سرجمیں دنیا ءَ چوبیت کہ ہما مادن ہما ہنداں کہ درکیت آئی ءِ گیشتری بہر ہما ہندءَ را دئیگ بیت۔بلئے بلوچستان یکیں دمگ اِنت کہ سرجمیں پاکستانءَ درستاں چہ گیش مادن درکیت بلئے اے درچ ءَ بلوچستانء َ را ہچی دئیگ بوئگ ءَ نہ اِنت۔ہرچند کہ سارتی گیش بوہان اِنت بلوچستان ءَ گیس ءِ کمی ہم گیش بوہان اِنت بلئے اے بابت ءَ سرکار ءِ نیمگ ءَ ہچی کنگ بوئگ ءَ نہ اِنت۔ انوں سرشہر کوئٹہ ءِ نزیک تریں ہند قلات ءُُ خضدار ءَ ہم گیس سرکنگ بوئگ ءَ نہ اِنت۔حالانکہ قائمہ کمیٹی ءِ مجلس ءَ اے فیصلہ اوں کنگ بوتگ کہ بلوچستان ءِ کوٹہ گیش کنگ بہ بیت بلئے اے درائیں گپ ایوک ءَ زبانی کلامی اَنت ایشانی سرا عمل نہ بیت۔

بلوچستان ءِ دور ءُُ دریں دمگاں چوکہ تربت،پنجگور،خاران،نوشکی، گوادر، پسنی ءَ بل کہ چہ بنجاہی شہراں دور اَنت بلئے بدبحتی ایش اِنت کہ ہما جاہ ءَ کہ گیس ءِ جند درکپگ ءَ اِنت آدمگاں ہم گیس دئیگ بوئگ ءَ نہ اِنت۔چریشی ءَ مردمانی تہا مایوسی روچ پہ روچ گیش بوہان اِنت کہ انوگیں سرکارءَ گوں بلوچاں ہچی سروکارے نیست اِنت۔کوئٹہ ءِ بنجاہی شہر ءَ ہم سارتی ءِ گیشی ءَ چہ گیس پریشرکم انت ءُُ بازیں جاہ ءَ گیس ءِ جند نیست اِنت۔انگت ءَ زمستان ءِ اول سراں دیمی دو ماہ سارتیں انگت است انت۔حکومت ءِ بائد اِنت کہ اگاں آ دگہ ہنداں گیس دئیگ نہ بیت کم چہ کم بنجاہی شہر کوئٹہ ءُُ ایشی ءِ کش ءُُ کری ہنداں گیس دئیگ بہ بیت۔

بلوچستان ءِ اے دگہ دمگاں ہما سیلنڈر والا گیس کارمرزی بیت آ اوں ایوک ءَ وتی وردن ءُُ وراکی ءِ کاراں کارمرزبیت۔گوستگیں سالاں تربت ءِ دمگ شاپک ءَ یک انچیں گیس سلینڈر ءِ وئیل ءِ بازیں جانے زیان بوتگ انت اے بابت ءَ حکومت ءَ را ہم بازیں نبشتانکے روان دئیگ بوتگ اَت کہ آ تربت ءِ دمگاں یک سوچکی اسپتالے جوڑ بہ کنت کہ بلوچستان ءَ اے پیمیں نادراجاہانی باز کمی اِنت۔اے پیمیں وئیل دائم ءَ بوئگان اَنت بلئے حکومتی مردماں ہچی سمایے نیست انت ءُُ ایشانی گوشاں مورے نہ وارت۔تاک ءُُ حالرسانکی روتاکاں دائم ءَ ہمے گپ ءِ گیشواری ءَ کالم نبشتہ بوتگ اَنت کہ حکومت بائد بلوچستان ءِ درائیں دمگاں گیس سرکنگ ءِ جار ءَ بہ جنت۔

اگاں چہ سوئی ءَ گیس دیم پہ تہی بلوچستان ءَ سرنہ بیت داں ایران ءَ گوں منگے کنگ بہ بیت ءُُ چہ ایران ءَ گیس درآمد کنگ بہ بیت پرچہ بلوچستان ءِ تہی دمگانی نسبت ءَ ایران نزیک کپیت بلئے بلوچستان حکومت نہ گوں ایران ءَ منگے کنت ءُُ نیکہ سوئی ءَ چہ پائپ لائینے دیم پہ بلوچستان ءِ تہی دمگانی واستہ راہ ءُُ درے ءِ سوڈگ ءَ کنت۔اے وہداں بلوچستان ءَ گیس دئیگ بوئگ ءَ نہ انت بلئے پاکستان ءِ اے دگہ دمگاں گیس نہ ایوک ءَ سرکنگ بوتگ بلکیں آہنداں ہچبر گیس ءِ تہا کمی گیشی نہ بیت بلکیں دائم ءَ گیس انت نا پریشرے کم بیت ءُُ نیکہ گیس بند بیت۔بلئے بلوچستان ءَ مدام بے حال ءُُ احوال ءَ گیس بند بنت ءُُ ہروہد ءَ آوانی دل بلوٹ ایت گیس ءَ پچ کن اَنت ءُ بند کن انت۔انوں گیس ءُُ بجلی آنی بلاں وتسریں گیشی کنگ بوتگ۔

یکے ءِ لوگ ءَ گیس ءِ جند کارمرز نہ بوتگ بلئے آئی بل بیست ہزار ءَ چہ سی ہزار اتکگ۔ مردم حیران ءُُ پریشان اَنت کہ نوکیں پاکستان ءِ نوکیں قانود ءَ پجار کہ گیس ءُُ بجلی کارمرز کنئے شر نہ کنئے بلئے بل کیت انت آ اوں یک سری نہ بلکیں سے سری بل کیت انت۔بلئے حکومت انت کہ سدے پر نیست دومی اے گشگ بیت کہ ہما گیس ءِ گشادیں میٹر کہ ایندگہ صوبہاں زورگ نہ بو تگ انت اے وہد ءَ کوئٹہ جنگ بوتگ انت۔