(مڑہداریں شونکار!سرجن انت کشک ءُُ سر جن ا نت مردم“ منی لبزانکی اوتاگے کہ ایشی بازیں بہرے جتائیں تاکبند ءُُ تاکاں چاپ بوتگ۔ اے بہر پہ ساچینکءَ ندرانت۔ص۔ ص۔) بلوچی لبزانکی تاکبند ءُُ بلوچی زند

لبزانک ءِ دیمروئی ءُُ آئی دامن ءِ پلگارگءَ اکیڈمی ءُُ اداراہاں ھوار۔۔۔۔۔ لبزانکی تاکبند ءُُ تاکانی کرد سنگین ءُُ بے درور اِنت۔ ایشاں چہ لبزانک ءِ دروشم چاگرد ءَ سنگریت ءُُ سلہّ بیت۔۔۔۔ ءُُ لبزانک ءِ وجود ءُُ جوہر زندمان ءِ گوناپاں گوں ہمدپ بیت۔ تاکبندانی منّت ءَ نوکیں جُنز ءُُ تب ءُُ مئیل ءَ ھوار نبشتہ کار ءُُ وانوک ءِ نیامءَ نزوکی ءُُ سیادی یے جُڑیت۔۔۔تاکبندانی برکت ءَ لبزانک ءِ سرجمیں بالاد چاگرد ءِ پلّو ءَ زاہر ءُُ پدر بیت۔

بلوچی لبزانک ءِ گیشتریں تاکبند ءُُ ماھتاکاں یکیں وہدءَ درسیں زانت ءُُ زانشانی (مذہب، سیاست، تاریخ ءُُ ایدگہ) جھگیری زُرتگ۔ اے رِدا تاکبندانی ایمان کمیں گہتر اِنت۔ بلے ماھتاکاں وتی رؤئشت گیشتر ھمے دروشم ءَ برجاہ داشتگ ءُُ روان اَنت۔ ھمے رنگیں پالیساں آھانی لبزانکی دروشم کمیں اندیم ءُُ مُجیں کُتگ۔ بایداِنت لبزانکی تاک ءِ اولی رؤئشت ءُُ پالیسی ساچشت ءِ زندگ دارگ ءَ ھمے سکین ءَ وتی بیرک بہ کنت۔ اے رِدا لہتیں جُست چست بیت کہ بلوچی ماھتاک ءُُ تاکبند بلوچ ءِ راجمانی، مذہبی، تاریخی ءُُ ایدگہ تکانی جیڑہاں بیان نہ کن اَنت گُڈا چے فائدہ۔۔۔۔؟

راستی ایش اِنت کہ مئے چاگرد ءَ ایدگہ پِڑاں وتی زانشی ءُُ علمی رویہ تنیگت ءَ جوڑ نہ کُتگ اَنت۔۔۔۔!!! ءُُ بلوچی زبان ءِ دروشم ءَ ہچ رنگیں کارے گندگ نہ بیت۔ پہ درور مئے چاگرد ءَ یک جتائیں اکیڈمی ءُُ تاکبند ءُُ تاکے نیست کہ تہنا سیاست یا تاریخ یا ایدگہ پِڑ ءِ ھاترا کار بکنت۔ ابید لبزانک ءَ۔۔۔۔۔ نوں ھمک جیڑہ لبزانکی تاک ءُُ تاکبنداں وتی میراث کُتگ۔ گپ اے نہ اِنت کہ بلوچی لبزانک چہ بلوچ چاگرد ءَ یک کِر بہ بیت ءُُ چاگردی جیڑہاں بیان مہ کنت۔ بلکیں ھمک بنگپ یا جیڑہ لبزانک ءِ رہبنداں زورگ بہ بیت ءُُ ساچشتی کالب ءَ ایر بہ بیت گُڈا لبزانکی تاک ئے ِ چاپ بکن اَنت۔

بلے من گیشتر بلوچی تاکاں چارآں۔۔۔۔آہانی ساچشتی بالاد لُڑ ءُُ پُڑ اِنت بزاں ساچشتی سان اِش آ کساس ءَ نہ اِنت کہ بوّگی اِنت۔ماھتاک زند نوشکی ءَ وتی اے سپر ءَ بیست سال سرجم کُتگ ءُُ بازیں گچین تاک ئے ِ چا پ کُتگ ءُُ بنداتی دروشم ئے ِ برجاہ داشتگ۔ باید اِنت مرچی کمیں دروشم ئے ِ مَٹ بوتیں۔ آئی بیست یکومی سال ءِ سپر ءُُ بلوچی لبزانک ماں بیست ءُُ یکومی کرن ءِ تب ءُُ مئیل ءِ رِدا وتی لبزانکی بالاد ءَ بُرز بہ کنت۔آئی پالیسی ءُُ رہبند ساچشتی دروشمءَ جتا ءُُ گچینی بوتیں اَنت۔۔۔۔۔!!!

انوگیں زمانگ ءَ تاکانی اے ڈُبہ ءُُ ذمہ اِنت کہ ساچشتی نبشتہ کار دیما بیاراَنت ءُُ آہانی ساچشتانی سرا باوست بہ کن اَنت بلے باز وھدءَ من اجکہ باں کہ اے وھدی انچیں شعر ءُُ رِدانک تاکانی سرتاکانی براہ اَنت کہ بلوچی لبزانک ءِ 1950ءِ ساچشتانی کالب ءَ اوشتات نہ کن اَنت۔

گُڈسر ءَ منی دزبندی ءُُ سلاہ اِنت کہ ماھتاک بلوچی زندءِ پیمیں تاکے کہ وتی بیست سال ئے ِ سرجم کُتگ۔۔۔ آئی کرِد ءُُ گوناپ بلوچی لبزانکی دنیا ءَ مزن اِنت گڈا بائداِنت کمیں وتی ساچشتی سان ءَ توان ءَ۔۔۔۔۔۔ ءُُ لبزانکی کد ءَ گیشتر بُرز بکنت ءُُ گچینی ئیں تاکے ءِ کد ءَ وت ءَ برجاہ بہ داریت۔ نبشتہ کار ءَ چہ گیش ساچشت ءَ اَرزشت بہ دنت ءُُ چاپ بکنت۔ساچشتکار ءُُ وانوک ءِ نیامءَ مستریں مہر ءِ چیدگ لبزانکی تاک ءُُ تاکبنداَنت۔باید اِنت ھمک تاک ءُُ تاکبنداں اے رنگیں مہرءِ شیرکنی گندگ بہ بیت۔

منی نزّ ءَ اے چاگردی جاورانی دیمپانی ءَ ھما بلوچی تاکبند ءُُ تاکاں وتی یکشلیں چاپکاری برجاہ داشتگ۔۔۔آھاں چہ یکے بلوچی زند نوشکی اِنت کہ آئیءِ اے راجدپتری بستار مُدامی مان ایت۔