سرجمین دنیا ءَ یک نوکیں وائرسے ءَ انگر کتگ ءُُ اے وائرس ءِ نام کروناوائرس دئیگ بوتگ۔اے وائرس ءِ درائی چہ چین ءَ بوتگ ءُُ ایشی ءِ سوب ءَ بازیں بیرانی ءَ ہم بوتگ۔اے بیرانی یک ءُُ دو مہ بوتگ اَنت بلکیں سدانی حساب ءَ مردم بیران بوتگ اَنت۔بندات ءَ ہمے گشگ بوتگ اَت کہ اے وائرس چہ چینیانی ورگءِ سوب ءَ بوتگ بلئے وہدے اے گپ پدر بوتگ کہ اے ورگاں کہ چینی ور اَنت اے مرچیگیں نہ اَنت بلکیں کرناں چہ آہمے ورگاں ورگءَ اَنت۔

پدا ہمے گشگ بوت کہ اے بلکیں سازشے بوت کنت ءُُ ایشی ءِ پشدر ءَ دگہ ملکے ءِ دست ہوار ی بہ بیت بلئے ہما ملکانی نام کہ سوشل میڈیا ءَ گرگ بوتگ اِت اَنت وت ہمے ملکاں ہمے وائرس ءِ نادراہانی درائی بوت۔پدا گشگ بوت کہ اے وائرس ءِ گوات ءِ تہا اِنت ءُُ گوات سفر کنان اِنت ہر ملک ءَ کہ اے گوات سر بیت داں آ ملک ءِ مردماں اے نادراہی گیپت۔انگتاں سوشل میڈیا ءَ ہمے گپ اوشتاتگ بلکیں بانداتگ ءَ اے گپ اوں دروگ بہ بیت۔ہمے وائرس ءِ نادراہی ءُُ چہ نادراہی ءَ بیرانی ءَ مردم پریشان نہ کتگ اَنت بلکیں سوشل میڈیا ءِ گنجیں دروگ ءُُ پروفگینڈاہاں مہلوک ترس آماچ کتگ۔انوں ہمے وائرس ءِ ایران ءَ گواہی بوتگ ءُُ چریشی ءَ بازیں مردمے متاثر ءُُ بازینیے بیران بوتگ۔

نوکتریں ملک اے وائرس ءِ پاکستان ءِ صوبہ بلوچستان اِنت کہ گوں ایرانی باڈر ءَ دپ وارت۔انوں چنائی ہم سیزن تپ ءُُ کلگ یا پشّانک ئیگ اِنت کہ موسم مٹ بوتگ بلئے انوں ہرکس کہ تپ ءُُ کلگ یا پشّانکے ءَ گپ بزاں آئی ءَ کرونا اِنت۔ہمے ترس ءَ میڈیا ءَ وڑوڑیں حال شنگ اَنت یکے گوسیت فلان چیز ءَ بہ کن ترا اے وائرس نہ گپت یکے گشت فلان آیات ءَ بوہان ترااے وائرس جست نہ کنت۔ہمے حال ءِ شنگی ءَ کہ دیم گر بزاں ماسک چرے وائرس ءَ رکینت کنت بازار ءَ پنچ ءُُ دہ کلدار ءِ میڈیکل مسک صد کلدار ءَ پہ بہا نہ رسیت۔ درائین میڈیکل اسٹوراں کہ اے ماسک مدام چو گوشت ءَ درنجوک بوتگ اَنت مرچی گار اَنت دانکہ آ ہمے ماسک ءِ گران نیادی ءَ بہا بہ کنت چونہ اِنت کہ آ ہمے پانچ کلدار ماسک ءَ اے سکیں وہد ءَ نیاد ءَ دور بہ دنت گیش کنگ بوتگ۔چشیں ملکءَ حدائی عذاب نئیت کجا کیت۔

پدا میڈیا ءَ حبر شنگ اِنت کہ پیماز ءِ ورگ ءَ اے وائرس اثر نہ دنت اے گپ انگت ءَ سرجم ءَ شنگ نہ انت کہ مارکیٹ ءَ پیماز ءِ نیاد دوسری گیش کنگ بوتگ۔ برے کسے گیشت کہ چوش بہ کن،برے کسے گشیت کہ قرآن شریف ءَ اے وائرس ءِ آیات دئیگ بوتگ ءُُ ایشی ءِ وانگ ءَ چہ مردم دراہ بیت۔پدا یک کتابے ءِ نام سوشل میڈیا دیم ءَ کہ اودا نبشتہ کار ءَ ہمے وائرس ءِ نام گپتگ ءُُ سال ہم داتگ کہ اے سال ءَ بزاں 2020اے وائرس سرجمیں دنیا ءَ شنگ بیت ءُُ واقعہ انچو بوئگ ءَ اِنت۔پداحکومت ءِ نیمگ ءَ صوبہ ءَ را رڈ الرٹ نامینتگ ءُُ درائیں ادارہ پہ دو ہپتگ ءَ بند کتگ اَنت۔سوشل میڈیاءِ گپ وتی جاہ ءَ بلئے حکومتءِ نیمگ ءَ وہدے اے حال شنگ بوتگ داں مردمانی دل ءَ گیشتر تر س ودی بوتگ۔

کس چہ لوگاں نہ کپگ ءَ نہ اِنت کس پہ گیگ کارے کت کنگ ءَ نہ اِنت۔باڈر کنگ بوتگ اَنت بازیں مردم ہمودا باڈر ءَ چو بندیگیانی وڑا اِنت۔پدا اے حال ہم شنگ بوتگ کہ کوئٹہ ءَ ہم یک ءُُ دو نادراہاناں اے وائرس ءَ گپتگ۔اے گپ ءَ مردمانی دل ءَ گیشتر ترس ودی کتگ ءُُ مہلوک چہ ہمے ترس ءِ پداں چہ لوگاں دراتک نہ کنت۔ڈاکٹرانی تہا بازیں ڈاکٹرے ءَ را ہمے ترس ءَ گپتگ ءُُ آ کلگ ءُُ پشّانکی نادراہانی چارگ ءَ نہ روت۔اے جاوراں انگت ءَ حکومتی سوڈگ دیم ءَ نیاکگ کہ چون،چے پیم،مہلوک ءِ دل ءَ اے ترس در کنگ بہ بیت ءُُ اے نادراہی ءِ علاج چون گیشوار بہ بیت۔اے درگت ءَ انگت ءَ حکومت ءِ نیمگ ءَ ہچ پیمیں جار ے دیم ءَ نہ یتکگ کہ مہلوک ءِ ہمے ترس چہ دلاں دربئیت۔