کراچی: سپر ہائی وے پر مسافر بس اور آئل ٹینکر میں تصادم کے بعد بس میں آگ لگ گئی جس کے نتیجے میں 35 افراد جھلس کر جاں بحق اور متعدد زخمی ہوگئے۔ مسافر بس کراچی سے شکارپور جارہی تھی کہ سپر ہائی وے لنک روڈ پر مخالف سمت سے آنے والے آئل ٹینکر سے اس کا تصادم ہوا جس کے بعد بس میں آگ بھڑک اٹھی، بس میں 55 افراد سوار تھے جن میں سے چند جان بچانے میں کامیاب ہوئے لیکن متعدد افراد اندر پھنسے رہ گئے جس کے باعث 35 افراد جھلس کر دم توڑ گئے۔ واقعے کے فوری بعد فائر بریگیڈ کے عملے کو طلب کیا گیا جس نے جائے وقوعہ پر پہنچ کر بس میں لگی آگ پر قابو پالیا جبکہ ریسکیو ٹیموں نے لاشوں اور زخمیوں کو جناح اسپتال منتقل کردیا جہاں زخمیوں کو طِبی امداد فراہم کی جارہی ہے۔