءَ راہ دیگ لوٹیت کہ
تو پہ سرانی گْڈگءَ زندءِ حیالاناں کْشے؟
پہ سِندگءَ داشت کنئے پْلءَ چہ بو تالانیءَ!!
من پہ مِرگ گار نہ باں..