سرجمیں بلوچستان ءَ یک میڈیکل کالجے کہ بلوچستان ءِ بنجاہی شہر ءَ جوڑ کنگ بوتگ آئی نام بولان میڈیکل کالج کوئٹہ اِنت۔ اے کالج ءَ سالے ہزارانی حساب ءَ نودربر ٹیسٹ دینت پہ ڈاکٹر شپی ءَ چریشاں ایوک ءَ سد ءُُ دوسد مردم سوب مند بیت اے دگہ درست بے سوب بنت یاکنگ بنت۔بائد وَ ہمیش اَت کہ ہمے یکیں کالج چو بانورے ءَ سہمبینگ بوتیں بلئے اگاں کسے بولان میڈیکل کالج ءَ شتگ ءُُ آئی ءِ جاور دیستگ اَنت کہ گپ پہ بیان بوت نہ کنت۔
اگاں چہ ہمے کالج ءَ بلوچستان ءَ ٹاپ سرجن ڈاکٹر ودی کرتگ اَنت،کہ مرچی دنیا ءِ بازین ہندو ءُُ دمگاں ڈاکٹر ی ءِ پڑاں کار کنگ ءَ اَنت۔ہمے کالجءِ دراتکگیں نودربراں ایف سی پی ایس کرتگ ءُُ وتی راج ءِ نام دیم آورتگ بلئے مرچی ہمے کالج ءِ نودربراناں زاشانی یے چیر اِنت کہ پرچہ؟؟؟ہما وہد ءَ کہ اے جار جنگ بوت کہ نوں بولان میڈیکل کالج ءِ جاہ ءَ یونیورسٹی ءِ درجہ دئیگ بوتگ ءُُ چد ءُُ آدیم ہما درائیں ٹیسٹ ءُُ انٹریو کہ یونیورسٹی آف بلوچستان ءِ چیر دستی ءَ بوتگ اَنت آ درستاں وت بولان میڈیکل یونیورسٹی بہ گپت۔سرظاہر ءَ وَ اے جوانیں کارے ءُُ گپے درا بیت بلئے ہمے پہ ءِ پشدر ءَ بلائیں پندلے چیر اِنت۔
چوکہ زکیں روچءَ ہمے کدگ ءِ نودربر کہ ایشانی تہا زالبول ہم ہوار بوتگ اَنت ہور ءُُ سارتی ءَ پد ہم زاشانی اِش درشانتگ۔ ہمے نودربرانی سرا فورسءَ لٹ جنی کتگ ءُُ گوں وتاں بازیں نودربر دستگیر کرتگ ءُُ ایشانی جوانی ءَ ادب داتگ۔اے نودربرانی میار ءُُ گناہ بس ہمے بوتگ کہ ایشاں ہمے جست چہ حکومت کرتگ کہ ہما فیس کہ بیست ءُُ پانچ ہزار بوتگ گوں یونیورسٹی ءِ نام ءِ پر کنگ ءَ دو لکھ کنگ بوتگ اَت،ہما ہاسٹل کہ ہمے نودربرانی پہ نندگ ءَ جوڑ بوتگ اَنت آ بند کنگ بوتگ اَنت،ہما سیٹ کہ پہ بلوچستان ءِ نودربراں ایر کنگ بوتگ اَنت آ چہ بلوچستان سیٹ ءَ درکنگ ءُُ اوپن کنگ بوتگ اَنت۔
اے زارشانی ءَ ایوک ءَ نودربر نہ بوتگ اَنت کہ بلکیں ہمودا کار کنوکیں استاد ءُُ کلرک پارٹی ہم گون بوتگ اَنت کہ ایشانی مُز ہم کم کنگ بوتگ اَنت۔ اے نودربراں ایوک ءَ ہمے عرض ءُُ پریات کرتگ کہ اگاں یونیورسٹی ءِ دئیگ گوں اے شرطان اِنت گڈاں آواں یونیورسٹی نہ لوٹیت ءُُ ہما پیشی کالج پریشاں جوان اِنت۔ ہمے حبر نوکیں نام گپتگیں میڈیکل ءِ وی سی ءَ را شات نہ بوتگ اَت آئی ءَ ہمے نودربرانی لوٹ پیلو نہ کرتگ اَنت بلکیں ایشانی جواب ءَ نودربر گپتگ ءُُ بند کتگ اَنت۔زالبولانی جتگ ءُُ بے عزت کتگ اَنت۔کہ شما پرچہ وتی حق ءِ گپ ءَ کن اِت۔
یک چاگردے ءَ حق ءِ گپ کنگ ءَ لٹ واری ءُُ بندی کنگ بیت داں آ چاگرد چتور دیمروئی کت کنت۔ڈاکٹرانی یک چاگرد ے ءَ جاہ ءُُ مقام ءَ ہرکس سرپد اِنت۔ہمے نودربر اَنت اگاں ایشاناں جوانیں ماحولے دئیگ ءُُ وانینگ بہ بیت داں آ پہ چاگرد ءَ جوانیں کارے کرت کن اَنت بلئے اگاں ایشاناں اے پیم ءَ بزگ کنگ بہ بیت داں باندہ ہمے پاد کائینت ءُُ چاگرد ءَ بزگ کن اَنت۔
مرچی ایشانی مپت وانینگ ءِ ہما اسکالرشپ کہ رستگ آ اوں بند کنگ بوتگ گڑاں باندہ ہمے مردم وتی ہمے کہت ءُُ زنگاں اچ منی ءُُ تئی جان ءَ درکن اَنت پرچکہ انوں تو ایشاں لکھانی حساب ءَ زر گر اِت وہدے اے وتی میڈیکل ءَ پاس کن اَنت اے اچ مئے ءُُ تئی جان ءَ کروڑانی حساب زرّ درکن اَنت۔