ویلنگٹن:زمبابوے نے ہملٹن ماساکاڈزا کی سینچری کی بدولت سری لنکا کو ورلڈ کپ وارم اپ میچ میں باآسانی شکست دے دی۔
1996 ورلڈ کپ کی فاتح ٹیم کی وارم اپ میچوں میں یہ مسلسل دوسری شکست ہے۔
بدھ کو یہاں کھیلے گئے میچ میں سری لنکا نے زمبابوے کو جیت کیلئے 280 رنز کا ہدف دیا تھا۔
تاہم، ماساکاڈزا (117 ناٹ آؤٹ) نے سین ویلئمز (51) کے ساتھ مل کر چوتھی وکٹ کیلئے ناقابل شکست 119 رنز جوڑے اور اپنی ٹیم کو 45.2 اوورز میں ہی حیران کن فتح دلائی۔
چودہ سالوں سے زمبابوے کیلئے عالمی کرکٹ کھیلنے والے ماساکاڈزا کا یہ پہلا ورلڈ کپ ہو گا۔
آج کھیلے گئے میچ میں سری لنکا نے ٹاس جیت کر پہلے بیٹنگ کا فیصلہ کیا۔
سری لنکا نے مقررہ 50 اوورز میں آٹھ وکٹوں کے نقصان پر 279 رنز بنائے۔
سر ی لنکا کی جانب سےنمایاں بلے بازوں میں ڈیموتھ کرونارتنے (58) اور آل راؤنڈر جیون مینڈس (51) تھے۔
لیفٹ آرم سپنر ویلیمز نے 35 رنز کے عوض تین سری لنکن بلے بازوں کو پویلین کی راہ دکھائی۔
سری لنکا کو ہفتہ کے روز ورلڈ کپ کے افتتاحی میچ میں مشترکہ میزبان ٹیم نیوزی لینڈ کے چیلنج کا سامنا ہو گا۔ رائٹرز
