نازک سید ہاشمی ء ُ بلوچی ء ِ اولی گدارانت۔سید ہاشمی ءَ1958 یا 1959 بنشتہ کتگ ات ءُُ پدا اشی ءَ را 1969 در جتگ ات۔ نازک ءِ کسہءَ سید ہاشمی وت جوش کنت: “ہمے رم ءُُ لچہاں د لگوش بوہگ ءَ پہ چمشانکے ءِ حاترا ایشانی پٹ ءُُ چارء گلائش بوتاں۔ ماں رم امبار ءِ یکے ہمے نازک ات۔ بیست تاکدیمی آزمانک یا داستانے ات۔۔” چر ے گپ ءَ پدرا بیت کہ نازک گدارء را سید ہاشمی ءَ بندرءَ یک آزمانک یاداستا نے درچ ءَ بنشتہ کتگ بلے اے آزمانک پدا ہوں گدارے بوت۔ اے بابتءَ سید ہاشمی نبشتہ کنت۔۔۔ “
لوٹ اتوں کمیں اشی ءَ دراج ترءُُ مستربکنان۔۔۔۔ابشی ءِ در ءُُ بہر ءُُ بہرگاں ردوم زیران کت۔۔۔چہ سالے کپے ءَ رند دبئی ءَ ماں بے وتنانی بندر گسس ءَ وتی تحتگی بادگیر پیشیں کاپرءِ چیرءَ گوں کریم دشتی ہمزان اتاں کہ نازک ءِ ترانگ کپتاں آؤرت ءُُ کریم ءِ دیم ءَ ایروں کرت۔۔۔۔ کریم چہ درستاں ساری من ءَ ایش بگش کہ اے چے یے؟” “ناولے! “گوں ہمے پسوا اے دراجیں آزمانک گدارے بوت۔ اے وھد ءَ دنیا ءَ پہ گدار نویسی ءَ سک باز دیم روئی کرتگ گوں وتی نبگپ ءُُ تکنیک ءَ۔بلے نازک بلوچی ءِ اولی گدار بوہگ ءَ ابید ہم بنگپی ءُُ تکنیکی حساب ءَ نزور یں گدارے گشگ بوت نہ کنت۔
اگان اشی ءَ را اولی گدارءِ چم ءَ چارگ بہ بیت۔۔۔۔ نازک 19 درانی یک کسانیں گدارے۔ کہ اشی ءِ تاکدیم 128 انت۔ گدار نازک تیاب دپی زندء پش درءَ نبشتہ بوتگ کہ اشی ءِ بازیں پش دری ندارگ گوں گوادرءَ سیادی کن انت کہ سید ہاشمی ءِ بوتن ء ِ جاہ انت۔گدار نازک بندرءَ دریا وردی زند ءِ ندارگے کہ نا حدا ءُُ جانشو انی کار ءُُ آہانی لوگ ءِ مالیاتی جاورانی عکس کشی بوتگ۔
اے پش در ءَ ہم ناحدا ءُُ جانشوا نی لانچ ءُُ یکدارانی واہندانی تب ءُُ میل ءُُ ناحدا ءُُ جانشوانی لٹ ءُُ پل ءِ پش در ہوار انت۔ نازک کسہ بندر ءَ نازک ئیگ انت۔ نازک یک جنین آدمے کہ آئی ءِ مرد دریا وردی ءِ سوب ءَ بیران بنتءُُ آدومی سورءَ کنت۔ہمے وڑا سیمی ءُُ چارومی ءَ۔ وہدے آئی ءِ دومی جود بیران بیت گڈاآئی ء متیگ ءِ مردم آئی ءَ شگان ء جن انت کہ نازک مردکشیں زالے بلے نازک کلانہ ءُُ شیرزالے پمیشگہ اے گپاں مان نیا رایت ءُُ ز انت کہ آئی ءِ مردانی بیرانءِس پش درءَ آئی ءِ جند نہ انت بلکیں ہپتاریں ذرانت کہ آئی ءِ جوداں اوگار ایت پمیشگہ آ وتی گڑی جود اومرءَ گوں اے شرط ء َ آروس کنت کہ آزر ءَ نہ روت۔
اے کسہ ءِ پش در ءَ دریائی زند، لانچ ءُُ یکدارانی واہند ءُُ سیٹانی تب ءُُ پگر، نا حدا ءُُ جانشوانی لوگی ءُُ مالیاتی جاور حال ہم پیش دارگ بوتگ انت۔گدار ءِ تہا فاور ڈ ءُُ فلیش بیک ءُُ تکنیک کار مرز کنگ بوتگ۔ بلوچی شرک ءُُ پالانی ہم یک عکسے گندگ بیت اے گدار بیانیہ تکنیک ءَ نبشتہ کنگ بوتگ۔ سید ءِ ر م نویسی مزنیں گنجے۔زبانءُُ بیان سک وش انت وانوک ءَ ہچبرپر ترگ نیل ایت